Daw 2
Karai Kasang a Mungdan Lam Nmaw De
Yuda ni myit mada ai ‘Dawi a kasha’ gaw Israela mungdan hpe hkrang shaw la ai amu woi awn na re ngu myit mada nga masai. Masha 5000 hpe daw jaw ai lamik kumla hpe mu ai ni gaw, Yesu hpe ‘Myithtoi’ langai bai paw pru wa ra ai nga nna myit la nga ma ai (Yawhan 6:14). Dai hku myit la ai gaw, Moshe e tsun da ai ga hpe a dum nga ai lam sak se rai nga ai (Tara Jahprang 18:15-19). Hpilip mung Nahtanela hpe ‘Moshe a tara laika hta na myihtoi langai mi Nazaret mare na anhte mu saga ai’ nga ai (Yawhan 1:45). Raitim, Nahtanela gaw Nazaret na arai kaja pru ga a ni! nga nna myit mada shara nnga hkra tsun kau wu ai.
Yesu hpe myihtoi hku mu ai ni gaw shi hpe hkawhkam shatai na maw ma ai. Dai lam Yesu chye wu ai yang, koi yen kau kau rai nga ai (Yawhan 6:14-15). Shinggyim masha hte seng ai hkawhkam byin wa na hpe gaw shi nra sharawng nga wu ai. Hpa majaw nga yang, dai lam gaw Karai Kasang hte seng ai lam nrai nga lu ai. Yuda ni myit mada ai lam gaw, Shi si mat ai ten du hkra, Dawi a tingnyang hta shadun nna amyu mungdan hpe woi awn shangun shangun an hkyen nga ma ai. Dai majaw, sape ni shi hpe, ‘Madu e, dai Mungdan Israela masha ni hpe, dai aten e bai de ya na rai sa ni? Ngu nna san ai hkrum wu ai (Kasa 1:6). Yesu mung, shi kadai rai nga ai hpe masha ni gara hku wa chye na ma ai kun, nga nna myit nga ai. Shi a sape ni hpe san ai ga san hta, “Nanhte mahtang ngai hpe kadai wa rai nga ai nga myit ta” (Mahte 16:15); Petru htan ai ga, “Nang gaw Hkristu ngu ai ahkrung nga ai Karai Kasang a kasha rai ndai” (Mahte 16:16), hpe Yesu gaw, Nang a lu ndai, ngu htan ya wu ai.
Meshia Re ngu Chye Na Ging Nga Ai
Yuda masha ni shanhte a myihtoi ga hpe shanhte nan nchye na ai sha hkan sa lai wa yu masai ngu sawn la mai nga ai. Yesu a Sasana hpang wa ai ten hta, Myihtoi Esaia a ga hta la kap nna, “Madu a Wenyi nye a ntsa e nga nga ai: Matsan mayan hpe kabu gara shi ga hkaw tsun na matu, shi ngai hpe nam man chya ni ai: Bawng dung ai ni hpe shalawt lu na lam, myi kyaw ai ni hpe myi bai mu na lam, hkaw tsun na matu mung, zingri hkrum ai ni hpe dat dat shangun na the, Madu a sharawng awng ai shaning hkaw tsun dan na matu mung shi ngai hpe shangun dat ni ai” nga nna shi a Sasana hpe hpang dat ai rai nga lu ai (Esaia 61:1-2; Luka 4:18-19).
Yesu a Sasana pan dung gaw, Chyum Laika hta ka da sai myihtoi ni a ga hte maren Karai Kasang a mungga hpe jahkum shatsup na du sa ai rai nga lu ai. Raitim, Yuda ni nchye na ma ai. Myihtoi law law wa mung, Meshia ngu ai wa shinggyim hkum hkrang hte du sa nna, asak hpe jaw kau ai kaw du hkra tsaw ra myit madun let hkrang shaw ai amu hpe galaw na lam tau tsun da chyalu rai nga malu ai. Raitim, kaja wa du sa ai shaloi, shanhte nhkap la lu ma ai. “Hpang jahtum na prat hta e, Yehowa nta bum gaw, bum kaga ni a baw tai wa nna, kawng ni hta grau tsaw wa ai hte amyu baw ma hkra gaw, dai de yen bang na mara ai” nga ai (Esaia 2:2).
(Matsing: Chyum masa hta, bum hte kawng ni ngu ai gaw, asuya hte mungdan ni hpe tsun mayu ai re nga ai. Karai Kasang a mungdan gaw mungkan mungdan shagu hpe up hkang nga na lam re. Ndai myihtoi ga a lam gaw, Yesu hkaw tsun ai mungga lam madung rai nna, Meshia gaw dai ni hpe up nga ai, ngu ai rai nga lu ai). Ndai hta la kap nna, Yesu hkaw tsun hpang wa ai shaloi, “Karai Kasang a mungdan gaw ni wa magang ra ai: myit malai lu nna, dai kabu gara shiga hpe kam sham nga mu” (Marku 1:15). Shi gaw dai sumsing mungdan or Karai Kasang a mungdan lam de sa ai lam nmaw re, shi hku nna sa yang loi ai lam matut tsun wa sai (Yawhan 14:6).
Yesu, Shi Kadai Re Lam Adan Aleng Ntsun Dan A Hka!
Masum ning hkaw tsun ai Sasana amu hpe, Yuda ni hkrak nchye na ma sai. Yuda ni htai la ai hte, Yesu hkaw tsun ai kabu gara shiga gaw kaga ga hkrai arai nga ai. Meshia ngu ai wa gaw, shinggyim hkum hkrang hte du sa na lam, myihtoi ni tsun da tim, kaja wa du sa ra ai ten hta, shi hpe Meshia hku nmu ma ai. Chyum Laika hpe htai ai ni madaw shut sai kun, Yesu hkaw tsun madun ai hpe madaw nchye hkam la ai kun? Shanhte myit mada ala nga ai Meshia wa, shanthe a ka-ang e hprawt re ai hpe Yuda ni gaw na prau prau, myi lau lau mat masai.
Yesu shi nan mung, Karai Kasang a kasha Hkristu rai nga ai lam hpe ntsun na matu Nat ni hpe jet kau wu ai. Rai timung, nat ni gaw, “Nang Karai Kasang a kasha rai nga ndai, nga nna jahtau let, masha law law kaw na pru mat wa ma ai” (Luka 3:41). Hkalup sara Yawhan htawng kaw nna, Yesu hpe ga san san dat wu ai, “Nang gaw dai du sa na ra ai wa rai nga nni, kun kaga naw la ra na ga ni” ngu yang, Yesu gaw, nanhte mu mamu, na mana hpe tsun dan dat mu, ngu nna htai wu ai. Dai lam gaw, myi kyaw ai ni myi mu lu nna, lagaw hten ai ni shi a marang e hkawm lu ma ai hte ,mang gang kap ai ni san pra wa nna, matsan mayan ni kabu lu masai lam rai nga ai (Mahte 11:4-6).
Raitm, Yaku a hka htung kaw hkrum ai Samari num sha hte tsun shaga ai hta, “Hkristu ngu ai Meshia du na ra ai gaw dai num sha chye ai lam Yesu hpe tsun dan yang, Yesu gaw, Nang hte ga tsun nga ai, ngai gaw, dai wa nan rai nngai,” ngu wu ai (Yawhan 4:25). Andre mung, kahpu Simon (Petru) hpe, Meshi hpe mu sai lam tsun dan nga ai (Yawhan 1:41). Dai zawn, masha nau nlaw ai hkan shi gaw Meshia re lam, Karai Kasang a kasha Hkristu re lam hpe tsun dan gwi, hkam la gwi ti mung, masha daw wa daw tsa a man hta gaw, dai hku ntsun shaga ai hpe law law lang mu lu nga ai.
Hpa mi byin yang byin, hi kadai re ai, hpa galaw na du sa ai hpe gaw, galoi mung atsun dan nga ai. Karai Kasang a Mungdan ‘The kingdom of God’ a lam hpe madung tawn nna atsun dan nga tim, dai lam gaw shi a Sasana re ngu nmu ya nga ma ai. Yesu mung, shi a amyu masha ni Meshia ngu ai hpe ala nga ai lam shi chye nga ai. Dai majaw, shi hpe nyeng n garu ai sha n ga, myi tu myi hkyeng azi yu nna jahpoi shahpyak na re hpe tau chye nga ai majaw, dai lam nbyin u ga tau yen kau kau re ai lam hpe mu lu na ga ai. Karai Kasang a yaw shada ai lam hpring tsup wa uga, Sasana majen je hpang wa ai ten e shi a marang Yuda myu tsaw lai hte, Roma ni hpe gum lang nhtawm mungdan nru nra byin na shi nra nga ai.
Grau nna, Yesu lama ‘ngai gaw Meshia re’ ngu shi hkum shi jau jau ndau kau dat yang, kalang ta Roma up hkang du ni hte, Yuda ningbaw ningla ni rau shi chya hkat nna, shi a Sasana yi ngam adaw atang byin mat na teng rai nga ai. Raitim, lani mi na nhtoi hta gaw shi koi nlu na re hpe dum nga sai. Ndai lam gaw shi a matu lajang da ai lam tai wa sai rai…
No comments:
Post a Comment