Kadai Mung NChye Na Kau Dat Ai Hkristu

Daw 1

Shi gaw shi a Mung, Ga de du sa ra ai rai ti mung, shi a baw sang ni shi hpe n hkap la ma ai. Yawhan 1:11

Mau hpa amu hte machyi ai ni hpe shamai, si sai ni hpe mung jahkrung, laru marang hpe mung daru kau, masha hkying kaba hpe mung daw jaw dan lu ai daru magam ahkang aya hte du sa timung, shi a amyu ni Meshia re ngu nhkap la mu ai (Yawhan 1:11). Dai zawn masum ning jan hkaw tsun sakse hkam hkawm ai sasana amu hta hkan mu mada lawm ai masha 120 daram gaw, Yesu a hkum hkrang si mat ai hpang Shi a hpung hpe de da manu ai (Kasa 1:15).

Myihtoi Esaia a shingran hta, “Shi gaw masha ni e shatan nhkan ai hte, n kaw n law di ai hkrum nga ai: yawn hkyen hkrum ai hte nji nmu chye ai wa, shi rai nga ai: myi man kayin kau hkrum ai wa zawn shi rai nga nna, shatan nhkan hkrum nga ai; anhte mung shi hpe hpa n nawn ga ai” nga tsun da chyalu rai nga ai (Esaia 53:3;7). Yesu madun dan ai lamik kumla hte hkaw tsun sakse hkam dan ai mungga ni gaw, mare kaba e nga ai ni a matu hpa nnawn shara tai nga ai majaw, Hpung a ningbaw ningla ni nan shi hpe shoi hpa shoi rang jahkrum nna je yang kau manu ai (Esaia 53:7-10).

De a majaw, Yesu a sharin achyin hkaw tsun sakse hkam dan ai lam gaw wudang lam tai wa sai. Dai zawn byin ai lam gaw, Yesu a shatawng shada ai lam hpe masha ni na nga timung, nchye na, mu nga timung nchye yu la ai a majaw byin wa sai rai.

Yuda (Jews) ni gaw hpa hpe wa naw myit mada ma hka?

Yuda mash ni, Meshia ngu ai hpe teng sha shaning na na wa ala nga ai ni rai ma ai. Meshia ngu ai gaw, ‘hkye la na hkawhkam’ hkrang mawai la ai wa ‘sh’ Karai Kasang lata dat ya ai n gun lapyin rawng nna  Israela hpe woi shanglawt na hkawhkam hpe myit mada nga ma ai. Kaja wa nga yang shi gaw  Yuda ni a hkawhkam nan rai nga ai. Hpaji rawng ai Sinpraw dan na masha masum gaw, “shangai wa sai Yuda hkawhkam wa gaw, kanang rai nga a ta” nga nna san ma ai (Mahte 2:2). Herod ngu ai Yuda mung hpe up ai Roma Duwa gaw, Yuda ni la nga ai hkawhkam gaw shi hpe gum lang na wa rai n hten! nga nna myi n grip ai ala yu nga ai. Dai majaw, Yuda hkinjawng ni hpe, “nanhte a Hkristu ngu ai wa gara kaw shangai wa na da aw” nga nna shiga a sagawn nga ai (Mahte 2:3-16).

Hkristu ngu ai ga hpe, Greek hku nna Christos (Englsih hku Christ) Hebrew hku Mashiach hpe Englsih hku Messiah "anointed one," signifying one who was specially chosen by God rai nga ai. Herod gaw kaja wa nan 'Hkristu’ ngu ai a lachyum hpe Yuda ni a hkawhkam ngu myit la nga wu ai (kaji 4).

Hkawhkam rai a yang gaw, Dawi a aru arat kaw na sha rai ra na re ngu nna, Herod mung, Yuda ni yawng mung sawn la nga ma ai. Ndai ga hta lakap nna, Hparashe ni hpe Yesu san ai ga san hta, “Nahte gaw Hkristu a lam kaning ngu myit nga myit ta? Shi gaw kade a kasha rai nga a ta”? ngu nna san ga wu ai (Matthew 22:42).

Yesu hpe Dawi a kasha hkrak re ai lam, nmyit mada ai ni a sakse hkam  ai lam gaw, myi kyaw ai masha lahkawng shi kaw hkan nang let, “Dawi a kasha e, an hpe matsan dum la mi, nga nna jahtau ma ai,” (Mahte 9:27b). Hkanan amyu num sha langai mi mung, “Dawi a kasha, Madu e, ngai hpe matsan dum e law” nga nna kasha hpe machyi shamai ya na karum hpyi wu ai (Mahte 15:22). Yerihko mare kaw mung, myi kyaw ai masha lahkawng, “Dawi a kasha, Madu e, an hpe matsan dum la mi law” nga nna karum hpyi ma ai (Mahte 20:30). Myi kyaw ai hte ga nchye shaga ai wa hta nat kap ai wa langai hpe Yesu shamai ya ai hpe mu ai ni yawng gaw, shi “Dawi a kasha rai nga a hka” nga nna tsun ma ai (Mahte 12:22-23). Dai sha n rai, Yeruslem de shang wa yang, “Dawi a kasha kaw Hosana rai nga uga” mung tsun marawn ma ai (Mahte 21:9).

Myihtoi ngu ai ni kadai e mung n galaw yu ga ai shamai shatsai lam, nat shaden ai lam ni hte mau hpa lamik kumla ni hpe mu ai masha ni ma hkra gaw, “Hkristu ngu ai wa du yang pyi, ndai wa galaw ai hta, grau ai lamik kumla dan lu na a ni” nga nna tsun kabun nga ma sai (Yawhan 7:31).