Hkungran ai hpang na tsaw myit [Love After Marriage]

Tsawra na matu hkungran la ai lam na ga nni? Sinna mungkan hta dinghku de ai gaw tsawra na matu re da. Chyum laika prat hta, Hebre ngu ai amyu ni gaw, Sinpraw mungkan e she nga tim, tsawra ai lam hpe singgyim wuphpawng hta laklai ai hku shachyen ya nga ma ai. Tsawra ai ngu ai gaw jaw ya ai lam re ngu ai hpe hkam sha ai hta grau ai ningli namnak hpe madun dan ma ai. Marai langai mi a myit mang lam hpe kaga langai kaw shakap da lu yang, dai gaw hku hkau ai hta grau nga ai. Myit masin lum nna Kraw hpe shim lum dum shangun ai hta mung grau nga ai. 

Yuda htung kaw tsa ban law law wa, hkungran ngut ai hpang tsawra hkat lu na ginjang mung, myit shapraw gyin shalat nna jai lang masai (N.N 24:67). Isak gaw Rebekah hpe madu jan hku sum hta jashawn la ai hpang she shi hpe tsawra wu ai ngu ai lam rai nga ai. Dai majaw, Hebre amyu ni hta hkungran ai hpang tsaw ra ai ngu ai ga byin wa sai. Dai majaw, dai lam gaw Sinraw ka-ang mungdan ni de chyam bra wa nna, hkungran la ai hpang tsawra hkat ai ngu ai shinggyim wuhpawng a sak hkrung lam hpe gyin shalat nna jai lang mat wa masai.

Raitim, Sinna modern prat hta gaw, ntsaw ra yang nhkungran na, ngu ai hpe grau madung tawn nna; hkungran ngut ai hpang gara hku grau tsawra hkat hkra nga na ngu a hpe gaw, myi npu na ladi nmu di kau ma ai. Dai majaw, hkungran ngut ai hpang mung, garai nhkungran yang mung tsawra lam gaw ahkyak ai lam de myit mang hkrawn du wa sai. Dai hpe HKristan dinghku de ai ngu nna mung lachyum hpyan shakut ma ai. Ratim, Chyum laika hta rawng ai hte maren hkaw tsun ga nga yang gaw, dai lam hpe madi shadaw ai chyum ga nnga nga ai. Myit hpaji sara Walter Trobisch, shi ka ai laika I love a Girl, ngu ai hta Sinna hte Sinpraw mungdan masha ni a lapran shai hkat ai lai hpe npawt nna htawng madun yu nu ai. Shi hku nna, hkungran ngut ai hpang na tsawra lam gaw ahkyak ai lam sakse madun mayu wu ai. Shi a ga shadawn hta: katsi ai lu sha hpe kahtet ai wan hte shadu dat yang gau ngwi kahtet nna hkut wa ai, dai hpang katsi ai hka wan hta bai bang dat yang gau ngwi katsi wa ai" nga ai. Tsawra na matu hkum sai kahtet wa ra ai, raitim kahtet ngut ai hpang kung ai myit masin hte dai hpe jai lang lu ra ai, ngu ai lam rai nga lu ai.