Masha Hpan Shi Kru (Sixteen Personality Types)

Myers-Briggs Type Indicator [MBTI]nga jang sinna ga na masha law malawng chye na ai hkrai re. Ndai hpe myit hpaji kung kyang ai Swiss Psychoanalyst Carl Gustav Jung[1921-1971] lajang da sai hpe dai ni du hkra Sinna masha ni jai lang nga ma ai. Mungkan masha law la tim, garan ginhka nna yu dat ai shaloi gaw, hpan (16) hta n jan ai hkrai rai nga ai. Ndai zawn shai hkat ai lam hpe garan nna mu mada chye ginhka lu na matu gaw, galu galang sang lang dan ra nga ai. Raitim ahkyak ai daw lahkawng hpe daw garan nna ka matsing da mayu nga nngai. Company amu hta mi rai rai, nawku hpung kaw mi nga nga, shinggyim wuhpawng hte kanawn ra wa jang, masha hpe garan ginhka nna chye na loi na matu hte chye na hkat nna hku hkau kanawn mazum nga lu na gaw ndai masha hpan (16) hta madung nga ai.

Ndai ga baw hta lawu na nbung hkat ai ga baw matsat (8) hta mahta nna kadun ai hku tang dan da na re. Myit lawm nna chye mayu ai wa a matu matut hka ja la ra na ang ai.

Four Scales ngu ai, yan mali hta gabaw matsat rawng ai lawk lawm nga ai. Kaji ten e u htawt htawt ginsup yang mahkret da ai kata kaw sha mai ginsup ai hte bung nga ai. Loi mi chyam yu ga le.

Extraversion (E) - (I) Introversion
Sensing (S) - (N) iNtution
Thinking (T) - (F) Feeling
Judging (J) - (P) Perceiving ni rai nga ai.

Ga shadawn: E hte I kaw na langai lata u. Ndai lam yawng gaw myit kata e byin ai lam ni hkrai sha re.

E- Extrovert- Access to people, tinang hta myit shau shi shap yang, npyaw nngawn byin ai zawn re ai ten hta n gun lu la na rai yang makau grup yin shinggan de sa nna n gun awai chye ai, manaw manang hte hkrum jahta nna n gun la chye ai, kaga masha ni hpe tsun dan kau nna myit shakawp la chye ai masha hpan rai nga ai. Dai hte maren:
I- Inrovert, ngu ai masha hpan ni gaw lahta na zawn hkrum hkra wa ai shaloi, tinang hkrai shim ai shara or nga pyaw dum ai ginra kaw kadai hte mung nkam hkrum ai hte tinang hkrai n gun la, n gun awai rai chye nga ai. Ndai hpan lahkawng hta shamyet nna lawu na daw ni hpe mung loi li shai hkat ai hta hkan nna bai myit shacyaw sawn tawt da ai Myit Hpaji Mu Jut, Psychometric rainga ai.

S hte N kaw na mung langai lata u. Shiga na lu ai hte seng nga ai.
S-Evidence. Shiga langai na jang teng nteng naw sagawn nna she kam chye ai akyang.
N-Possibilities. shiga langai na jang mai byin na re ngu kalang ta kam chye ai akyang.

T hte F kaw na mung langai lata u. Daw dan ai lam hte seng nga ai.
T-Truth. Tengman lam hpe madung tawn nna jeyang daw dan chye ai akyang.
F-Homony with others. Masha kaga hpe agam chye ai, kaga wa machyi mat na tsang chye ai akyang.

J hte P kaw na langai lata u. Tinggyeng sak hkrung lam hte seng nga ai.
J-Control. Tinang a lam hpe hkang chye ai, plan jahkrat nna sak hkrung chye ai akyang re.
P-Keeping option open. Mabyin hta hkan nna flexible, htingram la chye ai akyang re.

Ndai gasi (8) hta na, group langai na langai rai yang, ga si mali lu na sai.
Ga shadawn: Yan langai kaw na E-I hpe I lata ai ngu ga, I
Yan lahkawng kaw na mung S-N hpe N lata ai ngu ga, N
Yan masum kaw na mung T-F kaw na F lata ai ngu ga, F
Yan mali kaw na mung J-P kaw na P lata sai ngu ga, P Nang gaw INFP ngu ai masha hpan rai nga sai.

Ndai hku nna masha hpan (16) du hkra garan da nga ai.
Rai sa, INFP gaw kaning re ai madang nga ai wa rai ta? Shi gaw 3.7% madang sha re.
Tsaw dik gaw 18.4% rai nna yawm dik gaw 1.0% rai nga ai.

INFP masha hpan gaw, ga nau n shaga ai, mahtai jaw chye ai, myit wawn nna sawn chye ai. Shinggyim nau na daw jau hkat chye ai. Hpa hpe mung manu shadan nna atsawm hkrak hkrak rai galaw chye ai. Kang ka ai, shi a shara hte shi hkrak hkam la chye ai zawn, masha kaga hpe mung manu dawdan chye nga ai. Galoi mung myit nyan let nna mai byin awngdang na lam hpe shawng mu chye nga ai. Masha kaga hpe chye na ya ai hte karum shingtau ai hta myit n gun grau dat chye nga ai, ngu ai lam ni lawm ai.

Nang myit lawm yang, na a myit hpe nang sawn nawn ai hku lata nna ga si mali hpe command kaw ka bang da yu u, kaning re ai myit masa hte kyang lailen nang kaw nga ai kun? gara daw koi gam ra nna gara daw gaw n gun kya nga ai kun ngu ai hpe nang chyu nang chye la lu na re. Na a lam hpe rau ai aten hta hkan nna bai ka shana dat ya na nngai law.
Mai byin ai lam ni gaw: Nang gaw, ISTJ, ISFJ, INFJ, INTJ, ISTP, ISFP, INFP, INTP, ESTP, ESFP, ENFP, ENTP, ESTJ, ESFJ, ENFJ, ENTJ ni kaw na langai ngai rai na ndai. Nlaw htum tinang a lam hpe tinang chye da lu na gaw grau madung nga ai nrai ni.