Nnang Nawn a majaw Japan mung jamjau nga (Earth quake create Japan's cost cities distroyed)

Sendai airport, North Tokyo, Japan swept by tsunami, 11 March, 2011.

Ndai lapran nnang nawn shiga matut nga ai. New Zealand mung na Christ's Church, Miwa mung na Hpin Yang mare(Yin Jang), Japan mung dingdung daw ni rai nga ai. Japan mung hta March 11 ya, 2:46pm local time hta byin wa nnang nawn gaw, shaning 100 ning laman sawng dik rai nna 8.8Mgt. rai nga ai. Nnang nawn a majaw shara shagu wan hkru nzim nga ai, masha hte arung arai dabyek za sum hkrum mat sai. Grau nna tsunami ngu ai panglai hka leng rawt wa ai majaw, de a ka-up kahprwi wa ai gaw, panglai hkin gau ni hta de gaw da ai tsawm la ai dum nta hkrang amyu myu, mawdaw hte sanghpaw kaji kaba, jak sau dum law law hpe jahten kau sai. Panglai hka sahpaw hku nna sanghpaw kaji kaba, nta ni, mawdaw ni, mahkrai daw ni, nbung li ni, wan leng ni hte hpun ni hpe mu lu nga ai. Panglai hka gaw mare law law hpe ka-up kahprwi kau nna masha mung 1300 hta n yawm ai si na lam sawn ndau nga ma ai. 

Tsunami swept Japanese city on 11 March, 2011

Dut na matu dingren da ai mawdaw ni, sau dum ni wan hkru ai gaw hkying hkum 36 rai sai naw hkru nga ai. Panglai hka ntsa shana tup wan hkru nga ai. Asuya dap shagu hte shiga dap ni n yup nsha hkra masha hkye nga ma ai. Masha wan kahtap nna dum nta nlu mat sai majaw, mungkan ting hpe kraw ganan shangun ai mabyin rai nga ai. Japan mungdan hta Myen mung masha mung ram ram nga nga ai. Jinghpaw ni mung tsa kaba rai nga ai. Raitim, dai ni du hkra kadai wa hpa byin ai lam hkrak nchye shi ai. Japan mungdan hta wan jaw jak hku nna Nuclear power plant 55 nga ai kaw na 2 gaw hkrit tsang ra ai shara de du nga ai. March 12 ya hsana maga 4:00pm hta jak rung langai wan hkru kapaw mat sai. Raitim, ahkyak ai nuclear hpe shaw kau lu sai majaw, tsang ai daram nbyin wa na lam shana nga ma ai. Lama na dai wan jak kalang ta kapaw ai rai yang, makau grup yin deng 500 ram hpe manghkang jaw lu nga ai.

Wunpawng buga Nu/Wa ni a mu mada ai nnang nawn (dum shun) mau mwi hpe ngai gra dum wa ai. Ngai naw kaji yang, nnang nawn nawn jang (dum shin shun ai) nga ma ai. Shaloi, dum sai law, dum sai law ngu jahtau ra ai lam sharin ya ma ai. Ndai lam ni a shingdu kaw hpa baw philosophy nga ai kun? lamu ga shamu wa ai gaw, Ga Dinggai e shamawt ai re nga ma ai. Dai majaw, dum sai law..ngu jang shi jahkring kau ai nga ma ai.

Ndai zawn re ai myit mang lam law law wunpawng sha ni kaw nga ai lam hpe grau dum wa ai. Rap ding hkala, ma di kanu, numju, hpyi, nat, hte minla, karai amyu myu hte Karai Kasang hpe mu mada hkam la ai lam ni mung dai ni na prat hta anhte ni mu chye na wa ai hte mala la shai nga sai. Dai majaw, ndai ga baw hta la kap nna, Wunpawng myit mang kamsham lam gaw galai kau ra ai lam law law nga ai hpe mu wa nngai Mau mwi ni, labau ni hpe gawn yu nna jaw ai hpe sakse hkam sa wa ra sai nrai ni? Karai Kasang a lam hte shinggyim nga pra lam hpe mung shai ai hku mu ra sai law....