Bum Ntsa Na Tara Hkaw Ga

Mahte 5:3-8

Alu ai Tara

1. Mahte 5:3 

Wenyi hta matsan mayan rai nga ai ni gaw, a lu ma ai; kaning rai nme law, sumsing lamu a mungdan, shanhte a mungdan rai nga malu ai.

Hkristu tsun ai Wenyi lahkawng sha nga ai.

a) Wunawng wuwa hpe tsun ai wenyi; wunawng wuwa hpe tsun ai wenyi gaw Magam bungli hpe tsun ai. Ndai magam bungli hte seng nna wunawng wuwa hpe tsun jang; nbung, hka, hpun, myi hte mu lu ai hte nmu lu ai ni yawng madat ai.

b) Shawa hpe tsun ai wenyi; shawa ngu ai ni gaw, dinghpring ngu ai dai ni na hkye hkrang la ai magam bungli hpe wa tsun tsun rai wu ai. Hkristu gaw dinghpring ngu ai hpe shaw la na du sa ai re. Dinghpring ngu ai gaw Hkristu a sai hpe tsun ai. Dai sai rawng ai ni Hkristan tai wa ai. Dinghpring jang, dingman ai de du ai. Dinghpring ai hte ding man ai yan hpe tek jum da ai gaw tengman ai lam ngu ai (ngai gaw teng man ai hte asak) ngu ai Hkristu re ai.

Nkau ni Hkristan ni a wenyi hpe hkye la na du sa ai Hkristu, nga tsun tsun rai ma ai. Wenyi gaw hkye ai baw kaw nlawm ai. Shi hpe magam bungli hku sha chye na da ra ai. Magam bungli hpe hkye la kau jang, Sumsing Lamu a Mungdan byin wa na nmai byin ai. Dai gaw magam bungli n galaw yang, nbyin wa lu ai majaw Hkristu nan yu sa ra ai re.

Ndai sumsing lamu a mungdan ngu ai hpe Hkristan ni madu na matu tsun ai nre, shanhte a na nan she re. Shanhte nan adaw mi (sali wunli adaw mi  Kolose 1:12;3:23) re. Hkristan tai ai hte madu la lu ai re. Kaga mi ntsun ra ai. Mi moi de ndai mungkan ga (Mtt 13:37) gaw Sumsing lamu a mungdan rai nga ai. Ndai mungkan ga hpe sumsing lamu a mungdan hku bai madu lu na matu, Masha ngu ai (sumsing staff) ni yu nna amu galaw ra ai. Dai amu gaw wenyi magam rai nga ai. Ndai amu galaw ai shaloi matsan mayan byin ai (tsing ni a lapran ntai nmai, jam jau ru tsang ai) hkrum na re da. Raitim, hpang jahtum e shanhte alu ai ngu ai kabu pyaw na, arawng lu na re ai da.

Hkristan ni wa nga na shara, "Sumsing Lamu a Mungdan" ngu ai bai madu la lu na matu, amu galaw ai gaw matsan mayan hte bung ai lam wunawng wuwa ting hpe ndau dat ai Hkristu a ga re ai. Hkristu shi sa du ai lam mung ndai Sumsingn Lamu a Mungdan gaw du magang ra ai, ngu ai hte, bai madu la na magam bungli hpang sai lam ndau nna du sa wa ai re hpe chye ra ga ai.

Matsing na madung gaw: 

1. Sumsing lamu a mungdan ngu ai gaw ndai mungkan hpe tsun ai.

2. Wenyi ngu ai gaw magam bungli hpe tsun ai. Magam bungli hpe tsun ai zawn, nbung hpe sin ai wenyi, nhkrum nra shangun ai wenyi, ngu ai hpan law law nga ai. Gumhpawn nna tsun yang, amu magam re ai.