Hebre Chyum Laika hta htam masum na htam mi gaw Ga Shagawp/Ga Malai ni hkrai rai nga ai. Dai ga shagawp ga malai ni gaw masha a bawnu hta matsing gun da loi nna sawn shachyaw htai la manu la nga ai. Moi na myihtoi ni gaw, ndai zawn re ai ga si ga ngau ni hte sung dam ai lachyum ni hpe ga shagawp ga malai ni hte shadan dan lu ma ai majaw, dai ga ni hpe masha shagu matsing loi ai, chye na lawan ai hte zumhting da nna Chyum Laika hta ka bang da masai.
Ga shadawn: mishpat (justice) rap ra ai lam, mispah (bloddshed) du daw sai hkaw ai lam, tzedaqah (righteousness) dinghpring ai lam, hte tze'aqah (a cry) hkrap ngu hkrap ngoi lam, hpe Esaia 5:7 ni hta mu lu nna; shaqed (almond tree) jau jau pu ai hpun lakung, shoqed (watching) mu mada ai lam hpe Yeremia 1:11-12; qayitz (ripe fruit) myin ai namsi, qetz (time is ripe or end) myin ai namsi ka Amo 8:1-2; heletikhah (I have burdened you) jahki shaba ai, he'eletikhah (I brought you up) shapraw la ai wa, ngu nna Mihka 6:3-4 ni hta mu lu nga ai.
Kaga daw ni hkan mung ndai zawn re ai ga si ga ngau ni hpe Chyum Laika a kri paw hku nna jai lang nga ma ai. Ga shadawn: Shakawn kungdawn 1:3 hta, hka kau e hkai ai, shi a aten hta asi si nna, alap mung nnyip ai ahpun hte bung ai lam; Esaia 55:12 hta , nanhte gaw kabu gara let pru wa nna, ngwi pyaw ai hte woi wa ai hkrum na myit dai; bum ni hte kawng ni, nanhte a man e, mahkawn mangwi ai nsen hte garu nna, nam mali na hpun ni yawng gaw, lahpawk dum na mara ai, nga ai. Shakawn kungdawn 98:8 hta mung, hka ni lata lahpawk dum mu ga, bum ni gaw kabu let garu nga mu ga nga ai. Shakawn kungdawn 17:9 hta, ngai hpe na a singkaw shingnip npu hta ka up da ya e, Shakawn kungdawn 114:6 hta, bum ni sagu la zawn, kawng ni sagu kasha zawn, rai nga ai. Shaloi, sumsing lamu gaw Karai Wa a hpung shingkang gawn dan nna lamu madin gaw, shi a lata amu madun ya nga ai Shakawn kungdawn 19:1. Ndai lam hte kapyawn nna, Yesu mung Yeruslem mare de shang wa yang tsun ai ga hta 'Ndai ni atsin sha nga yang, nlung ni jahtau na rai nga ai' nga ai (Luka 19:40)
Hebre ga shagawp lai masa hta, kalang lang ga si hpe bai tsun kahtap kahtap di nna lawan ladan galaw shangun ai lam ni lawm nhtawm; kalang lang galu galang tsun anyam taw ai ten ni mung nga chye ma ai. Dai lam yawng mung Chyum Laika kaw dan dawng nga ai. Raitim, ndai lam ni hpe, Chyum Laika ga gale ai shaloi, hkrup chya jaw hkrak madat pyaw hkawn hkrang wa hkra nbyin wa lu nga ai. Dai majaw, Chyum laika Ga Shaka Dingsa ni hpe chye na na yak ai lam byin pru wa sai.
Ga shadawn: Tara agyi Laika 5:26-27 hta Sisera hpe sat kau ai lam hpe yu ga; Dai sum mailak shi la nna, hkra lata hte nan batbau lang let Sisera hpe adup nna shi a baw hta dit jung ya wu ai, rai sa waw hkrang hkra dit dinghkren ya wu ai; Yaela a lagaw nhpang e shi dagup nna gadawng mat sai, nga ai. (Jinghpaw chyum laika kaw lachyum nau n hpyan ai hpe sharai ka da nngai).
Myihtoi Nahum hku nna, BC 612 hta Babelon a htim gasat ai majaw Ninewe mare hten bya mat ai lam hpe sai hka lwi ai shingnip shingnang ngu ai ga shagawp hpe ka da sai. (Sai jahkaw ai mare gaw, dingnye lu uga, masu magaw hte adip arip dai hta hpring chyat nga ai: shi tut nawng shan amya sha nga ai. Lasik hte kayat ai nsen, leng ni chyai ai nsen, gat chyang ai gumra, tanglawt ai hpen leng ni a nsen law! Gumra jawn ai ni htim nna, tu gala ai nhtu hte, kabrim la ai ri tu majaw sat kau hkrum ai ni law nga nna, si mang ni sumpum nga ma ai: si mang ni mana maka law nga ai majaw, lai wa ai ni dai hta ahtu kataw nga ma ai (Nahum 3:1-3).
No comments:
Post a Comment