N Shung shari wai nna ginhtawng sama galai wa yang, Japan mung ting nsam hkum ai nam pu nam pan kaji kaba ni shara shagu pu tsawm wa nga ai. Raitim, hpa baw gaw mai gaw sha, labau jit na wa ntsawm ai kun? Pu tsawm nga ai nam pan ni hta manam pyaw ai sama mi nrawng, maisau nampan zawn sha pu sumbyau nga ma ai lam ndau dat nngai.
Myitkyina, Nawngnang nhkai bum lagaw grup yin, jaw bum makau mayang Ubyit Alam, Dumgan du hkra kumgyin si hkai yang ntu ai mau mwi na ga ai. Danai Hugawng maga, Danai mare kaw nna Danai hka hkan lung wa yang, Hpayang Bum grup yin chying lap hkai yang ntu hkraw ai mau mwi mung na ga ai. Kaja wa mung dai hku mu kau da yu ni ai.
Japan mung hta pu tsawm nga ai nampan ni gaw sama nrawng ai majaw, u numji ni nsa, palam la mi n lagra, lagat mung n gawai, masha mung n sharawng ai. Myi hte yu nna tsawm ai lam hkam sha ai san san sha re. Hpa majaw dai hku byin ai kun? Sama nrawng ai nampan pu ai zawn salum nrawng ai masha mung law la ai. Tinggyeng myit hpe shaja nseng ai masha hpe ntsaw ra, tara hpe sha hkungga myi hte yu nna nchye shaga ma ai. Shinggyim lai gaw nnga, wuhpawng hku nga pra ai ladat hpe sha hkungga nga ma ai. Dai majaw, masha nkau mi sat si na ntsang, matut nga pra na n myit mang ai law law re lam shawng na ga baw hta ka da ni ai.
Ndai March shata kaw nna May shata du hkra pu tsawm nga na nampan ni gaw aten du nna pu, shingra tara e lajang nna tsawm ai she rai na sai. Ndai lam myit nga yang, shinggyim masha ni gaw shingra tara manu dan ai lam tsun gara nga tim; kalang ta dai shingra tara mabyin ni gaw masha hpe akyu njaw ai lam hpe mung sharin la nngai. E.g lwi ai hka shi, ing ai hka htung hkan na hka san ni gaw lu lang na matu grai hkrak ai nga nna masha law law wa tsun kajai dam tim, hpun tang hpaji hku yu ai shaloi, hka hpe n jasan kau ai (raw water) gaw hkum hkrang a matu hkrit hpa re lam mung dakkasu hpaji gaw sakse hkam nga law.
No comments:
Post a Comment