Matsun Maroi mungga

LUKA LAIKA      KANU 23:27, 28, 31

Luka 23:27 Masha wunawng wuwa kaba hte, shi a lam hkrap ngu hkrap ngoi, sharung shayawt nga ai numsha ni mung, shi a hpang e hkan nang ma ai.  28 Yesu gaw shanhte hpang de gayin nna, Yeruslem shayi sha ni e, nye a majaw hkum hkrap myit; nanhte hkum dai hte, nanhte a nshu nsha ni a matu hkrap nga mu: 31 shanhte hpun katsing hta ning di ma yang gaw, hpun jahkraw hta kaning wa di na mara ta? ngu mu ai.

1. Numsha ni ngu ai kadai ta?

2. Yeruslem shayi sha ngu ai kadai ni ta?

3. Hpun katsing ngu ai hpa ta?

Ndai mungga hpe daini na Hkristu hpang hkan ai ni, sara ni hte jawm htai yu ga. Chye na na ahkang gaw njaw da nga ai, tim Jinghpaw amyu ni kau mi hpe chye na shangun nga ai.

1. Numsha ni ngu ai gaw gumlau wa a kashu kasha (tsing-Mtt 13:25,37) ni hpe tsun ai re. Shanhte gaw, mam (nli kaja-Hkristan) ni hpe dan la, shu la, hkye la ngut jang nat kau na ni rai ma ai Mtt 13:40. Dai majaw, shinggyim masha hkrang she bung tim, Hkristu hpang de gayin wa na ahkang nlu ai ni ndai mungkan e law wa nga jawng ai gaw, mau hpa nrai. Sasana nlu galaw nna mung nrai nga ai. Kam sham hkan sa na ahkang nan nlu ai ni law law rai ma ai.

2.Yeruslem shayi sha ngu ai ni gaw, ading tawk tsun yang Hkristan tai wa ni ni, Israela lakung hta dam mat wa ai sagu Mtt 10:6; 18:12 rai nna, shawng de na hku tsun yang, Tara Agyi 21:1 Ben-yamin lakung a kashu kasha ni re, kaji htum ai wa mung tsun ai. Shanhte hpe sagu hpung hta na langai mi ngu ma ai. Dai majaw, Sumsing lamu a mungdan ngu ai gaw, Ben-yamin amyu ni a matu san da ya ai sali wunli ga hpe tsun ai Tara Agyi 21:17. Chyoipra ai Chyum Laika hta, Ga shaka Ningnan gaw, dai shayi sha hpe num nnan ngu tsun nna, sa htinglu la ai hpe la nnan nga tsun ai. Yesu Hkristu gaw, Israela yawng a gawng malai tai nna, kaji htum ai Ben-yamin hpe sa htinglu ai maumwi rai nga ai Tara Agyi 21:13. Kasa pawlu gaw, shi nan Ben-yamin a aru arat, Hebre majing Hpilipi 3:5 wa rai nna, Yesu Hkristu a magam yi ngam hpe shi shakre ra na lam matsun hkrum ai wa re, nga ai. Hkawhkam Shawlu mung Ben-jamin lakung na rai nga ai 1 Samuela 9:1. Galoi mung, Ben-jamin amyu na nga tsun jang hkinjawng hte Hkristan tai wa ra na ni hpe tsun ai re.
Dai majaw, htinglu htinglai hkungga ngu ai gaw, sagu kasha rai nna, Yubak a matu sha lachyum pru asung shang ai hta n ga, de a matu sha shangun dat hkrum wu ai. Mara raw kumhpa a matu gaw, htingrai htingrat hkungga ngu ai re. Yesu Hkristu mungkan ga ntsa sa du hkaw tsun ai hta, mara raw ya na lam ga hkaw mi muk ntsun kau da ai gaw, shi a bungli lit nre ai majaw re. Mara gaw tsing gat ai nhkru ai Mtt 13:28 wa rai nga ai. Mara raw kumhpa ngu ai Htingrai htingrat hte seng ai hpe gaw Karai wa nan ading tawk jum ai amu she rai nga ai 1Samuela 6:4,17. Dai rai nna, Yubak gaw gumlau wa e tsing gat katut nna hkrum sha ai amu rai nna, mara gaw, tsing gat ai gumlau wa hta nga ai. Anhte a yubak mara hpe raw ya rit ngu nna tsun yang, lam mahkrun njaw n ang ai ga re ai hpe mu lu na raga ai.

3. Hpun katsing hta ningdi ma yang hpun jahkraw hta kaning di?

Hpun gaw Asak re da N.N 3:2. Katsing ngu ai gaw, asak hpe hkye hkrang la lu ai ladaw langa ten hpe tsun nna, jahkraw gaw hkye hkrang la ai ladaw htum ai hpang hpe tsun ai re.

Dai majaw, hkye hkrang la lam nga nga yang pyi dai ram rai yang gaw, hkye hkrang la lam ladaw htum ai hpang kaning ma di na rai ta? ngu grai yawn let matsan dum ga hte tsun ai ga wa rai nga lu ai. Dai aten na masha ni Yesu Hkristu kadai re hpe kadai mung nchye kau dat ma hka! Yawhan 8:19-22.

Lahta e tsun ai hpun hte seng nna, naw tsun hpungjat mayu nngai. Hpun ni hkawhkam tam ai prat hta, Tsan lun hpun, Maihpang hpun, Tsabyi hpun ni gaw, ningdang kau ma ai da. Lachyum gaw mungkan ga e Karai wa a amu galaw ai nkau ni, Karai wa hta sadi dung ai ni a gawng malai tai ya dan nga ma ai. Shing re ai masha ni anhte a lapran e nga nga ma ai. Raitim, Ju hpun gaw, hpun ni a hkawhkam tai wa sai da. Ju hpun hpe Yesu Hkristu wudang ntsa jen hkam ten, lagup hku di nna padang dip kau sai majaw, asak ngu ai hpun ni hpe up ai hkawhkam wa Ju hpun gaw, padang dip katut sai rai nga ai. Tara agyi 9:7 kawn htum hkra hti yu ga.

Bai, Mtt 21:8 hta, Yesu Hkristu Yeruslem mare de shang wa yang, shawa masha ni hkap tau ai lam hta mung, ndai hpun ngu ai hte matut nga ai. Hpun na lakung lakying kran la ai hta hkan nna, Hosana mung 3 lang, 2 lang, kalang di nna marawn tau nga ma ai. Mahte hta byin ai lam a lachyum gaw, Matsaw lahta tang na asak daju du sai, ngu ndau ai kumla re ai.Dai gaw, hpun na lakung lakying kran la nna hte 3 lang Hosana ngu marawn ai majaw re.

Maku 11:8 hta, nam na hpun lakung lakying kran la nna, ngu tsun let Hosana hpe mung 2 lang marawn ma ai. Lachyum gaw, tsing ni zing madu da ai asak hpe bai la sana ngu ndau dat ai rai nga ai.

Yawhan 12:13 hta gaw, namhtan hpun lakung ni daw lang nna, Hosana kalang sha marawn ma ai. Lachyum gaw, sumsing lamu hte ginding aga lapran lamu madin N.N 1:6 kaw, gate tawn sai. Dai kaw nna lahta de lai lung lu na matu Hkristu a lekmat lawm ra sana, lamu madin madu du sai ngu ai re. Matsaw ningtsang de na ni shawng ndau nna she amu galaw ma ai hpe shara law law hta rawng nga ai.

Ndai hpun katsing a lam gawn yang galu la nga ai. Jinghpaw wunpawng sha ni mung, num nnan shalai la ai kaw, wa hkyi mahkrai ngu ai kumba ka-ang hku lai di yang htan ai mahkrai gaw, hpun katsing rai malu ai. Kawa hte nmai htan ai ngu majun hta mu lu ai. Hpa majaw nga yang, Jinghpaw mau mwi ni hta, hpun gaw La rai nna kawa gaw Yi rai nga ai. Shayi sha hpe La wa mahkrai htan la ra ai hpe mu na ga ai. Matsaw ningtsang ni hpe jaw jau yang mung, nat hkungri ni yawng, hpun katsing hte galaw ra ai. Tau hkrau galaw da nmai ai zawn dingsa ni tam hta la nna mung n galaw ga ma ai. Dai hku rai yang, Yesu hpe jen da ai wudang gaw, hpun katsing rai na lam, sawn shut shara nga na a ni?
End