Htunghking Hte Makam Masham

Htunghking hte makam masham gaw gara hku sa wa a ta?

Htunghking ngu ai gaw Jaw Jau ai, Jaw Jau ai ngu ai gaw Matsun Maroi hpe hkrang shala ai, Matsun Maroi hpe hkrang shala ai ngu ai gaw: Myihtoi ga, shingran ga hte matsaw ningtsang Madu daju ni ndai dinghta ga, ginding aga kaw galaw na magam bungli ma hkra hpe hkrang shala ai re ai. Dai hkrang shala ai hta hkan nna Matsaw ningtsa ni ndai mungkan de hpa galaw na ngu ai hpe jawjau ai lamyi laman hpe yu nna sha chye lu ai. Ga shadawn: Laning mi ladu hkrum ai sagu la hpe sat nawng shangun ai gaw, kasha alat hpe shaw na hpe ndau sai zawn; sagu kasha a sai hkaw ai hte Hkristan ngu ai ni hpe la na ngu ai hpe ndau ai lam re. Hkristan tai ai ni nau kam sham nna woi la hkrum ai hku gaw nmyit yang kaja ai.

Sagu hpe jaw jau ai kaw lang jang, htinglu htinglai ai ngu tsun ai. Htinglu htinglai ai gaw Yubak hte seng nna byin wa ra ai gaw mai gaw sha hpe bai htinglu ai re. Yubak gaw Karai Kasang a kashu kasha ni nga ai hkauna pa kaw tsing gat katut nna hkrum sha ra ai gaw mai gaw sha hpe yubak ngu ai re. Dai yubak hpe Hkristu lit la nna, yubak a htawng hta rawng nga ai ni hpe hkye mawai ai amu gun hpai nu ai. Dai yubak a malai sai hte htinglu ya ai nga nna ka da nga sai.

Rai yang mara gaw? 

Mara ngu ai gaw htingrai htingrai hkungga hku nna Karai wa ading tawk jum ai amu re. Dai majaw Hkristu gaw mungkan ga ntsa sak hkrung dan ai ladaw hta hkawtsun ai shara shagu hpe yu yang, mara hpe raw dat ya na lam ga hkaw mi mung ntsun kau da ai. Dai gaw, shi galaw ra ai amu lit nre ai majaw re ai. Mara lu ai ni gaw tsing gat ai (nhkru ai nat) re. Chyoipra ai chyum laika kaw htingrai htingrat hkungga hpe 1Samuela daw 6 hta wa htawng madun da ai. Mara lu ai ni galaw ra ai htingrai htingrat hkungga hpe alak mi n shaleng dan da ya ai gaw, dumhprut mat ai nrai. Karai wa a jeyang dawdan ai hte shangut na lam hpe tsun da sai. Dai majaw, hkyehkrang la ai magam bungli ma hkra gaw, makam masham byin shangun ai. 

Anhte Jinghpaw Wunpawng sha ni a htunghking kaw, hkyehkrang la ai lam hte seng nna lit nla da ai hpe mu lu ga ai. Dai majaw, makam masham ngu ai hpe Jinghpaw Wunpawng sha ni nchye na ai ngu yang nau wa mi dinglai shadu na kun? Kaja wa nau nlang ga ai. Makam masham lu la jang dawjau ai ngu ai de du ai. Dawjau ai ngu ai gaw Karai Wa hte rau hpawng de ai lam rai nga ai.

Ga shadawn: Egutu mung kaw na Israela masha ni pru wa na rai yang, Hpara-u hpe tsun na matu Moshe hpe tsun shangun ai ga gaw, (nye masha ni hpe dat dat na da) ngu ntsun shangun nga ai sha, Nye a amyu masha ni nam e nye a matu poi sa galaw lu mu ga shanhte hpe dat dat mu, nga ai ngu nna sa tsun mu ai Pru 5:1.

Dai majaw, Dawjau ai ngu ai gaw anhte a Madu, Shi hte rau ningngai nga lu nna dum dum hte hte nga lu na hte, Shi a shingwang kata wa shanu nga ai lam rai nga ai. Kalang lang dawjau ai ngu ai ga hpe manang ni a ga hku nna shangun ma hku nawn kau kau rai nga ga ai. Karai wa shaga ai gaw shangun ma hku nrai, arau sha nga nna kungdawn shagrau let alum ala Karai wa hte rau nga ai lam rai nga ai.

Rai yang, Nawku ai hte dawjau ai ngu ai ga hpe garan ginhka nna shaleng mayu ai. Karai wa hpe gaw dawjau; Shi hte dum dum hte hte nga nna alum ala sak hkrung ai lam ngu tsun mayu ai. "Nawku Dawjau" ai ngu ai ga hpe shara law law hta Bala hpara hpe tsun nna, Nawku ai ngu ai ga rai jang gaw, Karai wa hpe mung, masha shada da arawng sadang kaba ai wa hpe kaji ai wa hku nna mung, hkungga shakawn ai lam re hpe mu lu ai. Matut na