NLUNG NNAN HTE SENG AI MAJUN

Nlung nnan sha ngu ai ga si Majun hpe Matsun Maroi hte Ginru Ginsa hku chye na ra na lam nga mali ai. Ginru Ginsa hku nna gaw, Shat Nnan Sha (nta htinggaw langai); Chyeju Dum Poi (shawa hku-Hkristan ni) galaw nga ai hpe mu lu ai. Chyeju Dum Poi hku galaw ai shaloi, Ginru Gin sa lai re majaw, gumhpraw hte galai mari la ai namsi namsaw hkum sumhpa, lu ai sut gan hpan hkum hkra hte masha hpan n lata, shara ginra n lata buga htinggaw n ginhka ai sha galaw mai ai rai nna, Hpan wa ningsang hpe chyeju dum ai myit madun ai hkrang shala dan ai Poi rai nga ai.

Matsun Maroi hku nna gaw, Nlung Nnan Sha hpe zaw nawng zaw wa (or) wu nawng wu wa hku galaw na hpe myit mada nga ai. Nlung Nnan sha ngu ai hkrang shala ai hta; kadai ni hpe Karai wa bungli shangun nna, kadai ni hpe gara kaw na hkye la nhtawm kadai lit la mat wa na hpe tsun dan ai poi lamang langai mi rai nga ai.

Dai majaw, Ginru Ginsa hku mu lu ai hte Matsun Maroi hku gawn ai hta lachyum namnak nbung hkat nga ai. Ginru Ginsa aga shaga ai ni ngu ai hta Mungkan shinggyim masha yawng lawm nna, Matsun Maroi ga tsun ai ni hta gaw Hebre amyu ni hte Jinghpaw Wunpawng amyu ni hta sha mu lu ai.(Ndai hku tsun yang nau hpyau ai ngu shadu na).

Matsun Maroi hku nna yu yang, Nlung Nnan Sha ai hta, hka hte hkai shatut la ai, tsing shatut la ai hkai nmai hpe n shalawm shangun ai. Hkau na kaw na pru ai nsi naisi hte nam si namsaw ni nlawm ai hpe mu lu ai. Dai majaw, Yi ngu ai kaw hkai shatut la ai Nai, Mam hte nsi nai si ni hte Poi galaw ra nga ai. Nai gaw “La” rai nna matsaw ningtsang la ni Gumlau hpe gasat dang nna, gumlau nnga ai lamu ga shadip hpe tsun mayu ai. Mam gaw gumlau ndep sai Num, Chyoipra sai Jan ga na Jan Shayi ni ngu ai lachyum pru nga ai. (Ndai nai mam hpe gawn yang, Yu, Nga mayawn, Manau de du hkra htik ra ai hpe dum lawm shangun mayu ai).

Dai majaw, Nlung Nnan Sha ai poi hta, Nai hte Mam ngu ai ga si hpe tsun lang ra nga ai. Raitim, ndai majun hpe Ginru Ginsa aga shaga ai mungkan masha ni chye na na matu gaw nloi nga ai re. Nlung Nnan Sha poi hpe, Dingdung hte Sinna mying ai shara hkan e galaw ma ai. Sinpraw hte Dingda mying ai shara hkan na ni gaw, ndai lam hpe nhkawn ma ai, galaw mung n galaw mai nga ai. Lama rai nna, Sinpraw hte Dingda mying ai hkan galaw hkrup ang wa yang mung, dai amyu ni hta shadip mat magang sai (sh) shadip shamat magang sai ngu ai kumla pru nga ai. Dai majaw, Nlung Nnan Sha Poi hpe hkrup mara masha ni hte hkrup mara shara hkan jawm galaw ai lai hpe koi kau ra ai hpe mu lu ai. Lama rai nna, jasam ni hte jawm galaw ai rai yang matsun shamat sai, nhkan sai hpe hkrang shala sai lam re ai. Matsun Maroi lu ai ni sha mai galaw ai Poi kaba langai mi mung rai nga ai.

Chyoi Pra ai Chyum Laika hta Madun da ai Nlung Nnan Sha Poi

Pru 23:16; 1Hk.Hk 4:42; Pru 19; Ezeke 48:14 ni hta dan pra hkra mu lu nga ai. Raitim, ndai tsun da ai hpe htai ai hta hkan nna shai wa mai nga ai. Matsun Maroi hku htai ai shaloi, ndai tara hpe jaw hpang ai gaw Pru 19 kawn rai nna, shata masum ngu na hta langai ya shani, Sina nam mali de wa du kabye ai shaloi jaw ai tara hta lawm ai.

Pru 23:16 hta gaw, yi hkau na nsi naisi ngu tsun nna, 2Hk.Hk 4:42 hta gaw Muk yaw mam, muk tawng, htingpa ngu ai ga si ni shalawm lang da nga ai. Matsun Maroi ga si ni hte tsun da ai re majaw, lachyum nam nak sung nga ai. Pru 23:16 gaw, Hka nan hkran (sumsing) de du yang hkan sa ra ai rai nna, Kabu Gara Shiga a awng dang ai lam hte hkye hkrang la ai magam bungli tawng sai lam hpe tsun dan nga ai. Dai majaw, ndai chyum ga hta tsun mayu ai hta na langai mi gaw; gumlau nnga sai, hkye hkrang la ai lam tawng sai hpe “Nlung Nnan Sha” (sh) “Nmut Shinggyin Poi” ngu tsun ai.

2Hk.Hk 4:42 hta gaw, chye na da ra ai hpan masum lawm ai.

Karai Kasang a Masha, magam bungli galaw ai wa hpe “htingpa” ngu nna, muk yaw mam muk tawng 20 ngu ai gaw, dinghta ga hta Karai Kasang shi kadai hpe hkye la na, kadai ni hte amu galaw na, hkye la hkrum na ni gara kaw nga nga ai ngu ai hpe ndau dat ai lam re. Dai hpe:-

        Htingpa        -     Matsun maroi gun ai ni hte seng ai          Tingsan        -      Matsun maroi hte seng ai

     Nhpye          -     Ginru Ginsa hte seng ai lam hku shadan dan nga ai.

Htingpa gaw Matsun Maroi ga rai nna, matsaw ningtsang kaw nna dinghta ga de amu galaw ai ni hpe shachyen ai ga si rai nna, Hkristan makam hku gaw, hkye hkrang la ai lam hpe kadai galaw ai, kadai hpe shangun ai ngu ai hpe tsun ndau dan ai lam re ai.

Tingsan ngu ai hpe hpung shingkang daru magam hku jai lang ai, matsaw ningtsang majun rawng ai mying re ai. Dai majaw, atsam rawng ai hku chye da mai nga ai.

Nhpye ngu ai rai jang gaw, Ginru Ginsa ga re ai. Tinang kam ai hkrup mara mai bang ai.

2Hk.Hk 4:42 hta madun da ai Nlung Nnan gaw, hkye hkrang la ai lam du wa na hpe tsun ai rai nna, kadai hpe hkye la na, hpa rai hkye la ra ai hpe tsun dan mayu ai hkrang shala lam hpe Nlung Nnan ngu ai ga si hte shala dan nga ai. Ezekela 48:14 mung madi shadaw ai hku nna, magam bungli ngut ai hpang sumsing ngu ai hta du nga lu na shadawng dan mayu nga ai. 

Majun hkik ai re majaw, hkrup mara shara kaw hkrup mara tsasam ni hte hkrup mara hkai nmai lu sha ni hte hkrup mara hkrang shala galaw ai baw gaw nrai nga ai. Matsun hte hkrak galaw yang wunli lu mai ai zawn, wunli ntat na matu mung sadi sahka hkan sa ra na ga ai.

Dai majaw, Nlung Nnan Sha Poi ngu ai a ga si majun a lachyum nam nak gaw atsam ningja kaba ai re majaw, marai hkum shagu sadi sahka nna hkrang shala galaw ra ai bungli langai rai nga mali ai hpe dum shangun mayu ai rai.

Bum Sin Wa

Matsing: Layang U-zai (Dashi Naw Seng Htun) gawn da ai hpe kadun dawk ka da ai re.