Daw 5
Karai Kasang a mungdan gaw du ngut sai.
Mahte Laika 25:34 hta, Karai Kasang a mungdan gaw Ginding aga nnan lat kaw nna lajang tawn da sai mungdan a sali wunli hkam la na lam rai nga ai, nga ai. Ndai gaw, laklai shai ai shawng ninghpawt na hpan da amu magam hte mung matut nga ai. Adam yan Ewa hpe Edin sun e nga shangun da ai ten, Karai Kasang uphkang ai mungdan kaw nga lu masai rai nga ai. Raitim, 'Karai Kasang a mungdan' ngu ai ga si hpe njai lang ma ai.
Abraham hpe ga sadi jaw ai shaloi, ‘Nang hta nna hkawhkam hkaw seng pru shajang na mara ai (N.N 17:5-6) hta shatai nna, hkawhkam mungdan ngu ai byin wa ai mung mai byin nga ai. Raitim, dai hkawhkam mungdan gaw makoi magap nga ai. Ga shadawn: matsi zawn; jum zawn, ninghtoi zawn rai nna mung, hka hpung ni a ntsa e hpum nna mung nga nga ai (N.N 1.2; Luka 8:16, 11:33; Mahte 5:13).
Egutu mung na shaw la ai aten kaw nna, Isaraela masha ni gaw myihtoi hkinjawng ni a woi awn ai (myihtoi hkinjawng mungdan) a kata chyoipra ai amyu tai yu masai (Pru 19:6). Dai lam mung, Karai Kasang a mungdan npu e rai nga ai. Shanhte hpe jaw ai 'Ga Shaka' mung, hkawhkam wa jaw ai zawn rai nga ai. Shanthe hpe Karai Kasang nan hkawhkam hku myihtoi hkinjawng ni hte up hkang nga ai kata, shinggyim masha hkawhkam hpe hkrang shapraw nna, hkawhkam aya dang la masai rai nga ai (ISamuela 12:12). Karai Kasang chyawm gaw, yawn let hpang jahtum shanhte ra ai hku hkan ya na lam Samuela hpe tsun wu ai (ISamuela 8:7).
Dai kaw nna gaw, Israela amyu a matu myi hte mu lu ai hkawhkam, Dawi hte Solomon gaw, Yehowa a ting nyang hta hkaw dung nga manu ai (I Hkawhkam 29:23). Matsing: Yehowa a ting nyang hta hkaw dung ai ngu ai hpe, Yehowa shadun ai shara kaw hkaw dung nga ai nrai, Yehowa a lahkum hpe kashun dung ai ngu chye na la mai nga ai). Raitim, Israela mungdan gaw hkawhkam a npu e re ngu nna naw hkam la ma ai.
Israela amyu ni shanhte a hkawhkam majing Karai Wa hpe n madat mara ma sai. Dai majaw, Sholomon a kasha prat kaw nna Yesu du sa wa ai aten du hkra, ban hte ban dumbru dumbra di kau, bai kahkyin da, dumbri dumbra di kau bai kahkyin da da di wu ai. Dai lam shabyin ai gaw, myi hte mu lu ai hpe chyu yu sharawng nga na malai, shanhte a kraw hta Shi a tara hpe bang da nna shanhte a myit hta ka da na hpe yaw shada nga ai (Yeremia 31:31-33). Ndai myi htoi ga gaw, dai ni na nawku hpung ni hta dik wa lu na sai kun? Chyoi pra ai Wenyi hkam la lu ai ni anhte gaw, hkin jawng mungdan hte chyoipra ai amyu tai wa sai, nga nna anhte hpe madun mani ai (Pru mat 19:6; IPetru 2:9). Kaja wa anhte gaw shi a mungdan hta shang chyalu rai saga ai. Raitim, dai mungdan gaw tsing hte kayau nga ai mam yi hte naw bung nga ai nga nna Kabu Gara Shiga hta shaleng da nga ai. Dai majaw, hpang jahtum Madu du yang she dai lam hpring tsup wa lu na kun, nga nna hkam la ai Hkristan makam masham hpe lu da ai ni mung law law rai nga ga ai.
Karai Kasang a mungdan hte seng nna, tsun sharin hkaja wa ai shaloi, lai wa sai ten e she rai sai, ya ya du nga sai, hpang de she du wa na re ngu ai lam gaw chyum masa hku nna mu lu ai sharin achyin lam rai nga ai. Lama wa langai ngai hpe madung dat kam sham na mung, chyum masa hku nna yu yang tang du ai hkam la kam sham lam nbyin shi nga ai. Moi prat, yap rat, htawm hpang prat dinggrin ding nawng arai nga ai hku nna mu mada na grau htap htuk nga ai. Galoi raitim, Karai Kasang a mungdan de shang lu ai lam gaw hpa rai ta? ngu ai hpe hkawn hkrang na grau ahkyak nga ai. Ndai lam hpe chye na lu na matu, sara masu ni, Wenyi hpe sha kam ai ni, atsawm n hka ja da ai ni, Karai masa hpe kung kyang hkra nsawk sagawn lu ai ni a sharin achyin ai lam gaw, Karai Kasang a yaw shada ai pan dung hte kahprai mat mai ai sak hkrung lam de du mat wa mai nga ai law...
No comments:
Post a Comment