MATSUN MAROI

Matsun Maroi: Shachyen ga.

Matsun- Ntsa kaw na Matsun ai bungli, n galaw nmai hpe shangun dat ai.

Maroi- Dum ai, awng sharawng kabu let dum nga shangun ai. Bungli galaw na hpe dum ai. Maroi ngu ai gaw dum ai, kabu let dum taw nga ai. Dai majaw, ntsa na Matsun ai hpe kabu awng sharawng let dum nna galaw nga ai.

Matsun Maroi ngu ai gaw, shawng ningpawt kaw nna (sumsing/ ntsa/ lamu/ mahtum mahta/ matsaw ningtsang) lahta de na Matsun ai hpe dum let awng sharawng ai hte hkan sa galaw gun hpai nga ai amu, sak hkrung nga pra yang lawm nang nga ai “Ningli” hkrang shala ai, “laika” shaga ai “GA” mung rai nga ai. Dai ga hpe kraw hta jahting yang Ningli nsam rawng ai majaw, Matsaw Ningtsang hte matut mahkai lu ai tai wa sai. Dai Ningli ga tsun shaga hkan nang galaw nga ai ni MATSUN MAROI hkan ai ni rai nga ma ai.  

Chyum Laika hta mu lu ai Israela amyu ni a Matsun Maroi gaw:- Karai Kasang a myit ra ai (Alat hpe shaw ai amu, Nli kaja hpe shaw la ai amu, Gumlau hpe dip dang kau ai amu, Matse hpe dip shazim ai amu, Yeruslem ningnan gawde ai amu  hte mungkan ga hpe ningnan shatai ai) amu hpe shabyin na matu, hkye hkrang la ai ngu ai de man yawng nna Karai Kasang nan hkan sa nang mat wa ai lam ninghpawt hpang dat ya ai Matsun rai nga ai. Matsun Maroi de a lachyum hpe Israela amyu shanhte ni nan nchye na ma tim, duk shamak hkan shangun ai “Matsun” re.

Dai majaw, Chyum Laika ting hta, jahkring hkring shut hpyit lam dam nna gashai gahprai ai sak hkrung lam hpe bai shading sharai pawn ba lam woi la rai nna Hkristan ban prat du hkra woi wa ai hpe mu lu ai. Hkristan ban prat du ai shaloi, Hkristan ni gaw Matsun Maroi hpe nmu lu mat ai zawn, dai lam mung nnga nga malu ai hpe mu lu ai. Hkristan ni gaw Kabu Gara Shiga hta pyaw nga nna “Chyeju shakawn ai” ngu ai ga si hta dik tup wa malu ai.

Jinghpaw ni kaw mu lu ai Matsun Maroi gaw, ningpawt hpang ai hta nlawm ai majaw magum bu ai daw hta je yang ai lam, lachyum shaleng ai lam ni kaw lawm nga ai. Ma hkra hpe lachyum shaleng let hpungdim kau ya na hpe mu lu ai.

Dai majaw, Jinghpaw ni a Matsun Maroi hte Chyum Laika a matsun lahkawng hkrum ra nga ai. Chyum Laika a matsun hpe Jinghpaw Matsun Maroi hte lachyum hpyan ya ra ai zawn; Jinghpaw a Matsun Maroi hpe mung Chyum Laika hte wa htai ya nga ai hpe mu lu ai. Ga shadawn: Jinghpaw htunghking num wawn num la ai shaloi lai ra ai kumba hte Yesu a hpang jahtum wudang ntsa e kumba lang da ai ngu ai lachyum ni matut nga ai. Bai, Yu Nga mayawn ngu ai hpe Jinghpaw ni lachyum nchye na tim galaw ra ai Matsun rai nga ai. Chyum Laika hku wa htai yang she, Yu Nga mayawn gaw “Original” hpe wa tsun ai lam mu lu ai. Ndai zawn re ai Matsun ni law law wa anhte Jinghpaw Wunpawng sha ni a htunghkring hta mu lu ai.

Chyum Laika hta rawng ai Israela ni a Matsun Maroi lachyum hpe Jinghpaw ni gun; Jinghpaw ni a Matsun Maroi hpe Israela ni gun rai nna ginrun ra nga ai lam hpe mu lu ai. Ndai lam hpe grau dan dawng ai hku, Yawhan a shingran laika hta shaleng dan nga ai. Ndai Matsun Lahkawng yu hkrat wa ai lam wa hkrum jang she Karai Kasang a amu magam magum bu hkyen nga ai hpe mu lu ai. Maga mi hku nna Ginru Ginsa, bai maga mi hku Matsun Maroi rai ginrun hkrat wa ai. Matsun Maroi gaw Ginru Ginsa hte nbung ai zawn, Ginru Ginsa mung Matsun Maroi hte shai nga ai.

Chyoipra ai Chyum Laika hta, Yesu Hkristu gaw Matsun Maroi ga shaga ai shi hpang jahtum rai sai. Chyum Laika a Matsun Maroi ga yawng gaw, Yesu Hkristu kaw htum mat sai rai nna, dai Matsun gaw Hkristan ban prat hta shu la dan la lu ai nsi nai si zawn tai wa sai. Yesu a prat e shaga lai wa sai Matsun Maroi ga ni hpe dai ni na Hkristan ni mung, Hkristan nre ai ni mung chye na na lam mi nnga nga ai. Matsun Maroi ga chye na ai ni chyu sha, de a lachyum hpe tawk hprut htai shaleng ya lu na rai nga ai.

Matsun Maroi ga law law hpe Jinghpaw htunghking Jaiwa ga, Hkringwa ga, Dumsa ga, Myihtoi ga ni hte Jinghpaw htunghking num wawn num la hkrang shala ai htung hta hkum tsup hkra mu na lu ga ai. Raitim, Matsun Maroi ga nchye ai ni gaw dai ga ni hpe htai shaleng ai shaloi, Matsaw Ningtsang Karai ni tsun shadum mayu ai lachyum hte shai ai hku mu wa chye la mai nga ai. Jinghpaw ga hta mu lu ai Matsun Maroi gaw Chyum Laika hta ka da sai hpe lachyum htai ya lu ai zawn, jahtum du hkra hkawm sa na ga ni mung rai nga ai.

Grau nna, Matsun Maroi ga ni hpe mungkan hpaji tsaw tsaw sharin la ai ni chye na hkawn hkrang na yak la nga malu ai. Matsun Maroi ga gaw Karai Kasang byin shangun mayu ai hta hkan nna ka da ai re majaw, shinggyim masha ni byin mayu ai hku htai la yang lachyum shai nga ai. Mungkan hpaji gaw shinggyim masha ni  byin mayu ai hta madung dat nga ai re majaw, ga kanu ni hpe htai la ai shaloi, tinang ra ai (wants), ra ai (needs) ni hta hkan nna htai la ga ma ai.

Ndai zawn re ai Matsun Maroi ga kanu ni, Chyum Laika ting hta hpring chyat rai nga ai hpe mu lu ai. Matsun Maroi ga a lachyum madung hku nna nrai yang, Chyum Laika daw nkau mi gaw lachyum npru ai hte akyu nrawng ai hpe mu wa na ra ai. Kaja wa, Chyum Laika hta ga si langai mi pyi di kau na nmai nga ai. Shing di kau yang, tinang mu chye hkawn hkrang ai hku lachyum htai la kau yang; Karai Kasang (or) ntsa de na ni hte matut mahkai tsun shaga ai shaloi, lachyum shai mat mai nga ai.

Matsun Maroi ga 

Matsun Maroi ga gaw Sumsing nna yu sa ai ni (or) Sumsing amu gun ai ni (or) Masha “original man” ni, Karai ni (Ju ni) hpang maga tsap ai ni a tsun shaga ai ga rai nga ai. Ntsang de na Mahtum Mahta (or) Karai daw ni hte matut mahkai kanawn mazum nhtawm, Matsaw ningtsang hte htinglu htinglai ai hta tsun lang ai ga re majaw, Jinghpaw ni a Nat jaw ai ten na htunghking ni hta mung Matsun Maroi ga hkrai pri rai nga ai. Shanhte Ju ni yawng gaw, hpung langai kaw na ni sha rai nna, galaw ai amu hte shatsam da ai lit nbung shajang nga ma ai. 

Ga shadawn: Ningpawt Ninghpang Laika kaw nna Yawhan a Shingran laika lapran ka da ai ten, shara, ka ai wa nbung hkat raitim, Matsun ai shara langai kaw na sha rai nga ai majaw, tsun mayu ai ga ni bung shanjang nga ai lam mu lu ai. Chyum Laika ting hta Matsun ai shara langai kaw na sha re majaw, ka da ai mahku nsen manaw ga si ni ga shaga da ai yawng mayawng hpe, dai ni na aprat e chye na lu na nmai byin ai daram rai mat sai. Htai dan ai wa pyi ra kadawn nga sai.

Ga shadawn: Myi hte seng nna tsun yu ga.

1.     N.N 3:7 kaw e, “dai shaloi shan a myi hpaw malu ai rai nna” nga nna rawng nga ai. Matsun Maroi hku nna myi hpaw ai gaw, yubak galaw ngut sai ngu ai hpe tsun nga ai. Ya mu ai myi gaw shawng na lam hpe nmu mat sai. Mungkan myi sha mu mat sai.

2.  Luka 8:8  "Na tu ai wa na la uga, Myi tu  ninglen nmu, na tu ninglen nna” ngu ai bai rai jang, Israela amyu ting (or) sumsing nna bungli shangun da ai masha ni gaw ntsa na matsun ai hpe nchye na hkraw ai ni ngu tsun shadum nga ai.  

3.     Mtt 13:14-15 "Myi mung nmu na mung nna ,re ai ni, ngu ai gaw Hkristu a mungga nhkap la lu ai shinggyim masha ni (gumlau wa a masha-tsing-Mu lamu n yu lu na hte, Na lana nchye na lu mu ga Mk 4:12) ni hpe tsun shading nga ai.

Matsun Maroi ga n shaga ai ni, nchye na mat ai ni gaw, Karai Kasang a gumlau wa maga aten na na nga mat sai shinggyim masha lai htung (Ginru Ginsa htunghking) masha ni rai ma ai. Rai timung, dai shinggyim masha ni kaw Karai Kasang hte seng ai SAI/ DNA rawng ai ni tsing hte gayau nna mam (nli kaja) hku tu nga ai re majaw, Hkristu a nsen na yang gayin wa ai SAI ni hpe hkye hkrang la ai masing kata Matsun Maroi ga nchye na raitim, Hkristu lajang da ya ai Hparadesu de du lu na ung ang shara gaw nnga nga ai. Sagu rem wa a nsen chye madat ai shi a sagu ni yawng wu lawng de wa marit ngu yang wa na mara ai, nga ai.

Jinghpaw Wunpawng sha ni Matsun Maroi lu ga ni?

Num jaw num ya hpu jaw hpu bang ai htunghkring hta Jinghpaw Wunpawng amyu sha ni Matsun Maroi lu ai hpe hkan nang hkan sa nga ai lachyum yawng hkum tsup hkra lawm nang nga ai hpe mu lu ai.

Ga shadawn: Hpa rai Yesu wudang ntsa kumba hpe jum shangun nna kumba yan hta ntsin hkri hpe hkyen jaw ra ata? Yesu a hkum tsawp hpe hpa rai lachyit sumpan hte hkayawp ra nna, Jinghpaw ni si yang lachyit nba hpun ma ta?Jinghpaw ni num nnan shalai yang hpa rai kumba hku lai ra a ta? Wa hkyi mahkrai ngu ai hpun katsing tawng yan mi hpe kumba ka-ang hku tawn nna hpa rai lai ra a ni? Yesu hpe jen da ai wudang gaw hpun katsing rai na a ni? Jahkraw rai na a ni? Hpa majaw hka e tu ai arai lang nna shaba nwawt ma ta? Hpa majaw mai aw hpe nlang a ta? Simun Petru gaw hpa rai nga 153 (Yh 21:11) hpe sha la ra a ta? Hpa rai yu nga mayawn hta nga jahkraw 2, yu jahkraw 5 hku lang ga ta? Yesu gaw hpa rai (Mtt 14:19) muk 5 hte nga 2 lang ra a ta? Jinghpaw Wunpawng ni a ntawng nhtu kadai jaw ai rai ta? Hpa rai manau shadung pawt de nhtu nhku zawn di ra a ta? Law law wa law law mu lu ai hta n ga, ndai law la ai ga san ni hpe Matsun Maroi gaw htai ya lu nga ai. Matsun Maroi mungga hku sha nrai yang, mahtai lu jaw na lam mi nnga nga ai….

Matsun Maroi ga gaw kaning nga ai ga rai?

Matsun Maroi ga                               Ginru Ginsa ga (gumlau maga na ni lang)

La hpawk dum ai                                       Ta hpawk dum ai                       

Shadum ga tsun ai                                    N gun jaw ga shaga ai                 

Gup chyawp chyawp ai                               Baw chyawp chyawp ai                  

Lu su ai                                                      Sut su ai                           

Ntsin                                                          Hka

Hpu-awn (hpa-awn, Ningshawng)              Ningbaw

Aja                                                             Gumhpraw ngu ai hku mu lu nga ai.

Matsun Maroi ga n shaga ai ni gaw, Ginru Ginsa ngu ai maga tsap ai ni, sumsing matsaw ningtsang hte matut mahkai ai htunghkring ningli kaw na dan kau hkrum ai ni, Kaji Kawoi htunghkring hpe kabai kau ai ni hte, prat dep hpaji laika hpe madung tawn mat ai ni, kaga ni a htunghkring hpe madu a zawn bau la ai ni, Jinghpaw a htunghkring ningli ni hpe yu kaji mat ai ni rai ma ai.

Karai wa gaw, Matsun Maroi ngu ai ga hte Masha ngu ai ni hpe matut mahkai matsun madun nga ai ngu nna mung chye na mai nga ga ai. Matsun Maroi ga tsun lang ai ni hta laklai ai atsam power ni law law sakse nga nga ai hpe maumwi mausa ahtik labau dumsa jaiwa ga ni hta mu chye lu ga ai. Lik Laika hte ka nna shaleng ai gaw nhkum tsup la nga ai law.