Chyum Laika gaw, Yesu jen sat hkrum ai hpe “Yuda ni a hkawhkam” ngu ai ga a majaw re nga ai. Dai majaw, Ju hkrai re ai janmau shagup, maw hkyeng nsam nba lawai shangun di nna, shi a wudang ntsa kaw mung “Yuda ni ahkawhkam” ngu bai ka shakap da masai.
Dai lam byin wa hkra Yuda ningbaw ni tte Yeruslem shawa masha ni, Yesu a sape ni lajang dat sai. Shangai wa ai ten hta, Hpaji rawng ai ni gaw Yeruslem de sa du nna shangai wa ai ma a lam sa sagawn ma ai. Raitim, chyum laika (grau nna Mahte laika) gaw Yesu hpe Bethlehem ngu ai Davi a mare kaw she shangai ai lam gawn da nga ai. Hpaji rawng ai ni shut mat ai kun chyum laika ka ai ni shading la ai kun? Bethlehem gaw Davi a Buga rai nga ai majaw, Yesu shangai ai ten kaw nna Yuda ni a ningbaw tai wa na hte Davi hkawhkam a tingnyang hta dung nna Yuda amyu hpe shalawt la na re nga nna chyum laika gaw gawn dan taw nga ai. Lama na Yesu gaw Karai Kasang a kasha re ai teng yang, Davi a aru arat hku gawn dan ra na nrai nga ai. Ra mung nra ai. Dai majaw, Yesu hpe Yuda amyu ni a ningbaw rawt malan ningbaw n galaw ya ai mara hte je yang kau sai ngu ai hpe lawu na sak se nkau mi hku mu lu nga ai.
1. Roma du Pontius Pilate gaw Yesu hpe san jep yu nna, si na mara nmu wu ai majaw shawa masha ni hpe dawdan shangun sai (Marku 15:6-16). Dai aten hta, Yuda hpung ningbaw ni hte Yeruslem shawa masha ni gaw,“Barabbas hpe madaw dat nna Yesu hpe jen sat kau u” nga marawn ma ai (Marku 15:11 Mahte 27:15-31; Luka 23:13-25; Yawhan 18:38-19:16). Yesu hte galai la mayu ai Barabbas gaw kadai wa ta? Marku 15:7 hta lagut, damya galaw nna masha sat ai wa, mungdan hpe nru nra shabyin ai wa re nga ai. Roma hpe gumlang ai rawt malan amu hta tsap ai wa rai nga ai. Yuda ni gaw, Yesu hpe Meshia arawng aya jaw sai. Roma hpe woi gumlang nhtawm Karai Kasang a amyu (Yuda) ni uphkang ai Davi a hkawhkam hkringhtawng kaw na Yesu gaw Yuda amyu hpe shalawt la na ala mada yu ma timung, dai hku n galaw ai majaw Barabbas hte galai kau sai. Barabbas woi galaw ai mahtang madi shadaw na lam Hkinjawng ni Yuda hpung ningbaw ni kawn hkawt madi shadaw ma ai. Yesu chyawm gaw galoi mung ngai Meshia rai nngai ngu ntsun ai, “Masha Kasha, Son of Man” rai nngai nga ai. Meshia ngu ai gaw Hpyen gasat nna Davi a hkaw bai madu la woi na Karai Kasang a masha rai nhtawm, Yuda amyu ting hpe woi shalawt la na wa re ngu myihtoi ga hte maren hkam la da ma ai re.
2. Yesu hpe shanglawt amu lawan woi galaw na matu shi a sape Yuda Iscarut mung myit ndawt nga ai. Dai majaw, Iscarut gaw Yesu hpe dut kau ai wa tai nna, chyum laika hta Yubak amu galaw ai wa tai wa sai. Raitim, Iscarut gaw, shi myit ai hku nbyin wa ai majaw, yawn hkyen kaba hte sumri hta mahtang dau si mat nu ai.
3. Hpang jahtum shana ngu na Geseman sun kaw akyu hpyi nga yang, Yuda Hpung ningbaw ni hte Roma hpyen la ni Yesu hpe sa rim ai shaloi, Sape langai mi shi a nhtu shaw la nna Roma hpyen la a Na hpe kahtam di kau let hkap htim gasat ai lam chyum laika kaw mu lu ai. Yesu gaw, shi a sape hpe mahtang daru kau nna Na hpe bai shakap ya sai. De a majaw, sape ni gaw Yesu hpe hprawng kau da ma ai. Sape ni Yesu hpang hkan ai gaw, Karai Kasang a Sasana amu galaw ai hpung shingkang hta nrai, Yesu a hpaji hte hpring ai sat lawat, hkaw tsun sharin ai ga ni a majaw, Meshia mahkoi rai kun, amyu ting hpe woi shalawt na wa rai kun nga nna Yesu a hpang hkan ai ni she rai ma ai. Raitim, dai lam yawng hkra myit mada da ai hte kaga ga byin mat sai.
4. Yesu shi nan mung, sape ni marai (12) hpe sha san nna Yuda amyu (12) a gawng malai tai ai hku rawt malan ladat hte hpang ai sasana rai lu ai. Raitim, sasana galaw ai na wa magang Yesu a yaw shada ai Roma gumlang masing gaw hpyen hku nrai, hpaji rawng ai sak hkrung lam hte awngdang lawt wa na hpaji ga hpe shi hkaw tsun mat wa sai. Dai majaw, matsan dum hkat na mungga (Mahte 5) hpe bum ntsa na tara hkaw ga hku yawng a shawng e hkaw dan lai wa sai.
5. Yesu a sasana galaw ai ten law law wa Galile Ginwang hte nam kahtawng ni hkan rai nga lu ai. Dai lam yawng mung rawt malan amu gaw Palistina (or) mungdan a dingdung maga kaw nna shawng hpang hpang re ai labau lu nga ma ai. Yesruslem zawn re ai mare kaba du yang shi a hkaw tsun lam tang du na nre hpe mung shi chye da wu ai. Dai majaw, hpang jahtum hku nna dawdan ai gaw, asak hpe n lahpawt ai Yeruslem hpe shang hkaw wu ai. Raitim, shi a sasana n awng dang ai sha n ga, sat kau ai hkrum nu ai.
Myihtoi ni a ga hte maren nga yang, Meshia ngu ai wa gaw dinghpring ai masha ni ngwi ngwi pyaw pyaw rai nga lu na hkawhkam mungdan woi de na wa rai nga ai. Dai gaw, Yuda ni hpe shalawt la ai teng teng rai nga ai.
Yuda masha law law wa (grau nna Galile ginwang masha ni) gaw Yesu hta myihtoi ni tsun da ai ga dik wa sam sai kun, nga ma ai. Dai majaw, anhte ala nga ai Meshia du ra ai nga ma ai. Ndai hku kam wa ai masha grau grau law wa sai. Hkalup sara Yawhan mung Meshia gaw du magang ra ai, nga hkaw hkawm nga ai ten hte ang nga ai.
Yuda masha ni gaw Esaia 53 kaw na myihtoi ga hta la kap nna sawn la ai lam sha rai nga ai. Yesu hpe Meshia (Davi hkawhkam a aru arat) ngu nna mu ai shaloi, Meshia gaw majan woi dang nna hkawhkam mungdan gaw de na lam rai nga ai. Dai lam gaw, Roma hpe gumlang ai rawt malan woi galaw na rai nna, Roma ni hpe mungdan kaw na gawt shapraw kau na lam rai nga ai.
Ginchyum dat nna yu ai shaloi, Roma ni ndai lam chye ma ai. Dai majaw, kadai wa rawt malan wa ai, kadai wa gara hku galaw na ngu ai lam hpe myi n grip hkra yu nga ma ai. Yuda amyu ni hta rawt malan lam gaw Palistina mungdan kaw na shawng hpang hpang rai ma ai hpe mung Roma ni chye ma ai.
Yesu a sasana hpang wa ai shaloi, shi a hkum hpe Meshia ngu galoi ntsun nga ai. Shi tsun ai gaw “masha kasha” (Son of Man) rai nngai nga ai. Meshia ngu ai ga hpe lang jang tsang ra ai hpe Yesu chye na da wu ai. Raitim, shawa masha ni gaw Yesu hpe Meshia re ngu nna shawu nga ma ai. Dai majaw, Meshia du sai (rawt malan ningbaw paw pru sai) nga marawn nga ma ai. Ga shadawn: Mahte 16:20 hta, sape ni hpe Hkristu ngu ntsun na matu ginhtim da nga ai. (Hkristu ngu ai ga gaw Meshia ngu ai lachyum sha rai nga ai).
Raitim, Yesu a shamai shatsai ai, sharin achyin ai hte hpaji rawng ai kumla myu myu a majaw, shawa masha ni gaw Meshia re nga ja ja tsun wa masai. Masha wunawng wuwa mung shi a hpang e hkan nang wa sai. Grau nna Yeruslem mare kaba de shalai wa ai poi sa ai hta, mung masha lan lak hkan nang ai, hkap tau ai lam gaw Meshia du sai ngu ai shiga a majaw rai nga ai.
Luka 19:11, hku yu yang, masha law law wa myithtoi ni tsun da ai Karai Kasang a mungdan gaw du wa na sai nhten nga hkan nang bu nga ma ai. Ndai ten hta Yuda shawa masha ni Yesu a ntsa hkam la ai a tsaw dik madang de du wa sai.
Yeruslem de Shi du shang wa ai hpang, hkum hkrang lagaw lata hte hpawn ja ja pawt ai mabyin Yeruslem nawku jawng kaw byin pru wa sai. Makam masham hpung nkau mi gaw, mung shawa hpe kasu gabrawng byin wa hkra galaw hpang sai rai kun nga sawn nga ma ai. Nkau mi gaw Karai Kasang a ra sharawng ai hpe shadan shadawng nga ai kun ngu mung myit nga ma ai. Raitim, chyum laika hku yu yang, Shi a hpang jahtum nhtoi du wa sai hpe madun nga ai hku hkai da nga ai.
Hkraitan ni law law wa Yesu a si hkam ra ai lam gaw Yuda ni a majaw re ngu mara rim dan masai. Raitim, chyum laika nkau ni hta Yuda ningbaw ni gaw Yesu hpe hpung ningbaw tai wa na makran nga ma ai. “Hkinjawng agyi ni hte laika ka ai sara ni, dai na ma yang, shi hpe sat kau na lam tam ma ai: kaning rai nme law, mung masha ni nlang shi a sharin shaga ai lam hpe mau mahka nga ai majaw, shanhte gaw shi hpe hkrit da mu ai” Marku 11:18.
No comments:
Post a Comment