Karai Kasang a Nta Hta (House of God)

Ga baw hpe hti dat ai shaloi gaw laika buk kaba langai byin na daram dam lada nga ai. Raitim Karai Kasang a nta hpe 'Shi a shaman chyeju hkam la ai ni' nga ai shara ngu yang grau hkawn hkrang loi na kam ai.

Ngai jahkring hkring ana nga ai Jinghpaw ni a Hkristan makam masham hta 'Shaman chyeju' nga ai ga re. Dai shaman chyeju gaw kaning re ai hpe wa tsun ma ai kun ngai nchye na ai sha Hkristan tai ai (30) ning jan rai mat ni ai. Ya mung ngai chye na ai hte kaja wa hkam la tsun nga ai ni a masa gaw nbung na re, ngai mung mahkrum madup dai ram nlaw ai. Raitim Chyum Laika hta mu lu ai daw chyen ni hpe yu nna lam brat dan ga nga yang gaw lagaw lam hta mawdaw lam grau ding na re ngu kam nngai.

Ningpawt Ninghpang (N.N 32:22-32) hpe hti yu ga.
Yaku ngu ai wa gaw Isak hte Rebeka a kasha, Esaw (jau gawng) wa a kanau rai nga ai. Shi gaw lak mi alai rai Karai Kasang kaw na shaman chyeju hpe masu nna mung, kashun nna mung, kamu nna mung lu la sai rai nga lu ai. Ndai Yaku gaw madu jan lahkawng ting lu da wu ai hte kasha mung shi dang shaprat wu ai. Madu jan lahkawng la ai hta Karai Kasang a yaw shada ai nlawm nhten; (N.N 30:7-8) hta madu jan Rahkela a shingnan num hpe mung madu jan shatai kau, Rahkela hpe ra ai majaw num masum lu nu ai, (Buy one get three) rai nga lu ai. Shi a kahpu ba Esaw hte mung (14) ning ram wa nrum hkat nu ai. Kahpu a aya masu la ai hpang Yaku gaw gara de sa na shi nchye mat nu ai majaw myit kabung dum jin nna hkrup ai hkan yup hkawm ai mung aten na na sai. Katsa La Ban hpang de tsam mari du yang mung, dumsu bai nam rem ai kaw shi a amyat naw gyam nga ai (N.N 30:39-41). Shi a prat gaw Prangtai gat ai zawn galing gale, ndi nda gumtsat hkawm ai prat kaw na kaning rai Karai Kasang lata la ai amyu a kaji kawa rai wa lu a hka?.

Shi a kahpu kaw na hprawng hkawm ai shaloi shi hkrai sha re, myit masa hpaji hku yu ga nga yang gaw nsin mak ai kade hkawm mat wa na nchye ai prat, tinghkrai dam hkawm, shingkra zawn garen hkawm rai nga yang nsen mung na ai, shingran mung law law mu ai, yup mang mung nhti nhtang shi mu nga ai. Shi hkrum ai yawng hte gaw Karai Kasang kaw na hkrai re ai lam shi bai shading malan da nga ai.

Karai Kasang a nta hta dai zawn re ai ni kaja wa madu da a ni? Yaku gaw shi hkrai yup nga yang shana tup lamu kasa hte kamu hkat ai shi dang na zawn lamu kasa dang na zawn byin ai jahpawt du hkra re. Raitim lamu kasa gaw magyi pawt kaw sha ahtawk ya ai shi labye mat ai. Dai ni na anhte a myi hte yu yang mani hpa maumwi mau sa mau hkrawn mau wam wa nrai ni. Hpa majaw Karai Kasang hte shana tup kamu hkat ra wa sata? SHAMAN CHYEJU hkam la na matu re, nga ai. Kawa Isak kalang shaman ya sai mung nga nga ai. Dai sha nram ai shi nan kamu dang la ai shaman chyeju dai gaw;
1) Mying galai shamying kau ai. Ya kaw nna gaw nang Yaku nrai sai, Israela she rai nit dai. Masha hpe mung Karai Kasang hpe mung gasat hkat nna dang kau nit dai, ngu wu ai. Ya she shi a myit hta lawt na zawn shim lum dum nu ai.
2) Dai jahpawt daw gaw Labye mat ai. Mani hpa mabyin rai nga ai. Karai Kasang hte myi chyaw hkrum sai, nga nna mung tsun shawu nu ai. Yaku gaw Karai Kasang hpe jum tek tawn nna shaman ya yang she dat na ngu shagyeng dat yang, Karai Kasang gaw dai yang e shaman ya sai, nga ai. Dai shara hpe (Hpeniela) Karai Kasang hte myi tut hkrum tim nsi nngai, ngu ai shara re nga ai.
3) Kadai rai nta ngu san yang maga mi na wa ntsun ai, nga ai. Mawshe mung shi hpe shaga ai wa kadai re hpe nchye ai, mying ntsun ai, 'Ngai gaw Ngai wa rai nga nngai' nga ai nga nna tsun da ga ai.
Pawlu mung dai hte maren, Yesu hte lam kaw hkrum ai shaloi, 'Nang kadai wa rai nta' ngu nna san wu ai lam mu lu ai.

Chyum laika hta Yaku zawn masha ni hpe grau kam sham wa u ga (trick) masu nna shadang la chye ai ni law law nga ai hta Kasa Pawlu mung lawm nga ai. Yona mung nga kaba kan kaw masum ya tup rawng sai, dai gaw Karai Kasang a ga n madat nna mayu hkrum sai, nga ai. Dai ni na prat hta kadai wa masum ya nga kaba kan kaw rawng lu na kun. Raitim, Karai lam re majaw nbyin mai ai hpa nnga, ngu nna kam sham mai nga ai.

Masha shagu hpe trick galaw mayu nga ma ai. Raitim, Karai Kasang hpe grau chye na kam sham wa na maga de n gun dat nna masu ai ni rai ma ai majaw mara mu na gaw yak nga mali ai. Kam sham ai anhte a manaw manang ni mung awngdang ai zawn re ai lam lama ma, lawt kawt lu ai mabyin langai ngai, n myit mada ai byin wa ai lam amyu myu hpe Karai Kasang a shaman chyeju re, nga nna hkam la chye ai ni hkrai rai nga ga ai. Sinna mung hta shaman chyeju gaw bungli galaw shakut ai wa sha lu ai, nga ai.
Anhte ni mung Yaku zawn, Pawlu zawn masha ni hpe masu kau hkrup sai kun. Shaman chyeju gaw tsun na yak a ni? Mam hkai da nna dan la lu ai gaw shaman chyeju san san kun, n gun dat arang bang da ai a mahtai rai na kun.

Anhte ni yawng gaw strugling ngu ai tut nawng e gum lan myan da kan ra ai sak hkrung lam hkrai nrai ni? raitim, nang hpa rai dai hku gumlan shakut nga nta? ngu san yang htai na gaw, byin mayu ai hpe tsun na hkrai sha re.
Hpa rai laika shakut nga nni?
Hpa rai ja gumhpraw tam nga nni?
Hpa rai dinghku de nni?
Hpa rai masha ni a gawng malai tai nga nni?
Hpa rai shawa a matu shakut nga nni?
Hpa rai awngdang na chyu myit nga nni?
Hpa rai masha ni hta jan hkra byin mayu nni?
Hpa rai shani shagu bungli galaw kyin nga nni?
Hpa majaw, hpa majaw, hpa majaw ni yawng gaw Blessing ngu ai shaman chyeju lu na de du wa na matu shakut ai hkrai nrai ni? Yaku zawn Karai Kasang hte kamu hkat nna lu ai Shaman chyeju gaw kadai lu gwi a ta? Anhte ni a shaman chyeju nkau mi gaw 'trick' masha ni hpe Karai Kasang a hpung shingkang shadan dan mayu ai hku tsun ai ni law na re. Dai shaman chyeju a shawng kaw shi lama ma galaw da chyalu hkrai rai nga ai.

Ga shadawn: Ndai prat hta masha nkau mi mai gan de kashu kasha ni hpe nga da shangun nna, tsam mari kanu kawa hpe shagun jaw ai kumhpa ni gaw, Shaman chyeju ngu ai ga baw hta hkrai rai nga ai nrai ni? Maigan sa na gumhpraw sen shi kaba ma nna du sai, Karai Kasang a shaman chyeju re law, nga nna ngam nga ai dum nta masha ni gaw masha kaga ni hpe naw tsun nga ai. Yawba zawn machyi si wa ai lam mung shaman chyeju hte ntsan nga ai nrai ni.

Anhte ni yawng mayawng gaw Karai Kasang a dum nta 'House of God' kaw rai nga ga ai nrai ni? masu tim Karai Kasang hta, awngdang ai mi nga, shaman chyeju hpring ai mi nga yang nga, dai lam ni ma hkra gaw Karai Kasang a dum nta hta hkrai byin nga ai hpe mu lu na gin jang kaga law law hku mung tam bram sawk hkrawk achyaw mahti manam dinghkrai yu ra saga ai nrai ni? ngu myit yu na lamang nnan langai hku n gun jaw dat ai lam rai nga li ai law.

Ya nang chye na la sai ndai lam a majaw, shaman chyeju gaw Karai Kasang a nta hta hkrai re lam mi moi na hta grau mu mada wa na sai ngu kam nngai.