Yesu Tengsha Hkrung Rawt Sai Kun? ( IV )

DAW IV.

Chyum Laika sakse

Kabu gara shiga laika:

Marku laika hta Yesu hkrung rawt ai hpe nmu lu ai lam ka da ai. Raitim, bu hpun palawng ahpraw hpun da ai masha; dai aten hta lamu kasa hpan hpe gaw mu ma ai nga ai. Ndai lam ni hpe Petru hte shanhte ni a tsun hkai ai lam n jaw nga ai masa ni dan dawng wa sai majaw, Hkristan ngu ai ni hpe hkan rim shamyit na mabyin ni paw pru wa sai nhten.

yawhan laika hta tsun shana shabra ai hku sha nrai, kam sham na matu du hkra bai shangang dat ai hku ka da sai. Rai sa,

Galoi ten dai Num sha gaw lup de sa yu sata? Mahte laika hta, Japawt nhtoi hprim hpram aten e re; Marku laika hta, Jahpawt jan pru jang; Yawhan laika hta, jahpawt nhtoi garai nhtoi yang; rai nga malu ai. Bai nna,

Dai num gaw kadai ta? Mahte laika hta Magdala Mari hte kaga Mari; Marku laika hta,Magdala Mari yan Yaku a kanu Mari hte Salome; Yawhan a laika hta, Magdala Mari sha sa ai; ngu ai lam ni mu lu ai.

Hpa majaw lup de sa ma ta?: Mahte laika hta lup hpe yu yu na gawan sa ma ai. Marku laika hta manam pyaw ai sau, moi mang kaw chya ya na matu; Luka laika hta manam pyaw ai baw sau gun nna sa ai; Yawhan laika hta mura hte achyaw kayau ai sau joi sumshi daram hpe chya ngut chyalu rai sai lam ni rawng nga ai.

Lup gaw hpaw nga sani? Mahte tsun ai, garai nhpaw shi ai,shanhte du yang she hpaw ai; Marku, Luka, Yawhan hta lup gaw chyinghka hpaw nga chyalu rai sai.Shanhte lup de du yang kadai hte hkrum?: Marku laika hta lup kata e ahpraw nba lawai ai shabrang langai mi dung nga ai; Luka laika hta masha lahkawng re ai, Mahte laika hta lamu kasa langai she re ai nga ai. hpa majaw mau mwi zawn tsun hkai wa masai kun, Yesu si ai hpang shaning (20)ning daram hta sha ndai daram shai ai hku hkai wa masai.
Mahte laika hta nlung ntsa e lamu kasa langai dung nga ai lam, Marku hta shabrang langai kata kaw dung nga ai lam; Luka laika hta masha lahakwng; Yawhan laika hta gaw lamu kasa lahkawng lup kata pai hkra dung nga ai nga ai.
Dai lup kaw na hpa baw shiga ni na wa ma ta? Mahte hte Marku laika hta " shi nang e nnga sai, shi tsun dan sai hte maren bai hkrung rawt wa sai, shi a sape ni hpe tsun dan mu", Luka laika hta, "shi nang e nnga ai, hkrung rawt wa sai: Galile mung e naw nga yang Masha Kasha gaw yubak kap ai ni a lata de ap kau ai hkrum nna, wudang hta jen da ai hkam ngut jang, masum ya nhtoi hta hkrung rawt wa na ra ai lam, nanhte e tsun da ai ga hpe myit dum mu" nga ai. Rai sa, ndai lam ni yawng hpe dai num ni gaw kaga ni hpe kaja wa tsun dan ma ai kun? Mahte hte Luka laika hta re tsun dan masai; Marku hta ntsun dan ai, nga ai. Magdala Mari gaw Yesu hkrung rawt sai ngu ai hpe chye sani? Mahte, Marku, Luka hta, re shi chye sai; Yawhan laika hta Mari gaw Yesu hkrung rawt ai hpe nchye shi ai.
Rai yang, Yesu hkrung rawt sai hpang kadai ni hpe shawng hkrum a ta? Mahte laika hta marai (11) hpe shawng hkrum ai; Marku laika hta sape marai lahkawng hpe shawng hkrum ai; Luka laika hta Ema-u lam kaw sape lahkawng hte hkrum ngut jang, sape ni (11) hpe bai hkrum ai; Yawhan laika hta marai (10)-(11); Pawlu bai rai jang gaw Petru hpe shawng hkrum ngut ai hpang ngam ai sape ni hte hkrum ai lam rawng nga ai.

Yesu shi a sape ni hpe gara kaw shawng hkrum a ta? Mahte laika hta Galile makau na bum ntsa kaw (Mile 60-100) Yeruslem hte tsan ai), teng sha Yesu a hpang jahtum shat sha poi hta tsun da ai shara rai nna, num sha hpe lup kaw tsun ai ga mung rai nga ai. Marku hta gaw, nam kahtawng de hkawm sa wa ai marai lahkawng kaw dan pru wa ai. Luka laika hta Ema-u lam kaw marai lahkawng hte shana maga e hkrum ai, shana aten e Yeru salem mare na gawk kata kaw kaga ni hte bai hkrum ai; Yawhan laika hta gawk kata kaw shana maga e hkrum ai nga nna rawng nga ai.

Yesu hte hkrum ai lam wa tsun dan ma yang sape ni kam ma ni? Marku laika hta nkam sham ma ai; Luka laika hta kaja wa kam ma ai. Matut nna hka ja yang shai hkat ai ningmu ni law law naw nga ai. Shai ai hpe nshai hkra tsun dan lu na gaw chyum hpaji ninghkring ni a lit rai na re. Raitim,hpang jahtum e gaw nmai shai ai lam sha rai ra nga ai, hpa majaw nga yang, byin ai langai hpe shai ai ningmu law jang teng sha byin ai hku hkam la na gaw tsan gang nga ai.

Chyum hpaji sharin ai hta ndai zawn re ai mabyin law law wa ka da ai hpe kara singkawng hti ai zawn, jaw ai de hkrak ai hku gawn dan htai dan ra nga ai. N rai yang ma hkra nhti nhtang lata lahpan lagaw lahpan n ginhka lu ai lam ni byin nga ai.

Hkristan masha tai ai hta Yesu hkrung rawt ai lam nnga yang, kam sham na lam nmai byin ai nga nna lama myit taw ai rai yang, Hkristan makam masham gaw galai shai wa na nhpang rai nga ai. Dai majaw tinang a makam masham gaw gara kaw maju jung ai kun? jaw ai hku lam gran yu ra nga mali ai law.

Mahte laika kaw gaw, dai num ni du nga yang nan lamu kasa du wa nna nlung hpe galau kau dat ai nga nna me, kaga kaw gaw shanhte du yang lup gaw chyinghka hpaw nga sai. Gara mahtang jaw na rai ta? Sinpraw masha ni a matu gara mi byin yang byin, byin jang rai sai ngu mai tim, sinna masha ni a matu ndai daram shai ai hpe lachyum pru ai mabyin re ngu hkam la na yak nga sai. Myit hta byin ai mabyin ni ka da ai sha rai na rai nga ai.

Yesu a sape ni masu chye ma ni? Petru gaw jahkring hkring Yesu hpe tsun hkam la nna nhkan ai mabyin ni mung nga nga ai majaw, dai ni na sinna Hkristan dingsa ni gaw ndai sape ni masu da ai ga hpe kam na n gwi wa masai nrai ni?.

Dai ni na hkristan ni a matu Yesu hkrung rawt ai lam hpe teng sha chye na hkra nang gara hku tsun dan sak se hkam na law? Ndai lam ni gaw Sasana galaw ai lam hta ahkyak ai daw nrai ni? Lama nhkrung rawt yang gaw Karai kasha re ngu gara hku kam sham na rai ta? San na ga san ni law law mu wa na nrai ni.

Shawng daw na Hkristan ni gaw Yesu a hkrung rawt ai lam hpe, hkum hkrang nrai, Wenyi hku hkrung rawt sai lam hpe hkam la ai lam shawng daw hta tsun sai, Kasa Pawlu mung dai hte maren sha sakse hkam hpang nna, Petru hte shan lahkawng gaw ndi nda bai byin wa nhtawm, hkum hkrang hkrung rawt wa sai de masu (Trick)galaw lai wa sai lam chyum laika hpe daw hte daw htai lai yu yang mu wa sai. Chyum laika hta Pawlu hte Petru sha nrai, Ningpawt Ninghpawng laika ( N.N 32:22-32) hta rawng ai Yaku a mabyin hpe yu ai shaloi mung (tricks) lam ni hpe mu lu nga ga ai majaw, ya bai tang madun na gaw: YAKU A MABYIN HTE KARAI KASANG a lam kadun mi hpe she bai hkap hti nna n gun la ga law.