Hkrung Rawt Ai Lam

2Korin 15:12-19 hta kasa Pawlu tsun ai ga gaw, lai wa sai hkristan ni hta rawng nga ai makam masham hpe shangai dat ya sai. Raitim, ndai lam gaw, dai ni na kam sham ai ni nlang hte hpe ung ang shangun ai sha n ga, tsun dang rang hkat na lam ni byin wa nga ai. Kasa Pawlu tsun ai hta hKristu nhkrung rawt a yang gaw anhte ni hkaw tsun sakse hkam ai lam kaman re, si mat ai ni bai hkrung rawt wa ai lam nnga yang gaw hkristu mung bai hkrung rawt na nrai, nga ai. Kaja wa nan ndai lam gaw yak hkak la ai makam masham a sharin achyin ai lam rai nga ai. Hkristu gaw nhkrung rawt ai ngu tsun na mung yak nga ai. Kam sham ai ni shi zawn bai hkrung rawt na lam mung hkum shan kun Wenyi kun ngu san ra nga ai. Wenyi hkrung rawt ai hpe kam yang, Yesu mung Wenyi hkrung rawt ai lam sha mai byin nga ai. 

Kasa ni a sharin achyin ai lam madung gaw Yesu bai hkrung rawt ai lam hte hkum shan shadan dan ai lam hta daju da nga ai. Lama Yesu nhkrung rawt yang Hkristan ni a myit mada lam hpa mung nnga na lam mung shanhte tsun masai. Kam sham ai nkau ni gaw Yesus hkrung rawt ai lam hpe kam gwi tim, kam sham ai ni mung hkrung rawt na hte dai hkrung rawt sai Yesu bai sa na hpe gaw nkam gwi nga ma ai. 

Anhte ni ga san san yu na lam nga nga ai. Yesu lama nhkrung rawt ai rai yang hkristan gaw mat mat sana kun? kam sham ai ni mung nhkrung rawt ai nga yang kam sham gwi ai ni naw nga na kun ngu ai lam rai nga ai. Kasa Pawlu hpa rai lahta na lam hpe ndai hku tsun ai kun? Dai majaw, Kasa Pawlu a sharin achyin hkaw tsun ai lam hpe jum da na nga yang: 

Hkristan ni a sharin acyin hkaw tsun ai lam ni gaw dawnu (foundation) nnga ai lam byin wa sai.

Hkristan makam masham mung dawnu nnga ai wam wam dam dam lam byin sai.

Kam sham nna Hkristan tai ai ni mung K.K a shut ai sakse ni sha tai nga ai. 

Hkristan makam masham gaw hpa manu namnak mung nrawng mat sai. 

Kam sham nga ning len yubak kaw naw rawng nga ai ni sha tai nga ai. 

Yesu hta yup pyaw mat ai ni ngu ai si mat sai ni mung mat mat sai. 

Dai majaw, yubak a mayam hta hkam mana nga ra ding yang sha naw re.

Ndai lam a majaw, Kasa Pawlu Athen mare e si mat ai lam hte bai hkrung rawt ai lam hkaw yang shawa masha ni shi hpe jahpoi kau ai hkrum wu ai (Kasa 17:32).