Labau Hpe Kam ai Hkristan (Christians believe history)

Hkristan nawku hpung gaw labau hta kam ai ni re ngu nna hpang mayu nngai.  Ga shaka dingsa mi rai rai, Ga shaka ningnan kaw ka da ai lam mi tsun tsun, ma hkra gaw labau ginshi hte matut nga ai. Dai ni hkaw tsun ai hpe dai ni ka matsing da ai langai mi mung nlawm ai. Myi htoi ni tsun ai ga, tara agyi ni, hkun janwg ni, ningbaw tai ai Moshe, Arun, Yawshu, Davi hte Showlamun kaw nna Yesu du hkra shanhte a hkaw dan ai mungga, sharin achyin ai ga gintung ni hte ga shagawp ga malai, yawng hkra gaw labau hku nna byin wa ai lam hkrai rai nga ai.

Ndai hte seng nna lam lahkawng hku nna Hkristan gaw labau hku nna byin wa ai lam re ngu ai  hpe madun dan mayu nngai.

1. Kasa Pawlu kaw nna Hkristan makam masham hpe mu tam ai lam: 

Kasa Pawlu gaw, Hkristan makam masham lai law law hpe Yesu a si hkam ai hte bai hkrung rawt wa ai mabyin hta shatai shamyet nna hkristan makam masham hpe shalat da nu ai. IKorin 15:3-7. 

Kaning rai nme law, ngai hkam la sai lam ngai nanhte hpe shawng na lak e ap ya ma sa de ai; dai gaw, Chyum laika ni tsun ai hte maren, Hkristu gaw anhte a yubak a matu mara si hkam sai; makoi mayang ai shi hkrum nhtawm, Chyum laika ni tsun ai hte maren, masum ya nhtoi hta e bai hkrung rawt wa sai rai nna, Kehpa kaw paw pru dan wu ai; dai hpang e sape shi lahkawng kaw paw pru dan mu ai; dai hpang lang lata sha hpu nau manga tsa jan shi hpe mu dat mu ai: shanhte hta malawng maga ya du hkra a nga shajang nga ma ai; nkau mi chyawm gaw yup pyaw mat ma sai; dai hpang Yaku kaw, dai hpang kasa ni yawng hte kaw, shi paw pru dan mu ai nga ai.

Kasa Pawlu tsun nga ai madung gaw: Si mat ai wa bai hkrung rawt wa ai lam n nga yang gaw, Hkristu mung bai hkrung rawt wa na n rai. Hkristu gaw bai n hkrung rawt a yang gaw, an hte hpe shi hkaw dan ai ga kaman lila rai nga ai hte, nanthe a makam masham mung kaman lila sha rai nga ai; dai hta kaga, Karai Kasang a lam hta masu ai sakse ni anhte tai wa na sa ga ai; rai ti mung , si mat ai ni teng teng bai  hkrung rawt ma yang gaw, Karai Kasang shi hpe hkrung sharawt wu ai  (IKorin 15:13-15).

Dai majaw, Christan Kabu Gara Shiga gaw Yesu a si mat ai lam, lup makoi ai lam hte bai hkrung rawt sai ngu ai a lapran labau npawt jung nga ai. Dai majaw, Hkristan makam masham gaw ndai zawn Yesu a si ai, lup makoi ai hte bai hkrung rawt ai ngu ai labau hta jung taw nga ai. 

2. Hpung a yin la ai ga shaka:

Hpung ni yin la ai ga shaka hta mung, masum raitim langai ngu ai hpe hkam la ra nga ai. Kawa, Kasha, Chyoipra ai Wenyi gaw masum raitim langai re, ngu ai tara or hkam la shangun ai ga shaka hta madung taw nga ai.  Lama wa ndai lam ni gaw maumwi zawn kraw hta pru wa ai hpe ka da nna hkan sa na shadut da ai rai yang Hkristan makam masham gaw tsang ra ai lam nga nga ai.

Dai majaw, ndai lam hpe sung sung sawn tam gawn yu na matu lam lahkawng nga nga ai.  Dai gaw, Yesu a sak hkrung lam mabyin hte Kabu Gara shiga laika mali ting hta ka da ai hpe dinglik yu ra nga ai.  Ndai lam lahkawng hta ginju nna nawku hpung hte kam sham ai hpun da hpe gaw de wa ai lam rai nga ai. Nawku hpung gaw Yesu a sat lawat hte Kabu Gara shiga laika mali hta ka da ai hpe hkrang shapraw ai shaloi, nawku hpung ni langai hte langai hkam la ai nbung, mu mada ai nbung shajang nga ai majaw hpung nbung ai hte makam kri dung nbung ai lam ni mung law law mu lu na ga ai.

Lam mi hku bai yu ai shaloi, Hkristan makam masham gaw Augustine, Sextus Julius Africanus, Eusebius, Isidore of Seville hte Venerable Dede ni a Hkristan sak hkrung lam ngu ai hta mung npawt jung nga ai. Shanhte a myit jasat ai makam masham gaw dai ni na shinggyim wuhpawng a matu gara hku akyu pru nga ai kun? Yesu si hkam ai lam gaw anhte a yubak a matu mara re ngu yang, dai ni na ramma ni anhte ganing rai nna yubak lu ga ta? gara hku lu wa ai ta? san htai ai hta myit dik lu na lam nmu lu nga sai.