Israel Labau SAGA [BC]

DAW II

Israel ni a ningbaw tai ai Yawshu, Moshe zawn re ai ni hpe Karai Kasang Yaweh nan lata san ya ai hku hkam la nga ma ai. Hkanan mung de nnan du shang wa ai ten hta nlaw la ai myu kaji mung tai, machye machyang mung nau nnga, kam sham ai mung lamu de nmu lu ai Karai Yaweh rai nga ai. Hkanan kaw madu nga sai ni gaw Baal [Bala] nawku ai ni mung rai, kung kyang ring chying sai shinggyim wuhpawng nga nna ningngai nga sai ni hte hkrum ra hkat hkra 'adaptation' gunrun kanawn mazum lu na shakut ra nga sai. Dai re majaw, nkau mi Bala de nawku lawm mat ai mung nga masai.

Raitim, mayak manghkang kaba gaw dai nrai; makau grup yin de na htim shang nna lamu ga maden wa wa re ai hpyen ni hte she rai nga malu ai. Dai majaw myit mang hkrum nna kahkyin gumdin let dai hpyen ni hpe gasat kau lu na lam ahkyak madung rai nga ai. Hpyen ni hpe gasat kau lu na matu gaw hpyen hpung hpe up na du, monarchy or hkawhkam ni ra wa sai. Dai majaw Shawlu, Davi, Shawlamun zawn re ai hkawhkam ni hpe hpyen gasat ninghkring share shagan du awn ni hku jawm lata da masai. Shawlu gaw [BC 1033-1011], myihtoi Samuela shagrin ya ai shawng na hkawhkam rai nga ai [Samuela 1]. Raitim Gilboa majan pa kaw si mat sai. Shawlu a kasha Ishbosheth hkawhkam galai ra ai raitim, Davi ngu ai Belehem [Yesu shangai ai] mare na shabrang wa mung Yuda mungdaw a matu hkawhkam tai na htap htuk ai ngu mu mada nga ma ai.

Ahkrang ahkrai Ishbosheth wa a kajawng sha bai si mat rai yang gaw Davi a matu Israel a hkawhkam tai na chyinghka kaba hpaw wa sai. Davi gaw Yeruslem hpe dang la na, dai kaw Yaweh Karai hpe tawn da na grai makun da wu ai. Davi gaw mayak mahkak hkrum dik ai hkawhkam mung rai nga ai, raitim shi a lakhtak hpe masha yawng ra sharawng ya nga mu ai. Davi zawn re ai aru arat kaw na hkawhkam gaw amyu sha hpe teng sha shalawt la na makam hpe jaw da nu ai. Shi si ai hpang kasha Shawlamun [BC 971-930] laman masha yawng chye ai, dan hkung ai mau hpa hpaji byeng ya hte mungdan hpe uphkang sai. Raitim, maigan shayi sha law law hpe zing madu da ai majaw, Kasha Yehobom [Jehoboam] hte hpyen du kaba Yerobom [Jeroboam] aten e gaw, Yaweh Karai wa Israel mungdan hpe daw lahkawng di nna garan kau sai nga nna sharin la masai. Ndai mayak byin nga yang myithtoi hte sara ni rai nga ai Elijah, Elisha, Hosea hte Amos zawn re ai ni mung paw pru nna shi a shara hte shara hkaw tsun masai.

Ya, Yuda mungdaw hpe gaw Davi a htingnu ngu masat tsun tim, lahta daw hpe gaw Israel ngu nna nru nra re ai hpyen du ni uphkang nga sai. Yuda hte Israel yan gaw BC 800 du hkra pyaw nga lu ma timung, de a hpang e gaw mungdan ahkyep alep, dumbri dumbra bai rai wa sai. Mabyin gaw ndai hku: Israel daw de Yehu gaw Yuda daw na lai lang nna rawt malan hpang wa sai. Yuda daw de gaw hkawhkam shayi tsadan hkalung Athaliah, Ahab hte Yezebel a shayi sha wa, hkaw seng htingnu na yawng hpe sat kau nna kru ning tup up nna, Yeruslem e sanit ning re ai Yehoasha [or] Joash hpe hkawhkam dang ai ten du hkra rai nga ai. Shingrai nga ai ten Egutu mung gaw n gun kya magang wa nna, Assyria ni gaw n gun ja hpang wa ra ai. BC 745 du wa yang Assyria ni gaw hpyen atsam hte shamu hpang wa sai.

Shingrai Israel daw na ni gaw kalang lang hkungga la ra madun, kalang lang gaw akyang madun rai taw sai. Raitim, Yuda daw na hkawhkam hkalung Ahaz gaw Assyrian hkawhkam hpe hkungga jaw myiman la nna loi naw nga pyaw nga ma ai. Shaloi, myihtoi Hezekia gaw Ahaz a hpang hkan ai zawn rai nna, Assyria hpe gumlau na matu Myihtoi Esaia tsun ai hta hkan nna shamu shamawt wa sai. Shaloi, Assyria ni gaw dai zawn gumlau ai ni hpe hkan tam ai nga nna BC 701 ning hta gaw, Yeruslem de du shang wa nna 75 ning tup dai kaw nga nga masai. Dai hte maren, Yuda hkawhkam wa hpe Assyrian hpara nawku na matu mung shadut shagyeng hkrum masai. Raitim, BC 630 hkan gaw Assyrian ni bai n gun kya wa masai.

Dai majaw Babylon ni gaw Assyrian ni a mare daju Neniwe [Ninevah] hpe zing madu la kau ya manu ai. Shingrai Assyria ni n gun yawm nna gawng kya mat wa ai hte, Yuda daw na hkawhkam Yoshia [Josiah] gaw Assyria hpara sumla ni hpe la kau nna mungdan masha ni hpe Yaweh Karai hpang de gayin nawku na woi awn dat nu ai. Raitim, langda hkalung Egutu gaw ndai ru jung nngang shi ai Yuda daw hpe shang zing la na ahkaw ahkang hku mu nu ai. Dai majaw BC 603 hta Pharoah Neco gaw Assyria maga sinda shachyen lung wa ai hte Yuda hkawhkam Yoshia hpe mung lai let maret sat kau da nu ai. Raitim, Yoshia a kasha Yehoiakim [Johoiakim] hpe gaw Yeruslem e naw shadun kau da wu ai.

Ahkrang ahkrai, dai ten hta Babalon kaw Nebukhaneza wa grang dakat nga ai majaw, lung wa ai Egutu Neco hpe hkap shingte kau manu ai. Babalon ni gaw Neco hpe hkap sat kau lu ai hte nngut; Yeruslem e Neco hkaw shadun da ai Yuda hkawhkam hkalung Yoshia a kasha Yehoiakim hpe mung wa sat kau manu ai. Dai shaloi jang nan, Yeruslem na myihtoi Daniela ni hte hpawn, n gun ja hpaji chye ai masha yawng hpe Babalon de shaga la kau nna Yeruslem hpe shakrin brang lang lakan hku tawn kau da masai. Tsam mari hkawhkam Yoshia a kasha Ma La mahtang Zedekia she Yeruslem e ntai nmai rai hkaw dung ra nu ai. Zedekia mung Yeruslem e Nebukhareza a man hta gumlau zawn bai rai taw nga sai. Dai majaw Yeruslem hpe shata 30 yu jahproi yu nhtawm, Zedekia hpe mung sat kau nna kasha hpe mung myi achyaw baw kau, ta gyit shingkuk nna dun mat wa sai sha n ga, Yuda daw na nawku htingra ni yawng jahten kau da nhtawm masha law malawng hpe Babalon de bawngdung na woi mat wa sai rai ng ai. Dai shani gaw, Davi hkawhkam a shingkang shingwang htum mat sai nhtoi rai nga malu ai. Shingrai Babylon mung e rim la hkrum ai ni hpe gaw mayam shatai, bungli shangun, ra ai shara shagu hta akyu jashawn nga ma yang, Yuda masha ni a sharung shayawt ai nsen gaw hpungtang she gadu nga na sai law.

Yeruslem gaw BC 586 hta atsai awai nyawp rap hkrat sum mat sai. Karai Kasang nan Abraham hpe jaw ai myit mada lam htum sai. Rai yang labau gaw lama mi bai byin nna pru wa ra ai. Babalon hkawhkam hpe wa mi htingbu mungdan rai nga ai Ammonites ni e she bai sa sat kau ya manu ai. Shaloi Babalon e mayam hkrum nna nga nga ai Yuda masha ni gaw Egutu mung de Yeremia hte hpawn hprawng pru mat masai. Shanhte ni Babalon e nga yang mayam bungli hku nna mare kaba gaw de ai, mahkrai shachyaw ai, wut ju ai hpaji lu la sai ni lawm nang mat wa nga ma ai. Mayam bungli galaw ai ten raitim; mying shamying ai, Yaweh mying tsun ai hte kaga masat masa hpun dagraw ai ni gaw a galaw nga ma ai. Nkau mi tsun ai, Yuda masha ni mungkan de chyam bra hpang ai gaw ndai aten kaw na hpang sai nga ma ai.

Chyum masa hku nna mung, kalang mi bai hpan ai amu [Hpan da mau mwi] gaw ndai aten kaw na she bai hpang ai nga nna tsun nga ma ai. Ga kata panglai grup yin lahta hte npu daw ni de mung chyam bra mat wa masai. Dai hku chyam mat wa ai Jews ni gaw Yuda daw de nga nga ai ni hpe ram ram n ju ndawng ai myit rawng ma ai. Hpa majaw nga yang, shanhte dai hku Babylon de bawngdung mat wa ai a ru npawt gaw Yuda daw na ni a grang ai lai a majaw katut sha sai rai nga ai nga nna nri bu ai rai nga ai. Ndai lam byin ai gaw Persian ningbaw Cyrus BC 539 hta Babalon hpe up la kau lu nna dai mungdan na Jews amyu ni hpe wa na ahkang jaw ai majaw Persian ni up ai ga kata panglai grup yin hkan Jews ni du nga mat wa ai rai nga ai. Persian ni gaw Egutu mung hpe du hkra BC 525 hta madu la lu masai.

Cyrus si ai hpang kasha Darius I, gaw kawa a hkang galai nna Yeruslem hpe Jews ni angwi apyaw nawku daw jau nga lu na ahkang jaw da wu ai. Myihtoi Nehemia gaw Cyrus a kashu Artaxerxes I, Darius a kasha, a tara rung kaw amu gun nga ai. BC 445 hta Yeruslem de wa nga na ahkang Artaxerxes kaw na lu la ai majaw, Yeruslem de bai wa nna bunghku gaw gap ai lam woi awn galaw sai nga ai. Dai sha nrai Yuda daw Yeruslem grup yin [mile 1000] hpe up hkang na mungdu asuya lit hpe mung gun hpai na lit jaw hkrum wu ai. Raitim, Nehemia gaw hpaga yum ga lam hte mare bunghku gram lajang na lam hpe hkaw tsun woi awn da nna Parsia de bai wa nna rung lung nga ai. Raitim, BC 443 hta Yeruslem de bai nhtang wa nna, Samari hte Ammon htung lai ka-up hkurm ai kaw na ningdang kau ra ai lam bai wa woi awn ra nga salu ai. Ndai manghkang gaw Yesu shangai ai ten du hkra byin ai manghkang Yuda hte Samari nga nna ngam nga sai rai nga ai.

Israel Labau SAGA [BC]

DAW 1

Chyum laika kaw na Israel amyu ni a labau lasang lam hpe chye la lu na ningpawt madung langai byin pru wa sai re. Labau dai gaw Karai Kasang hpe kam sham ai ngu ai wuhpawng loi sha mi a shingnip shingnang langai sha gaw rai nga ai. Raitim, Israel amyu ni a labau gaw dai makam masham lam hte makyit mahkai nga malu ai.

Kaja dik ai Israel ni a labau gawn ga nga yang chyum laika kaw na nan rai ra nga malu ai. Hpa majaw ta? lahta e tsun ai kam sham ai wuphung loi mi a sak hkrung lam gaw dai labau hpe shabyin dat sai. Ga shaka dingsa chyum laika hta Karai Kasang a 'Ga Shaka' covenants gaw kam sham ai hpung loi mi a hkan sa sadi sahka shadik shatup ai lam rai nna, dai hta nan Karai Kasang gaw, hpan lajang da ai lam[creats], shadan dan ai lam[reveals], gram lajang shagrin da ai lam [sustains], jeyang daw dan ai hte hkrang shaw la ai lam [judges and redeems] ni lawm nga ai. Ga Shaka dingsa prat hta Karai Kasang a bungli gaw, shi lata la ai ngu ai kam sham ai masha loi mi hte sha galaw nga ai hpe mu lu ai. Dai bungli gaw Edin ngu ai hta wang lu wang lang sak hkrung pyaw nga lu na sumsing [Paradise] hpe Karai Kasang hta htap htuk manu ai mawn nsam hking dagraw gun la ai ni nga lu na lam rai nga ai. Yuda htung [Judaism] hta mi rai rai, Hkristan htung hta mi nga nga Karai Kasang maga hku nna yu chyoi la na lam ginjang npawt jahtum [Alpha and Omega] gaw ndai lam sha re ai nga nga ma ai.

Karai Kasang gaw Israel ni hte tawn da matut mahkai lai wa yu sai creats, reveals,sustains, judges and redeems amu ni gaw dai ni mung shinggyim masha hkum ding dek hte bai matut mahkai nna amu galaw nga ai. Dai amu ni gaw moi na zawn Israel amyu kaw sha galaw nga ai nrai, kam sham ai marai hkum shagu, Karai Kasang a masha majing ni hte galaw nga ai.

Israel labau npawt gaw amyu tsaw, sai hkringhtawng tsaw ai ninghkring kaba Abraham hte shi a aru arat Isak, Yaku hte Yawsep ni kaw nna hpang nhtawm, ginru ginsa amyu 12 a ginju hkau byin wa sai. Abraham mung shawng na masha Adam hte amyu ru sai gindun taw nga ai nga nna n gup aga hte htawn tsun hkrat wa ai mau mwi mau sa labau hkringhtawng prat mi hte prat mi dai hku tsun ginlen wa sai. Chyum masa ninghkring ni gaw, ndai zawn tsun htawn hkrat wa ai labau lasang hpe masat la na yak ai nga tsun anyam timung, makam masham hte ginrun taw ai majaw ginhka shaprai kau na gaw yak la nga ai. Labau ngu ai gaw makam hte gindun jang grin ra na kun?

Labau a tsun htawn hkrat wa ai hpe chyum laika shabyin da ai ngu ga. Chyum laika nkau daw hta labau hku yu matut la na yak ai daw law law rai nga ai. Ga shadawn: Ningpawt Ninghpang laika ngu ga; labau hku sawn la mai ai daw nga ai zawn n mai yu shachyaw la ai daw mung nga ai hpe daw masum 'J' [Yahwist], 'E' [Elohist] hte 'P' [Priestly] ngu ai ningmu hku nna gaw gayau gaya rai nna lawm taw nga ai hpe mu lu na re. P-hkrang hta gaw ru sai hkring htawng gawn ai, aten ahkying ni lawm nna labau hku mai yu la ai. Raitim, kaga lahkawng gaw yup mang mu ai zawn, shingran mu ai lam ni, Karai Kasang hte shinggyim masha a lapran e nga nna ga shaga ya ai masha ni a lam lawm ai hku ka da nga ai. Dai hta kaga 'P'gaw BC 950, 'J' gaw BC 750 hte 'E' gaw BC 539 ni hkan she ka da ai lam ni dan leng taw nga ai. 'P' hta gaw, lahta na aten ladaw hta grau jau ai mabyin ni hpe mung ka shalawm da nga ai. Raitim, Davi a prat kaw nna she shanhte ni a lam hpe laika hte atsawm ka da lu na lam labau hta mu lu nga ai.

Pru mat wa ai laika hpe yu ga, Egutu mung na Yawsep hpe nchye ai Hkawhkam, Pharaoh hkawseng hkringhtawng dagraw ai wa langai a lak htak e re nga ai. Yawsep a prat gaw Rameses II [BC 1290-1224] e rai nga ai, raitim, Hkanan mung hpe shang madu la ai aten gaw tsaban 13th BC bai rai nga ai. Ga shadawn: Bethela, Debir hte Lachist ni hpe jahten kau ai aten gaw ndai mayan sha rai nga ai. Chyum laika kaw nlawm ai Israel masha ni a Egutu [Pharaoh Meneptah BC-1220] hpe awngdang [Pru 1:11] nna Palistina mung hpe madu la ai lam hte, Moshe a mabyin ni gaw matut mat wa ai shaloi gara shawng gara hpang ngu ai ka shachyaw ai ni hta madung wa nga malu ai. Raitim, chyum laika gaw labau hkrak nrai, Karai Kasang hte matut mahkai nna Israel amyu hte bungli galaw ai labau lasang lam ntsa lam htawng madun mat wa ai re majaw, Israel hte Yaweh Karai a lam hpe sha madung tawn ra nga ai.

Lam langai mi gaw, Yawshu hte Moshe a awng padang hte Israel amyu ni Hkanan de shang lu hkra Yoshu a kung kyang ai hpyen gasat hpaji hta Karai Yaweh woi awn sai lam Tara Jahprang laika hta mu lu nga ai. Raitim, [Judge] 1 hta gaw loi mi shai ai hku nna, tang madun da nga ai. Labau hku nna gaw Davi a prat du hkra Israel masha ni atsawm agawm rai shanu hpwng de nga lu ai lam nnga shi nga ai. Raitim, Yawshu a ten hta amyu 12 ngu ai Yawsep a lakung lama ni hpe woi awn nna Hkanan de shang wa ai lam gaw awngdang sai hkrun lam ngu na kun?. Shanhte de shang wa ai hpang kade nna ai ten hta Greek masha bu htawt ni ngu ai Parlistine masha ni hte myi man hkrum rai Hkanan mung hta shara kashun hkat ra masai. Hkanan lamu ga hta shanu nga lu na matu shaman chyeju hte mayak manghkang lam ni rau kapyawn nna hkam la ra masai. Moshe a ten na Ga Shaka gaw amyu ting hpe Karai wa hta langai sha myit mang hkrum lu na Ga Shaka hkam la ai amyu hku kahkyin da lu sai. Raitim, Israel masha ni gaw Hkanan ginra e nga nga sai galu kaba hkik hkam nga ai htunghkring kata de du sa shang wa ai hte rau, dumbri dumbra, garan ayai mat wa masai rai nna ningmu hkum, hkam la lam hkum hkra rai myit jasat myit mang ai lam shada shai mat wa sai.
[Daw 2 bai matut na]

Sasana (Mission)

Sasana ngu ai Hkristan shagu na nga ai ga rai na re. Raitim, chye na hkawn hkrang la ai mahtang langai hte langai, hpung hte hpung, aten hte aten, shara hte shara nbung na re. Dai hte maren galaw ai lai ladat mung shai na re.

Maigan sumtsan de dat kasa hku sasana sa ai, nkam nsham ai ni a shara kaw nga nna grup yin hpe kam sham ai ni tai wa hkra hkaw tsun sharin achyin ai, woi awn ai hte Karai Kasang hpang de gayin wa hkra lam amyu myu hku ladat shaw woi awn sa wa ai lam ni hpe mung Sasana (mission) ngu chye na ga ai.

Dai hte maren Buga kahtawng nawku hpung hpe woi awn ai, tara hkaw ai, mungga htawn tsun ai, nawku daw jau ai lam hta ahkyak ai hku shang lawm ai, kahyin gumdin let myithkrum mangrum ai lam Karai Kasang hta langai sha byin wa hkra woi jasat ai hpe mung Sasana (mission) ngu na re.

Buga hpung kata kaw shamu shamawt ai, tara hkaw, mungga htawn, nawku woi, hpung gawan lam amyu myu hku nna 'hpung' ngu ai shingwang kata shang lawm shamu shamawt ai hpe mung Sasana (mission) ngu na re.

Raitim, yawng hkra chye na la ai gaw hpung a dat kasa hku nna shara langai ngai kaw kam sham ai nawku hpung langai byin wa hkra sa shakut ai lam hpe mung Sasana sa ai nga atsun nga ma ai.

Chyum laika masa hku nna gaw, Karai Kasang nan shi hpan da sai shinggyim masha ni hpe hkrat sum mat wa ai kaw na hkan tam la ai magam amu [N.N 3:9] 'Adam, nang kanang nga nga nta?' Yesu htet da ai gaw [Mahte 18:19-20] 'nanhte pru sa nna masha amyu baw shagu hpe sape shatai mu', dai hte meren [Yawhn 20:21] 'Wa gaw ngai hpe shangun dat ai zawn, ngai nanhte hpe shangun dat na made ai'. Esaia gaw [Esaia 49:6] shi a amyu hpe shagrin da na hte maigan amyu ni a ninghtoi tai na shi shangun dat ai masha ni a magam amu, kam sham sai ni gaw n kam sham shi ai ni, or kam sham lam hta gawngkya nga ai ni hpe shadum sharin lam woi ya ai makam masham sak hkrung lam Sasana ni hpe galaw ai nga ai.

Ndai Sasana gaw prat mi hte prat mi, shara mi hte shara mi galaw ai lai nbung shajang na re. Hkaw tsun ai Sasana, bau maka ai Sasana, karum shingtau ai Sasana, galai jashai ai Sasana amyu myu rai nga ai. Church of Anglican [stedmundsbury.anglican.org/pages/mission/fivemarks/fivemarks.htm] hpung ginjaw kaw nna gaw, Sasana ngu ai hpe dam lada ai hku lawu na lam [5] hpe 1984 kaw nna jawm myit hkrum da masai nga ai. Dai hpe sha (Lambeth Conference 1998, Section II p121)e shagrin da masai. Dai lam ni gaw:

1. To proclaim the good news of the kingdom
[Karai Kasang a mungdan lam kabu gara shiga hpe hkaw tsun na]

2. To teach, baptise and nurture new believers
[Sharin achyin na, hkalup jaw na hte hpung masha ni hpe karum shingtau ya na]

3. To respond to human need by loving service
[masha a ra kadawn ai hta tsawra myit hte karum shingtau hkat na]

4. To seek to transform unjust structures of society
[tengman lam nnga ai wuhpung wuhpawng hpe galai jashai na]

5. To strive the safeguard the intergrity of creation and sustain and renew the life of the earth
[Karai Kasang a hpan da ai amu hta makawp maga shang lawm let mungkan ga hpe asak jahkrung nga na] rai nga ai.

Shawng na ga baw kata hta [Mahte 4:17; Marku 1:14-15; Luka 4:18; 7:22; Yawhan 4:14-17] ni hta mahta nga ai. Nawku hpung gaw ndai lahta na daw langai hpe npawt tawn nna Sasana amu hpe Nawku hpung a amu hku nna hkrang shapraw sa wa nga ai. Dai hta: 1) Sasana hkrang pru wa hkra nawku hpung gaw Karai Kasang hta maju jung nna masum raitimlangai ngu ai Kawa, Kasha hte Chyoipra ai Wenyi hta amkyit mahkai nga ai.
2)Dai hku mahkyit mahkai ai hta Nawku hpung gaw ru di nga ai htunghkring hta hkrang shapraw sa wa nga ai.
3)Nawku hpung gaw Kabu Gara Shiga hta mahta nna shada tsawra daw jau hkat nga ai.
4)Nawku hpung gaw kam sham ai ni hpe saw shaga nna Sape shalat let mungga hpe shadik shatup nga ai.
5)Nawku hpung gaw nnan du wa ai hpung shang masha ni hpe kabu gara ta gindun la nga ai.

Ndai lahta na lam ni gaw Nawku hpung hku nna Sasana hkrang shapraw ai woi awn jasat mat wa ai ladat rai nga ai. Raitim, Nawku hpung gaw aten hta hkan nna, fresh expression, attraction, missional expression hte missional church hkrang ni hpe ladaw hta hkan nna galai jashai mat wa nga ai. Htunghkring hta shamyet ai nawku hpung ni gaw htunghkring galai wa jang she nawku hkrang ni galai wa nga ai zawn, mungga hta shamyet nga ai nawku hpung ni gaw chye chyang kung hpan wa ai madang hta hkan nna nawku daw jau hkrang ni galai wa nga ai. E.g Hillsong, fresh expresion, G12 hte missional church hkrang ni gaw langai hte langai nbung ai nawku hkrang ni rai nga ai. Raitim, missional church gaw Evangelism hta grau mahta nna sa wa ai nawku hpung woi hkrang ngu yang nshut na nhten.

Evangelsim: Evangelism ngu ai hkaw tsun sasana hkrang gaw, marai langai hkrai a makam masham hpe Madu Yesu hta e gyit shabawn ya nga ai hte htinglu htinglai shangun nga ai. Dai majaw mission hte evangelism yan gaw nawku hpung hte nawku hpung masha zawn lahkawng raitim langai hku nna makam masham hta kung hpan wa shangun nga ai.


Missio dei ngu ai 'The mission of God' Karai Kasang a Sasana maga hku yu ga nga yang gaw, shinggyim masha hpe Karai hte hkrang bung hpan sai hte maren, ma hkra gaw Karai Kasang a amu magam hta rap rap ra ra galaw gun hpai nga na ra nga ai. Raitim, hkrat sum mat ai ngu ai mau mwi pru wa ai hpang gaw, bai hkye hkrang la ai, htinglu htinglai ya ai, bai gaw gap ai lam ra wa sai majaw, Sasana gaw bai gawp gap ai Karai Kasang hte shinggyim masha a htinglu htinglai lam rai nga ai. Dai hta hkye la ai amu ngu ai ga shang lawm nga ai.

Ndai htinglu htinglai ai hta, shinggyim masha gaw wuhpung wuhpawng hte nga ai re majaw dai kaw Karai nsam sam ai wuhpung byin tai wa na ahkyak nga ai. Dai majaw wuphpung wuhpawng hte hkrum ra nga na matu,mara raw ya hkat ai lam, karum shingtau hkat ai lam, daw jau hkat ai hte shadum sharin ya ai amu gaw Karai nsam sam ai ni a hkrang shapraw sa wa ai Sasana sak hkrung lam rai nga ai. Dai gaw Karai Kasang hte htinglu htinglai ya ai lam langai rai nga ai nga nna, hpung kata rap ra ai kanawn mazum lam hpe mung galaw nga ai.

Raitim, nkau shara hta gaw kanawn mazum karum shingtau ya ai amu sha nrai, gawn lajang ai bungli amu hte hkye hkrang la ai lam hpe mung myit shalawm re ai Sasana mung nga nga ai. Shara n kau hkan gaw Wenyi hkye hkrang la ai amu ahkyak ai nga nna akyu hpyi ai lam hta n gun dat ai zawn, nkau hkan gaw masha a sari sadang hpe makawp maga lawm ai hku nna hkye hkrang la ai amu hpe shadan shadawng nga ma ai.

Yesu gaw ndai htinglu htinglai ai Sasana ngu ai hpe galaw hpang dat sai. Dai hta hkyen hkrang la ai Sasana tai wa sai. Yesu du ai hte lamu mungdan a shingna dawng pru wa sai. Dai gaw shamai shatsai ai, sharin achyin ai, matsan dum ai hte Karai Kasang hta sakse hkam ya ai lam rai nga ai. Yesu gaw sakse hkum majing mung re nga ai majaw, shi hta anhte ni kam hpa nna hkan galaw ai amu yawng mayawng gaw Sasana amu byin tai wa sai nrai ni?.

Mara Tam Nmu ai Mang Hkang

Manghkang hkrai hkrai manghkang hkrai.
Grau nna gaw (Asak 30)ning jan sai ni, galu kaba hpang wa ai mungdan kaw shangai ai ni yawng hta byin nga sai. Makam masham, hpaji, kanawn mazum hku hkau, bungli galaw sha, sut tam, hkawm sa, nga pra lam yawng lawm nga ai. Galu kaba sai mungdan ni kaw grau byin ai hpe gaw nchye lawm ya nga ga ai. Shanhte kaw byin ai grau nga ai. Hpa wa rai ta?

Prat a maka gaw "Post-modernity" kata kaw rai nga ai. Anhte myit jasat nga ai hte sharin la nga ai lam ni gaw "Modernity" lai hkrai rai nga ai. Lachyum gaw, shi a du hkra ladaw hte shi, shi a ginra masa hte shi nga ra ai raitim,yawng hpe nhti nhtang bai li bai la ndi nda byin kau shangun ai gaw Post-modernism rai nga ai. Masha ni ndai ga hkaw hpe atsun nga tim Sinpraw masha ni a matu gaw "word form" langai hku sha chye na la nga ga ai kun. Kadai mung kaning re ai hpe tsun ai rai ta? ngu ai hpe hkrak nchye na wa sai. Lachyum shaleng ai ni law law, htai sang lang dan ai ni law law re. Dai lam ni yawng mung shi a ginra hte grup yin hta byin nga ai lak lai lam hta mahta nna tsun da ai hkrai law rai nga ai.

Generation gap ngu na kun, kaba ai ni ndai pot-modern lam hpe nchye na ma ai. Grai kaba sai ni hkum tsun (Asak 30) jan jang grai chye na yak nga masai. Kanawn ai manang nkau mi tsun nga ma ai. Post-modern gaw Modern hta grau tsaw ai hpe tsun ai le, da. Modern ngu ai gaw lak lai ai hku galaw lu ai atsam ningja hte htung lai maka langai re le, da. Modern age kaw shangai wa ti pyi modern na lam hkrak nchye shi ga ai. Ga si hpe gaw na ga ai na sai. Local knowledge law nna world view hta nshang ai majaw mung mai byin ai, hpaji sharin ai hta hti hka ja na laika buk ni hkum hkra nlu ai majaw mung ndep nhkap byin na sai. Hpa mi rai rai, prat a leng gaw kyi mat wa nga ai re majaw ndep kau sai ngu ai hte gaw hti ngam nga sana sha re.

Dai majaw manang langai hte hku hkau na yak wa sai. Nbung ai ningmu hte kanawn na yak la ai zawn, chye na ai nhkrum jang mung yak nga ai. Kaba ai ni tsun ai ga hpe ramma ni nau nkam madat wa sai. Ramma ni hpe mung kaba ai ni gaw nchye yu chyoi wa sai. Hpung sara ni hkaw ai tara hkaw ga hpe nau nhkan sa sai. Masha ni tsun shagu mung kadai nau nkam sham wa sai. Tinang kaw nga ai lama ma hpe manu shadan mayu wa sai. Tinang kaw lama ma nnga yang asak hkrung nga pra na gaya kahpa dum wa ai. Tsang (10) nlu awng jang masha jahpan nshang dum wa ai. Awng nna mung laklai ai maka mi gaw n lu gran dan tim, manu shadan la hkat ai nbung wa sai.

Masha shagu hkam la mayu ai gaw, sut su na, gumhpraw lu nna arawng tsaw na, mungkan chyam hkawm lu na hte galoi mung akyu rawng ai masha, tsawm htap nna hpaji rawng ai wa rai nga mayu sai. Raitim, shaman chyeju gaw yawng hpe ren di nna shai ai hku she jaw da sam sai.

Dai majaw Post-modern ngu ai prat de shang gabye wa ai ten hta, gara kaw na mi rai yang rai tinang a hkum hpe chye na la ra ai daw, masha ni hpe chye na ya ra ai daw, byin nga ai htunghkring hpe hkap la lu na atsam marai hte ndai mungkan gara de shading sa wa nga ai hpe hkrak sha hkan hkawn chye ra sai hku re. Hkawn hkrang chye na ai lam nbung la na re, raitim layung madi man yawng ra ai daw hpe gaw chye ra na ga ai. Grau nna Mungdan kaga de du kabye shang wa nga ai ni gaw nchye nmai rai nga ai
shing nrai yang, manghkang hkrai hkrai manghkang hkrai hkrai rai nga na rai nga ai...ngu ai hpe ga hpaw hpaw dat nngai....