Titanic hte Tara Hkaw Sara

April shata 14 ngu ai lana mi na lamu san tsawm nna shagan mun sen pripla nga ai shingnip kata hku, mungkan hta kaba dik ai sanghpaw Titanic gaw myit sim myit sa let hpum nga ai Atlantic nammuk dara ntsa hku n gun kaba hte lai denghkren mat wa nga ai. Sanghpaw ntsa jawn nang nga ai ni law malawng, tinang a yup gawk ni hta shara la nna myit mu myit hkut dik let pyaw ngawn ai arawng namchyim hkam sha nga ma ai. Shana 11:15 ten hta, saboi ntsa hkan na gawm ni garen kadawng nna sanghpaw mung ashun awam wa sai. Raitim masha law law wa yup hkring sa nga ai majaw kadai mung ndum shamyi rai nga ma ai. Garai n yup shi ai ni gaw dai lam mu dat ai hte, hpa wa byin sai kun, chye mayu wa masai.

Sanghpaw lai wa ai panglai hka kata hku hpri zawn zawn magren nna hpum dung nga ai hka ge lungrawk hpe gaw kadai mung ndum myit nga ma ai. Sanghpaw mung n gun wa ngan dat let shawng de chyang lu ai daram gat nga ai. A kajawng sha wa a dawt dat ai hte rau, sanghpaw garep shakum htap hte htap hpe malawng kau ya manu ai. Sanghpaw captain gaw minute 15 na yang she, shi a sanghpaw garep baw sai lam dum wu ai. Dai majaw, shi a nsen htawn jak garawt la nna, hka rang ginjaw de nga ai ni hpe lawan sa hkye na matut shakut nga ai. Sanghpaw kaw lawm ai asak hkye li kaji ni hpe lawan shayu nna num hte ma ni hpe shawng hkye na mung matsun nga ai. Raitim, dai li kaji gaw jawn nang ai masha 1/3 hpe sha lu woi pru mat wa nga ai. Jak sara engineer 85 mung jut shara shagu mada jahproi nna sanghpaw hpe hkye na jawm shakut dam tim, nmai byin mat sai. Dai sanghpaw hta nnan sha hkungran ngut nna Honeymoon hku zum 12 mung lawm nang nga ma ai. Num nnan ni yawng lawt nna la nnan langai sha lawt lu ma ai.Shanhte a hkam sha ai salum nsen gaw, dai ni du hkra ngoi kadu nga ai.

Ang sha-a, sanghpaw kaw lawm nang nga ai shawa kaw, music madum chye shangawn ai ni lawm nga ma ai. John Hamper ngu ai tara hkaw sara mung lawm nga ai. John gaw kru ning re ai shi a kasha hpe asak hkye li de shajawn dat lu tim, shi nan gaw akyu hpyi, tara hkaw, music hpung hte hpawn, myit kaji garen nga ai ni asak nlawt dam tim Wenyi lawt na lam myit n gun jaw nga wu ai. Jahkring rai yang music gaw “Madu hte a ni sha nga” ngu ai nawku shakawn mahkawn hpe dum shapyaw nga masai. Nkau mi madat lawm nna Wenyi n gun lu la mayu dam tim, panglai kata lup wa hkyen nna shamu shamawt nga ai sanghpaw a makan gumlan nga ai majaw mung, masha law law numla dam nna asak nrawng ai zawn ma hkawm ai ni a majaw mung myit hpe nlu shazim nga ma ai. Kaja wa sha jahkring rai yang shanhte yawng hpe panglai hka e magawn la kau manu ai. Asak mung jaw kau manu ai.

Jahpawt daw April 15,1912 hta Titanic sanghpaw kaba gaw panglai kata de asim sha lup makoi mat wa sai. John Hamper mung lup si mat ai masha 1522 hta langai mi rai nga ai. Music hpung ni yawng zim mat sai. Shanhte hpang jahtum dum shapyaw ai gaw  ‘Autumm’ ngu ai akyu hpyi ga rai nga malu ai.

Hold me up in mighty waters
Keep my eyes on things above,
Righteousness, divine Atonement,
Peace, and everlasting Love.