Hebre Laika

Ga Hpaw

Chyoi Pra ai Jinghpaw Chyum Laika hta, Hkristu hte hpawn myihtoi hkinjawng yawng gaw, Karai Kasang a amu magam lam hte seng wa jang, ga shadawn hte sha hpaw tsun tsun rai ma ai. Hkristu mung “Ginding aga nnan lat kaw nna, makoi da ai ndai sung htum ai lam hpe, ga shadawn hte sha nrai yang shi hpa ntsun dan yu ai” (Mahte 13:35).

Hebre laika gaw Ga Shaka Ningnan hta rawng lawm tim, Hkristan Kabu Gara Shiga htawn tsun ai ni nau lang n manu nga ai. Kaja wa nan mung, mungga tsun ai ni, lachyum hpyan dan yak ai laika langai mung rai nga ai. Dai gaw, ga shadawn hte tsun ai hta grau sung dam ai majaw rai nga ai.

Raitim, Matsun Maroi hku mu lu ai gaw, Hkristu hpe hkinjawng, hkinjawng agyi hku shachyen ya ai (Hebre 5:7, 10), Melhkizedek a hkring htawng lam hte maren (Melhkizedek a ga makoi Karai Kasang shing rai hkinjawng kaba N.N 14:18) Hkristu gaw hkinjawng agyi tai wa sai lam chye na hkawn hkrang da ra ai matsun laika langai mung rai nga ai hpe mu lu ai.

(Hkristu hpe hkinjawng agyi aya shadun ai majun gawn yang gaw, manggang jep ai de du wa nga ai. Mang gang hpe bai gawn ai shaloi, gumlau wa gaw Karai Kasang a hkrang bung hpe lagu la nna kasha shangai ai shaloi asak hkrung ai Karai Kasang hkrang bung ni hte bung ai shinggyim masha byin nna asak hkrung nga lu ai sha n ga, dai Karai Kasang a kasha ni a sai hpe “hpaga” hku nna Juu ni (planet) hpe garan ginlen kau ya ai majaw, Karai Kasang bai hpyi ai shaloi, ahpye alam hpa nbyin ai bai htang ya ra malu ai. Dai ahpye alam byin nbyin hpe hkinjawng agyi wa hku nna (Hkristu) gaw jep na ahkang lu ai hpe tsun ai. Sai shadip hku nna shayi sha hpe hkye mawai ai lam hta gaw, Karai Kasang a kasha alat hku galaw lu ai lam mu lu ai. Dai majaw, sai hkye ai lam hta Hkristu Yesu hku nna ga shajan n shaga ai, matsun hpe hkan ai hku ndai mungkan e sak hkrung dan lai wa sai).

Daw 1:1 kaw nan Abraham kadai hpe sat kau ai lam chye ra nga sai. N.N 14 kaw tsun dai ai hpe shaleng nga ai. Kaja nga yang N.N 14 gaw, Univers manghkang hpe tsun ai re. Hpan da ai ladaw garai ndu shi yang na mabyin ni re. Tsing gat ai ladaw langa (Mtt 13:25) hta byin wa ai manghkang hpe wa tsun nga ai. Digit hku wa yu ai shaloi, Abraham hku nmu ai sha hkawhkam mali hte manga gasat ai hpe wa mu lu nga ai. Abraham dai gasat poi kaw na bai wa yang jaw ai htamshi gaw Malahkizedek hpe jaw ai rai nga lu ai. Ndai zawn jaw ai hta: htam shi kaw na htamshi hte jaw kau ai nga ai zawn, htamshi kaw na htam mi jaw nna htam jahku la ai nga ai, htamshi kaw na htam mi jaw kau nna htam jahku hpe tinang nla ai sha manang wa hpe jaw kau ai lam ni mung nga nga ai. Malahkizedek hpe jaw ai kaw na ngam ai (9) hpe Abraham nla ai. Dai 9 gaw dai ni na wenyi hkye hkrang la ai hpe tsun hkyen ai rai nga ai. 9 a manu nam nak gaw, dinghpring ai, gayau mat ai kaw rawng nga ai Karai Kasang a DNA, chyoipra ai, Hkristan makam hta noi nang wa ai ni ngu tsun yang grau dan dawng na re kam ai.

Malahkizedek hpe wa yu na matu lam lahkawng nga ai. Shi hpe hkinjawng kaba mung tsun ai. Hkinjawng kaba ngu ai gaw, Sumsing lamu kaw nna ntsa (lahta) de hkinjawng ai wa re (N.N 14:18). Ndai hku tsun yang, Karai Kasang a lahta de Yehowa Karai, de a lahta de Ngai wa ngu ai tsang ni nga ai. Hkristu hpe gaw, hkinjawng agyi ngu tsun ai (5:5;10). Sumsing lamu a mungdan kaw nna Sumsing lamu de hkinjawng ai hpe tsun ai. Sumsing lamu a mungdan ngu ai gaw, ndai mungkan (shawng de gumlau nshang shi yang tsun ai shara) kaw nna sumsing lamu de hkinjawng ai (Karai Kasang hpang de shadu ai) magam amu langai rai nga ai.

Ndai kaw Hkristu a hkinjawng ai hpe Malahkizedek hte wa shingdaw ai hpe mu lu ai. Hkristu gaw 9 hpe la ai lam re. 9 gaw dinghpring ai ngu ai dai ni na Hkristan ni hpe gawng malai ai Digit re. Ndai Hebre daw 7 gaw hkinjawng yan hku nna masat ai lam sha nnga yang lahta de nmai du ai, ngu ai sang lang lam re. Hkristu kaw magam lit lahkawng nga nga ai hpe mung shaleng jasan dan nga ai.

1.       Hkinjawng magam bungli

2.      Kasha alat magam bungli

Hkristtu hku nna hkinjawng magam bungli galaw ai hta ndai hkum hkrang hte seng ai, sai hte nseng ai hku nna hkye la mai ai daw ni nga ai hpe mung mu lu ai. Ga shadawn: Manggang hte seng ai zawn re ai ni lawm ai. Hkinjawng ngu ai wa gaw hkum hkrang hte seng ai hpe ading tawk Hkristu hku nna dawdan lu ai lam nga ai.

Hkristu hpe hkinjawng hte shingdaw ai gaw, Juu ngu ai kaga planet kaw nga ai ni Karai Kasang a hkrang bung hpe la nna hprawng mat ai ni, Karai Kasang a hkrang bung hpe bai jaw ai ten hta e, ndaw nhten, ahpye alam hpa mung nnga hkra bai jaw htang ai hpe jep ai amu gaw, hkinjawng amu ngu ai re. Ndai gaw, Matsun Maroi hku sha nrai yang nmai mu ai, nmai chye na ai. Ndai hpe manggang gang ai hku nna ga makoi lang da ai hpe mu lu ai. Dai ni anhte mu ai (manggang-anagyi) nre. Karai Kasang a hkrang bung hkum hku nna Karai Kasang a kasha ni hpe jaw da ai ndai hkrang hpe, gumlau ni, Juu ni hkra kau ai, bai hpyi ai shaloi e mi na raw naw rai nga ai kun, nrai mat ai kun ngu ai hpe jep ai hpe Manggang jep ai ngu ai re ai.

Ndai amu hpe Hkristu gaw shi a ahkaw ahkang hte galaw lu ai hpe hkinjawng agyi ngu tsun ai. Raitim, sai hpe gaw kasha ngu ai arawng aya hte Karai wa galaw shangun nna, hkum hkrang hpe gaw Hkristu a ahkaw ahkang hte dawdan ai ngu ai lam re. Dai majaw, Chyoipra ai Chyum Laika kaw Hkristu hpe hkinjawng agyi (Hebre 4:14; 5:5) ngu tsun nna, Malahkizedek hpe gaw hkinjawng kaba (N.N 14:18) ngu tsun ai re.

Hkinjawng kaba hpe chye na matu Hebre 5:12 hta, “shawng na ga kanu hpe nanhte naw chye ra nga myit dai” ngu ai ga si rawng ai. Ga kanu ngu ai ndai gaw, sumsing htap kru nga ai kaw na ka-ang a lahta de na hpe tsun ai. Malahkizedek gaw dai de hkinjawng ai wa re hpe tsun ai (N.N 14:18). Abraham gaw hkawhkam (N.N 14:17) ni hpe dang kau ai ngu ai hta, Abraham ngu ai mying a shara kaw, Karai Kasang a magam bungli hpa baw re hpe wa tsun ai hku sha mu lu nga ai. Dai majaw, gumlau wa Karai Kasang a ta kaw hkrat sum mat na hpe, Abraham gaw “hkawhkam ni hpe dang kau ai” ngu ai ga si hte lang da ai re.

Hkristu gaw Kasha alat hku nna amu galaw ai shaloi, sai hte shadip nna sai hpe hkye la ai amu galaw sai. Hkristu a sai shadip gaw, Hkristan sha nre, kaga law law (gumlau wa up kau hkrum ai) ni mung lawt mat wa ai ni nga ai. Anhte nchye ai ni law law nga nga ai. Hebre laika gaw dai hpe wa ka ai rai nga ai.

Sai shadip ladaw langa ngut ai hpang gaw, lamu ga shadip de bai du wa ai. Lamu ga shadip ladaw langa ten hta gaw, chyoipra ai wenyi amu n galaw sai. Hkristu a mying ningsang mung akyu nrawng sai. Karai Kasang a amu rai yang she rai sana. Lamu kasa ni mung Hkristu a ladaw langa hta amu galaw ai ni rai yang she rai sana. Yawng gaw galai gachyai rai nna amu galaw na ladaw rai nga ai. Salum ni shan nrai, nlung zawn rai na. Sai salum hte asak hkrung ai ladaw langa nrai na lam, dinggam yaw, machyi mayan, ji nu zawn re ai hkrung kanu ni hpe ga shadawn jaw da nga ai.