Nam Pan Kyau

Kyau baw sumhpa, tsi hkrung tsi nan tai ai lu sha

Nrut nra shadu ai namkye, laswi lasa jet ai sekye

Rawngba kyau a n gun atsam, magwi hpaw lam kyau hta grau nyam

Shan nga rung kyau hte chyawm gaw, dinghku num hte grau htuk ai law

Lagaw lata gayaw kashin, kaja dik ai Ya kyau ninghkring

Nrut nra daw hten rai yang, ya kyau jet jet tsi hpe jai lang

Kayaw gashin ai hpe sha gaw, Ya kyau laswi rut di u law

Dai hta grau ai baw she bai pru, laklai mying gaw nampan kyau ngu

Nsam hkum hkra pu ai nampan, ningja myi sai htuk ai tsaw jan

Pu mwi sama wai, lagat hkum hkra pyen gashai

Yu chyai magang yu len nang, kraw dung salum de nan hkrang

Bungli pu ba agrawp agrap, hkum ting machyi kadau kadap

Lami laman hkri hkraw katsut, nampan kyau wanhkut loi mi ma-ut

Mahti kabai kau dat ai hpa, kalang lata mai lawk nan nga

Ndai chyawm gaw rai la reng sai, mau hpa atsam nan lawm sam sai

Pu ba mai tsi ngu n”lu sha, lang sha lu yang nkrem nkrem nga

Lahkawng lang lu tim naw lu mayu, masum lang lu yang kut wa sai mu…

Shani shagu nlu nmai, shata mi na jang ya byin mat ai

Zet tsang tsi zawn she nawn ai wa, balen kyau nan sha hkrup sahka

Chyam yu ai ngu kadawng bang, ahtawk yu ai ngu yang nan kap nang

Nampan kyau ndai, hpyi hpai shayi she rai sai

Nlu yang mung nga n ngut, lamyi laman du hkra ka-ut katsut

Sharang da mung nlu, kaju galim nan she ngu

Balen nampan ndai, nat kap ai hpa she rai sai

Nampan kyau sha hkrup ai prat wa, kani ya ngu ai mying gaw bai lu la

Kaya mung nchyoi, masu na mung loi loi

Lagu na mung nhkrit, kani chyang lu na chyu myit

Karai lam gaw htaw, makam masham mung aw

Nawku jawng gaw loi pyi hkum tsun, hkat bung seng de chyu sun

Laban nhtoi chyoipra uga, amu bungli koi kau u da

Kani ya a matu, shani shagu laban chyu chyu

Hkat bung seng na nam up mungga, daw kaji kaba hti yu nra

Mung masa she tsun na kun, Karai lam she dinglun na kun

Sut masa mung nngam, Lungseng ja maw du hkra chyam

Yu ngwi  ninghkring mung tai, sumla hkrung mung gayet yu sai

Mungkan shiga hkum sumhpa, nchye ai ngu hpa nan nnga

BBC VOA kawn hkawt, RVA Manila de hprawt

Lamu ganghkau jahproi yu, nbung lakang gumgoi yu

Nhkai bum hpe jinghpa hpye na da, Mali hka mung nhtang dun yu sa

Hpa gaw hpa kun, hkrup ai mi hta tsun

Zan htuk yang na mungga wa, daw dap kaw tsap kahtam ai hpa

Ta tut magam hpa lam nla, ka ni wan hkut marawp chyu shaja

Dai sha nkrem loi mi lai, hkat bung hte sha bran na yak sai

Kawchyang hkawn hpe rap, hpraw tsawm hkawn hta kap

Balen sumtsaw ngu ai wa, myit dik la sai ngu nan nnga

Tawn kau mung nmai, jahka kau nan mung yak sai

Moi na tsawm la ai hkum gawng shingyan, ya gaw hpyi hte nra gram

Lasi du kri, Nra hte hpyi

Moi gaw hkat bung taw ba manat, ya gaw sai lam hta samyit tsat

Hkum ting ahpye alam, machyit marut manam shagram

Myitprwi gaw sha sha, matswi gaw pya pya

Kan gaw tit tit, myi gaw tsit tsit

Nsa rawng n”she ganga, lam hkawm yang mung gari gawa

Kabai tawn ai maza sumpum, ka ni ya a matu seng hkyep bum

Shanut shanaw abram tam, shatsu shakrang pyi nngam

Nampan kyau ndai, myu sha yawng hpe jahten sai

Kanu myi prwi jahkrat ai mung nang, dinghku sumprat adit ai labau hkang

Sut gan shama ai ka ni, amyu sha sat ai ningri

Sumtsaw yawng hpe nang jahka, tsawra myit hpe nang maza

Kahpu kanau hpa nseng, kanu kawa hpe chyu shagyeng

Hpaji hparat lam gaw htaw, maigan lahkam dep na aw

Wunpawng buga shara shagu, nang hpam dut sha ai ginra chyu

Sumla hkrung hta gaw labu pan majan da, ta tut rai yang ka ni tawba magra

Mali Nmai hka Ja maw du yu sai, hpraw chyang ka ni dut ai hkrai

Ndut ndang wanglu wang lang

Uphkang ai ni nchye nmai, ahkun hkanse hta sha ma ai

Ja maw wam ai hpyen la kun, ka ni jep ai pya da kun

Hkat bung seng mu nmai, myiman nsam yawng nan lai

Uniform gaw nraw, ka ni taw ba hta dagraw

Sinat hpe gaw shingdu tawn, wa ra tang bunghkum hta galeng sawn

Kasi kaja madun ai kun, nanghpam hpaji hkaw tsun ai kun

Lam woi na ni she grau, ka ni mahkam hta chyu dau

Myitkyina dakkasu da, laika sha hka ja ma hka

Sarawun jawng lung ai mung lanlak, ta tut bungli bak abak

Germany shing-up shagu, tsi rung tsi gawk chyu

Lagaw lahkam htawt shut yang, samyit dingsa matawt na mung tsang

Ya na mahkawn shabrang ni, hpa lam hta mung ahpa atang di

AIDS ana kap na mung nhkrit, myu sha htum na mung nmyit

Asak sha gaw shi hkun ning, lup wa kawng de chyu hpring

Myu tsaw ma ni shagram shawam, hkyuk htawng de mung sumpum sumpam

Nampan kyau a majaw, dinghku run ai grai law sai law

Htaw de le de ndu uga, Balik dap she tsamai kau sa

Mahkoi lawt kun lawt kun ngu, mayun kumhpa latup jaw yu

Jaw kau ai gaw sen shi n yawm, dinghku sut gan yawng tawm

Dai ram sha gaw nmai, tara rung de bai lai

Ama hkam yang lu na zawn zawn, mayun kumhpa bai shaw ladawn

Tsi jep ai mung majoi nrai, gumhpraw ga she shaga ma ai

Tara kasa shap mung ra, njaw nmai gaw Asuya she-ne wa

Ahkyak ai gaw tara agyi le, shat gawk de bai bun bun hte hte

Madu jan a maw lanyet kaba, majaw kaba nlawm yang nkam shaga

Mahkoi wa lawt kun lawt kun ngu, nta dut nna bai jaw yu

Hpa mung laklai ai lam nnga, jahtum e gaw hkyuk htawng de hkra

U, Wa yam nga yawng nan tsai, nga shara du hkra shamat kau sai

Sut gan mung yawng ma, dinghku mung bya

Kashu kasha jam jau hkrum, kanu kawa mau pahke dum

Shoihpa nawng de dawk, matsan chyaren de rawk

Sinda adup tim mangan nnga, myiprwi hkrat tim hpa lan nla

Manu ndan ai myi prwi ndai, wunpawng sha ni masin machyi la sai

Chye nga ninglen lu sha, hkrit ra ninglen hpaga ga

Ka ni wa chyu ka ni wa chyu, amyu htum wa na mung nmyit yu

Myit malai mung nhkraw, ka ni  yi hkyen nna she bai pyaw

Wunpawng sha ni e, kaning ngu tsun yang she chye na myit te

Htum wa sai law, ma wa sai law

Hten wa sai law, bya wa sai law

Kaning di je la na ta, gara hku le la na ma

Tsasam ni gaw nang hpam dut n”lu su, myu sha ni mari lu nna hkrap agru

Amyu shamat ai nampan kyau ndai, W.P sha ni lawan jawm gasat ra sai

Shachyut mu law, shaden mu law, anut mu law abyen mu law

Nat mu law gasat mu law, gayet mu law ahpat mu law

Htim mu law rim mu law, gyit mu law hkang mu law

Galun mu law ding grang mu law

Ashep mu law ashin mu law

Adep mu law rin mu law

Makyit makai nna nat shamawng, le mali nam panglai de shayawng kau mu law

Le..i a danai dam hugawng wa, gala rawng ka ni grai nan sawng ai nga

Laklai nampan pu, hkyeng dam she yau ya rai sai muu

Goi..ningji seng galang hkrap ai gaw nyaw, nampan kyau gaw nhkai saga lu yaw..

Mali Lungbyen