Hkristan tai ai ban prat kade na tim, Hkristan sak hkrung lam hpe nchye ai ni law law re. Chyum laika masa hku mi rai rai, labau ginshi hku mi yu yu, Yesu hpe wudang hta jen kau ai lam gaw, tengman ai lam hpe nhkam ai ni hte arawng aya hpe karai shara kaw tawn ai ni a lata hte re lam nyet nlu nga ai. Nkau mi chyawm gaw, Karai wa lajang ai re nga nna yin la nga ma ai.
Maga mi hku yu yang, htunghkring hte makam masham hpe woi awn ai 'Sanhedrin Council' na hpung du nkau ni a arawng sadang nhkrat sum u ga makawp maga ai nga yang, lagaw lata shalai ai amu she rai nga ai. Yesu hkaw tsun ai tengman lam ngu ai gaw, dai ten na ningbaw tai nga ai ni a matu dingbai dingna byin nga ai. Yesu lama mi tsun shagu, shanhte hpe tsun bun ai chyu shadu manu ai. Dai majaw, Yesu hpe 'ndai wa si ging nga ai' nga ma ai. Read
Ratiim, Yesu hpe ra sharawng ai ni, shi galaw ai lam jaw ai ngu madi shadaw ai ni gaw shi a ga madat ai hte n gun jaw nga ma ai. Yesu si mat ai hpang ndai lam hpe nhkrit ntsang sakse hkam hkawm ma sai. Dai majaw, hkristan hpung gaw mungkan de chyam bra wa nna, de a myit jasat ai lam gaw sinna mung na Democracy masa de gayin du wa nhtawm Hkristan sak hkrung lam gaw sinna masha ni a sak hkrung lam zawn re ai hpe ngu ai re, nga ai ni pru wa ma ai. Nkau mi gaw, Hkristan tai tim, Yesu hpe nawku na sha sharin la hkrup ma ai; shi tsun ai, sharin ai, galaw ai hpe hkan sa na ndum shami rai nga ma ai.
Ndai mabyin hte nshai ai sha, 2010 ning December 7 ya shani (13:30GMT) hta, law law se mungkan mungdan asuya ningbaw ni galaw nga ai sat lawat hpe hpaw dan taw nga ai Wikileaks a Editor daju, Australia masha Julian Assange (39) ning gaw, UK na Westminster e nga ai tara rung kaw du wa ra ai. Shi hpe Balik ni shaga wa ai lam mungkan shiga hta shabra dat ai shaloi, (Sat kau mu, la kau mu, htawng bang kau mu, atsawm sharin shaga dat mu) nga nna US, Canada, Germany hte Roman myit rawng ai gumshem du sai rawt ai ni tsun jahtau nga ma ai. Assange galaw ai hpe jaw ai nga nna madi shadaw ai ni mung, shiga jaugawng prat hta yawng madi shadaw nga ma ai. Tara rung a shinggan kaw Assange hpe pyi nchye ai masha ni du hkra shi hpe raw dat mu, dat dat mu, shi mara nnga ai, shi galaw ra ai amu hpe hkrak galaw nga ai nga nna n gun madun (demonstration) galaw ai ni mung kalang ta du wa nga ma ai.
Raitim, Assange a tara rung hkrun lam gaw dai nrai, European tara hte maren, Sweden kaw August e byin ai num sumlu ai manghkang a majaw rai nga ai. Ndai amu gaw, Swiss tara rung e ngut chyalu rai nga ai. Raitim, US a mung masa balen a majaw ndai amu bai shabrawng nna udi matu tam Assange hpe ganyet kau na gyam nga ma ai, nga nna shi a tara kasa wa tsunw sai.
Assange a galaw ai lam jaw ai, hkrak ai nga nna shi hpe madi shadaw ai masha law law rai nga ai lapran e, sat kau ra ai, rim ra ai, jeyang ra ai, htawng bang ra ai, shi ndai mungkan kaw nnga ging ai , Espionage Act of 1917 hte nhtan shai ai nga nna ka-un bu ai ni law law nga nga ma ai. BBC na san htai galaw ai Kirsty hpe tsun ai ga hta: nang ndai amu hpe shanang galaw ai gaw US hte shanhte a amu hpe ninghkap ai wa hku nmu nni? dai sha nrai, asak gyam wa na nang ntsang nni? ngu san dat wu ai. Assange gaw, Shanhte ngai hpe sat kau na lam gaw hkrit hpa nre, shanhte a makoi magap ai amu a majaw mara kata masha hkying hku si taw nga ai gaw grau hkrit hpa re nga ai. Anhte tsang ra ai gaw, abusive war nteng nman ai majan hte, ndai mungkan hpe n tara ai hte laba ka-up nga ai ni gaw tara nshang ai ni re, nga nna nhtang tsun nga ai.
Ndai prat hta lai wa sai 2000 ten na Yesu zawn tengman lam hpe hkaw tsun nga yang, tang ndu mat sai. Assange zawn Internet shiga majan zawn gasat ai tengman lam gaw ya na zawn ntoi 8 ya hta mungkan hpe garin ashun shangun nhtawm, mungdan uphkang du ni law law a myit hpe nsam amyu mi hku galai shai shangun lu na sai nga nna kam sham nga ma ai. Lam mi hku tsun yang, Assange gaw Yesu galaw ai zawn re ai tengman lam hpe lagu nna mi rai rai, mayun nna mi rai rai teng hkrak ai shiga la nhtawm mara madi madun shabrawng dat ai amu hta kadai mung makoi nlu mat nga ai. Dai majaw, shi hpe sat na ni gaw, Yesu hpe sat kau ai ni hte wa nbung dam nga a ni? ngu ga san san mayu nga nngai.
Ndai hku hkuk hkak ai aten galu na masa nga ai. $ sen 300-500 jaw yang Assange hpe dat na nga yang jaw na nga ai ni mung pru wa nga ai. Hpa mi rai rai, December 14 ya shani bai hkrum hkat na hku tara rung kaw nna masat sai. Shana maga 3:00pm hta Assange gaw madaw hte tara rung kaw nna pru wa ai mu dat ma yang, shawa masha hte mungdan shagu hkan na shiga jaugawng ni gaw n gup mahka nna jahkring mi mau mat ma ai.
Tara agyi ni gaw, Assange hte Wikileaks gaw mung masa hte she seng ai, ndai amu gaw shi a num sumlu ai amu hte sha seng ai nga ai. Num shaw ai nshaw ai gaw, shawa masha kadai mung chye na nrai raitm Assange gaw htawng de du taw nga sai.
No comments:
Post a Comment