Htunghkring Manghkang

Htunghkring ngu ai hpe manu shadan magang amyu mat magang ngu yang kadai nna ra na re. Shinggyim masha gaw sak hkrung lam galu kaba rawt jat wa ra nga ai. Dai zawn rawt jat galu kaba wa na matu htunghkring a majaw nrai, hpaji a majaw sha rai ang nga ai. Dai majaw, mungkan gaw htunghkring hta shamyet shanat nna manu shadan nga ai amyu ni ngam nga, hpaji hta shamyiet shanat nna manu shadan chye ai ni lai mat wa na sha re. Ndai lam n kajai yang nngut, n shadu yang nhkut; laiwa sai shata hta USA du Jinghpaw Wunpawng sha ni manau nau hkra rai hkrum zup hpawng galaw masai. 

Maga mi hku nna htunghkring hta myit rum ai hpu nau ni shada hkrum zup n gun awai ai lam ang nga ai. Raitim, maga mi hku nna yu ai shaloi, amyu ting hpe zai ai ni ngu nna sakse hkam dan taw nga sai. Galu kaba sai mungdan ni hta masha hpawng ai kaw lahkam mi (6 inches) hta jan ai nhtu hpai yang tara upadi hte nhtan shai nga ai. Bai nna, dusat mun hte arung arai hpe lang na matu mung ahkaw ahkang la ra nga ai. Gumhpawn nna yu ai shaloi, wunpawng sha ni manu dum yang bu hpun  jai lang ai arai ni gaw zai ai amyu a kumla hpe madun dan taw ai hku sha rai ang nga sai. Grau tsang ra ai gaw, Animal rights ni a man kaw shanhyi palawng pyi hpun na yak wa ai ten hta baw kaw dusat rai shakap nna hkawm dan ai gaw mala la prat hpang hkrat mat sai masa ni hpe shadawng dan taw nga sai. Dai rai yang Wunpawng sha ni a htunghkring gaw kade na hkra asak naw mai hkrung na a ta? htunghkring mat yang amyu mat ngu ai ga naw shaga ging na a ni, ngu gasan san na lam sha ang wa sai.

Raitim, htunghkring re ngu mu ai wa a matu gaw tsawm nna manu dan ai hku sha hkam la na re. Dai hte maren galai kau ra ai or akyu nnga ai htunghkring ngu ai ndai Wunpawng sha ni hpe Ethnic ngu ai de gau bang taw nga sai. Hpa rai htunghkring gaw masha hpe dai daram uphkang nga lu a ta? Htunghkring hpe manu shadan ai amyu ni kadai mung, mungkan madang hpang hkrat ai kaw lawm nga ai hpe sawn yu lu na sha re. 

Laika ka ai wa hku nna, shinggyim masha tai ai shaloi atsam kaba masum (three powers) hpe htunghkring hta grau manu shadan mayu ai lam tsun mayu nga ai. 

1. The power of education: Hpaji a tsam gaw masha hpe galai jashai kau ai, htunghkring yawng hpe gram kau ai, nga sat nga sa hpe nnan shabyin kau ai hte galai kau ya nga ai. Dai majaw htunghkring hpe hkan na malai education a lam woi ai hpe tsawra na mai nga ai.

2. The power of virus: Shinggyim masha a myi hte nmu lu ai virus or bacteria gaw sak hkrung lam hpe jahten kau lu ai atsam kaba rai nga ai. Dai majaw, dai hkrung kanu hpe chye mu ai hte chye koi kau ai, dang kau ai, makawp maga ai lam hpe tam ra nga ai. Shaloi, shinggyim masha gaw asak hkrung nga lu na rai nga ai.

3. The Power of Holy Spirit: Masha hta chyoi pra ai Wenyi ngu ai nnga yang du sat hta grau yak nga ai. Dai chyoipra ai Wenyi gaw lam magup hpe woi awn nga ai. Dai majaw, sak hkrung ai shinggyim masha yawng gaw chyoipra ai Wenyi a madu ni tai ra nga ai. 

Ndai lahta na lam masum hpe shaleng yang laika buk kaba byin na daram dam lada nga ai. Htunghkring hte galu kaba wa na nrai, lahta na lam masum hte galu kaba wa mai nga ai. Makau grup yin galai shai wa yang, lang ai arung arai galai shai wa nna htunghkring mung galai shai wa na ang nga sai law.

Nu Num Ni

Mungkan Num ni a ninghtoi hta, Awng San Kaw mung Myen mung a malai shang lawm lu sai. Kaga Num ni mung shayawm nmai. Dang di lu ai atsam dat nna amyu a matu, mungdan a matu, dinghku a matu hte Karai Kasang a lam hta loi mi pyi myit nmai shayawm. N gun da ting nna shakut ai Num ni gaw La ni hta grau ai atsam shanhte hta rawng nga ai.

Moi chyaloi nhkoi na htunghkring dingsa lai hpe chyu manat nna, shinggyim nga pra lam hpe n galai n jashai ai gaw, galai shai nga sai shinggyim hpawng a man e hkrat sum ai shinggyim wuhpawng de shangun nga ai. Tsa ban 21 hta shinggyim hpawng hpe kaning di gaw gap la mat wa na hpe Jinghpaw amyu ni zawn htunghkring chyu jahta, La/Num a shai ai lam chyu dara nga yang gaw kaji kadun ai amyu kaw na lawt na lam mi nnga ai.

Num wawn num la lai galai kau ra ai. Num hpyi hpu bang lai kabai kau ra ai. Dinghku hta La gaw ahkyak dik ngu ai myit sawn sumru lam shamat kau ra ai. Kasha lu yang La amyu a mying sha shamying ra ai ngu ai htunghkring kabai kau ra ai. Amyu jet n jet ngu ai sumru sumrawn lam makyep da n ging sai. Num / La garan nna dung, madang jashai nna hpawng de ai lai Wunpawng lapran nnga ging sai. Ndai prat na shabrang wa ngan ginsa ni dinghku hpe atsawm lit la mayu ai majaw nga yak nga ma ai. Dai majaw, gumhpraw nlu yang num nkam la, sut gan nsu yang dinghku nkam da nga ai. Ndai zawn re ai sumru sumrawn lam hte myit shatawng shada da ai sak hkrung lam pan dung gaw amyu kaji ni kaw sha nga na sai. Galu kaba lam hta hpang hkrat ai ni hta sha nga ai ngu pyi tsun mayu nngai.

Mungdan amyu langai hta La hte Num maren nga ra ai hte maren, ma hte sak kung ginsa ni hpe mung yu tawt kau nmai dam nga ai. Amyu nbung ai ngu yu kaji nmai, shinggyim hpawng hpe gara hku gaw de na ngu ai gaw grau ahkyak nga ai. Dinghku kata Num hte La maren ahkang nlu yang, langai wa gaw langai hpe dang sha yang, kaning di nna jet ai tsawra myit hte kanawn nga lu na kun? La ni matsun ai hku hkan nna nga ra ai dinghku num ni hta nga ging ai tsawra myit ni gaw hpa hte shadawn na ta? Karai Kasang kaw na tsawra myit shanhte kaning di hkam la na ta? Gara hku bai shadan shadawng nna Karai Kasang a mungdan gaw gap ai hta jai lang lu na a ta?

Shinggyim wuhpawng kata hpaji sha nrai, ahkaw ahkang sha nnga, sut su nga mai lam chyu mung nrai, rap ra ai ladat masa ni mung lani hte lani galai shai galu kaba wa ra ai hta Wunpawng amyu ni mung hkan dep nang ra sai nhten????????.