Kadai Mung Nchye Na Kau Dat ai Hkristu

Daw 4
Karai Kasang a mungdan anhte a lapran e rai nga ai (Marku 1:14-15)

Hparashe nkau mi Yesu hpe ga san san ma ai, “Karai Kasang a mungdan galoi du na ta” (Luka 17:20). Yesu htan let, “myi hte yu nna mu lu ai baw nrai” ngu mu ai. Karai Kasang a mungdan ngu ai gaw nanhte a kata e rai nga ai (Kaji 21). Yesu madun dan mat wa ai Karai Kasang a mungdan ngu ai hte seng nna, lam masum hku dawng dan mayu nga nngai. Yesu a magam bungli gaw machyi shamai hkawm let hpang wa ai lam mu lu na ga ai. “Galile mung ting gawan hkawm let, tara jawng ni hta kabu gara shiga ni hpe hkaw dan nna, masha ni a machyi makaw amyu myu hpe shamai shatsai ya wu ai. Shi a lam kajai gumhkawng wa nna machyi makaw hkrum ai law law wa shi hpang de shamai shatsai hkam la na du sa ma ai”Mahte 4:23-24.Yesu a sharin achyin ai kabu gara shiga hte machyi shamai ai ngu ai a lapran hta, Karai Kasang a mungdan hte seng nna lak lai ai lam ni nga nga ai.

Tara jawng ni hta tara hkaw nga yang, “Nazaret wa Yesu e, anhte nang hte hpa seng ga ta? anhte hpe jahten na nang sa du nni? Nang kadai re ai ngai chye nga nngai; Karai Kasang a chyoi pra ai wa nang rai nga ndai” ngu tsun hkrum wu ai (Marku 1:24). Dai majaw, Yesu a sasana gaw kabu gara shiga hpe hkaw na, machyi ai ni hpe shamai na hte nhkru ai nat ni hpe dang kau lu na lam hpe madung nga lu ai. Ndai masum hpe galaw ai shaloi, Karai Kasang a mungdan anhte a lapran e du nga sai, ngu ai rai nga lu ai.

Raitim, hparashe ni gaw, Yesu a nat shaden ai, machyi shamai ai hte kabu gara shiga hkaw ai gaw kadai mung galaw lu ai lam re. Dai majaw, ndai wa Karai Kasang a kasha nga nna tsun ai gaw masu hkawm ai she re nga nna ka-un bu nga ma ai. Yesu galaw ai magam bungli a ntsa, masha kadai mung Hkristu hku nmu ma ai, nkau mi hkinjawng shadu, nkau mi myihtoi shadu, nkau mi tsi sara shadu, nkau mi Hpara-u a man e Moshe galaw ai lamik kumla hpe nkam ai zawn, Yesu hpe mung kam sham ma ai nrai….

Dai ni gaw, anhte ni yawng Karai Kasang a mungdan de shi a marang e jashawn mani ai (Kolose 1:13). Anhte gaw Karai Kasang sharawng awng ai hku daw jau nga na lit sha lu saga ai (Hebre 12:28). Raitim, nsin hta naw hkawm nga ga yang gaw, hpa lachyum pru na nrai (Shingran 1:6). Shi a shaga la ai mung, Karai Kasang a dan hkung ai magam amu hpe shabrawng na matu sha rai nga ai (IPetru 2:9). Raitim, tang du hkra garai nhpring tsup wa lu shi nga ai. Dai majaw “Karai Kasang a Wenyi hte nat ni hpe ngai shaden kau ma we ai rai yang gaw, Karai Kasang a mungdan nanhte kaw du sai rai nga ai” ngu mu ai (Mahte 12:28; Luka 11:20).

Karai Kasang a mungdan gaw htawm hpang she du na

Karai Kasang a mungdan ngu ai gaw, anhte a ka-ang e rai nga sai lam na lu ga yang, anhte a grup yin shada da garum shingtau hkat let ngwi pyaw ai shinggyim wuhpung wuhpawng gaw de la lu na lam byin pru wa sai. Raitim, dai mungdan dik wa lu na gaw ya e nrai htawm hpang she du wa na lam mung shi hkaw tsun nga ai. Lama wa rai nna, anhte a ka-ang e du nga sai ngu kam sham yang, anhte ni hpa hpe naw myit mada nga na ga ta ngu san na lam mung nga nga ai (IKorin 15:19). Masha a shakut ai hte du wa na Karai Kasang a mungdan gaw teng sha mai byin na a ni? Karai Kasang ra ai lam ndai mungkan e anhte de da lu na ga ni? Lam amyu myu hku nna mu mada hkam la let tsun ai hta, Karai Kasang a mungdan gaw htawm hpang e she du wa na ngu ai hku nna mung anhe ni chye na la lu ga ai. Ndai gaw, kam sham ai Hkristan ni a lapran ndang kalang shara mung byin nga ai. 

Chyum masa hku htai la na kun? Kam sham ai hku hkap la na kun? Myit hta shadu ai hku hkan na kun? Yesu gaw hkawhkam mung re lam anhte chye saga ai. Daniela a shingran hta dai hkawhkam gaw mungkan ting hpe up hkang na re ngu ai hpe mung tsun da nga ai (Daniela 2:44, 7:13-14, 22). Shingran laika hta dai lam gaw du ngut sai nga nna mung hkam la ma ai (Shingran 11:15, 19:11-16).

Karai Kasang a mungdan ngu ai hpe, “Karai Kasang up hkang ai lam” hpe tsun mayu ai re lam Kabu Gara shiga laika ni hta shaleng nga ai. Raitim, chyum laika ting hpe madung tawn ai ni gaw, Yesu bai du ai shaloi she Karai Kasang a mungdan gaw hpring tsup wa lu na re, nga nna hkam la ma ai. Akyu hpyi yang Karai Kasang a mungdan du wa ru ga (Luka11:2); Wenyi hta matsan mayan hkrum ai ni shabrai lu la na shara (Mahte 5:3); hpang jahtum na nhtoi hta shang lu na shara (Mahte 7:21); Yesu du yang Karai Kasang a mungdan gaw a lawan dan pru na (Luka 19:11); Kawa a mungdan hta e tsa byi nnan hpe lu lu ai nhtoi du hkra, ngai bai lu na nrai (Mahte 26:29) nga ai chyum ga ni gaw, anhe hpe Karai Kasang a mungdan htawm hpang de du wa na lam hpe tsun nga ai hku nna hkam la kam sham nga ga ai.  

Kasa Pawlu gaw, Karai Kasang a mungdan ngu ai de shang lu na matu, dinghpring ai kyang lailen hte sawk se lawk le lam nlawm ai hte lu la na lam tsun nga ai (IKorinhtu 6:9). Raitim, hten mat chye ai hkum hkrang hte nshang lu na re nga nna bai kahtap tsun wu ai (IKorinhtu 15:50; Ehpoesu 5:5). Karai Kasang a mungdan gaw sha sha lu lu rai na hku nre ai sha, Chyoi pra  ai Wenyi e, dinghpring ai, ngwi pyaw ai hte kabu gara ai re nga ai (Roma 14:17). Ding hpring ai wa gaw kam sham ai hte hkrung nga lu na re, dai majaw dinghpring ai ngu ai gaw kam sham ai hpe tsun ai re (Roma 1:17) nga ai.

Karai Kasang a mungdan lam hte seng nna, chyum laika a ninghmu hpe rai rai, Yesu a mungga hku rai rai, Kasa Pawlu a shadum sharin ai hta rai rai, anhte ni mu mada hkam la ai lam langai hte langai shai na lam ni nga wa nga ai. Gin chyum hku nna yu ga nga yang, Karai Kasang a mungdan hte seng ai gaw, Karai Kasang hpe kam sham let si mani ai sat lawat rawng nna Chyoi pra ai Wenyi a lam woi ai hku lam shagu hpe awng dang lu ai sak hkrung lam ngu yang shut na lam nnga ai law..