(Ndai labau mabyin hpe daw 6 garan nna tang madun mat wa na nngai).
Ref: The Baptist Missionary Magazine, Journal of Mr. Kincaid, (Vol. XVIII. November, 1838. No.11), p. 34, 266-271. (This article translated directly from its original texts).
DAW I.
Kakhyens Bum De.
Shana maga hkying manga (5:00pm) aten hta, Mandalay kaw nna hka li (boat) kaji langai hte Mali Hka ding yang hka hku de man yawng nna shap lung mat wa saga ai. Shana hkying sanit (7:00pm) daram hta, htinggaw sanit shi (70) dang nga ai Mali hka a sinna hkran (Ka-khon) mare kaw du shang manam ga ai. Mare masha ni law malawng Sam (Shyan) ni raitim, yawng hkra Myen ga chye shaga nna, law malawng Myen laika hpe chye hti chye ka ma ai.
Shana na shata hte shagan htoi ahkung ai kata hku mada shinggrup dat yang, dingdung maga tsan tsan e nip sani rai gran nga ai bum marawn (lofty hills) hpe mu lu ai. Dai bum gaw, Manmaw (Bamau) a sinna dingda jarit shingkrawn (bunghku) zawn gran nga ai. Ndai bum lagaw makau kaw, shaning hkying lam na sai mare dingsa bunghku hte shadaw ni bya ayai taw nga ai. Raitim, mare masha ni kadai mung ndai lam hpe ahkyak n shatai masai. Kakhyens amyu ni nga ai lam na she na ga tim, ya aten du hkra shanhte nga ai dum nta dinghput htingra mi nmu shi nngai.
Mandalay kaw na rawt ai kade ya nna yang, Kakhyens ni nga ai lamu ga de du shang wa sana rai saga ai. Kakhyens ni gaw, bum pungding de ndu, bum lagaw mung ndu re ai bum wa-hkrang kaw hkyen shakrin nna hkai sha chye ai amyu ni rai ma ai da. Raitim, mare hpe gaw, bum ntsa hkan de da ma ai nga ai. Shawng nnan mu lu na Kakhyens nta gaw, tsan tsan kaw na pyi Cubits 80 ram galu ai (1cubit=1.5 feet). Dai kaw nta lahkawng nga nna htinggaw (40-50) jawm rawng ai da. Dai mare hpe Duwa (chiefs) up nna, Duwa wa gaw Manmaw (Bamau) na asuya ni hpe hkanse kachyi chyi bang nna nga ai lam tsun dan ma ai. Kakhyens mare ngu ai gaw bum ting nta ni hpra ayai nna nga ai. Dai bum ting na mare masha ni mung Duwa ni a nta hta yawng hkyawm shang na daram sha rai ma ai.
Kakhyens ni nga ai nta gaw galu nna lasi gren rai nga ai. Nta galu langai hta dinghku (50-60) rau nga ma ai mung nga ma ai. Anhte ni Mali hka hku de shani lung mat wa magang, Kakhyens ni nga ai ginra ni hpe grau grau mu mada wa magang rai na rai nga ai. Mogaung garai ndu ai ten hta, ngai gaw ndai Kakhyens ni hpe hkrum ra sai, shanhte a nga sat nga sa htunghkring hte kyang lai sat lawat mung hka ja ra sai ngu ngai myit nga nngai.
Ga shaleng:
Jarit shingkrawn: Madin tawn ai shara, ga jarit masat.
Dinghput htingra: Shanu nga pra ai buga dum nta.
Bum pungding: Bum a tsaw dik ai ka-ang shara, (e.g Baw pungding).
Lachyawk mi: kachyi mi, (yi lachyawk mi hkyen, mam latup mi bang).
Jan pungding nga: Shani ka-ang hkying 12:00 lai re ai ten.
Hkau mawn: hku hkau, chye chyap ai.
Mung kang: Lamu hpungtang (Univers).
Rang rip ai: Roi jahkroi dang sha ai.
Shari madun: N gun madun, jahkrit shama rai grang da kat ai.
hka tang ai: Hka nsung ai, hka nau nhtat ai.
Gam ya: Manu shabrai nla ai sha tinang a rai hpe garan jaw ai.
Hpun jum: Wan ju hpun tawng jahkraw kaba ni.
Hka hpung gaw: Hka lam magaw ai shara ni.
Yin wa: Tinang a Yi hpe nta shatai nhtawm, htinggaw law law nga ai shara.
Tsun hka da ai: Ga tsun dawng daw ai, ga hpe htum hkra ntsun ai.
Mai byit: Si nat (or) pala lama ma hkra nna nsi ai pawt ka-un hkawm ai du sat matse.
No comments:
Post a Comment