Thursday 24 March 2011

Kabu Gara Shiga (Good News) hte Sakhkrung Lam

Kabu Gara Shiga Good News (or) Gospel ngu ai hpe daw lahkawng hku mu lu ai. 1) Someone could have relationship with God (Karai Kasang hte htinglu htinglai ai lam)  2) Karai Kasang hte htinglu htinglai lu ai gaw Shi jaw ya ai kumhpaw kumhpa san san sha re, ngu ai Kasa Pawlu a shaleng dan ai lam a ntsa hta mu lu nga ai. Raitim, Yu da makam ningmu hku nna gaw, Karai Kasang a tara (or) nature laws hpe hkan ai lam hta lai kaga Kabu Gara na lam mi nnga ai. Dai majaw, nawku htunghkring gaw Wenyi sak hkrung lam hpe nhti nhtang di nna social system hta challenge galaw ai re ngu mu mada shangun mi ai. Grau nna gaw, Kasa ni a ten hta, mayam hpe masha hku n masat ai, Yesu a prat du hkra Num hte Ma ni hpe jahpan nbang ai, Egutu mung e Hebre amyu shadang sha yawng hpe sat ai genocide (or) race murder hpe galaw ai Egyp masha ni gaw, Karai Kasang kachyi mung nra ai amyu ni re, ngu ai  labau ni gaw sakse rai nga ai. Raitim, Karai masa hku mu shangun mi ai gaw, amyu shagu hte tu matu hkrung mahkrung gaw, Shi a ahkaw ahkang a npu e grin nga ai lam mu lu ai.
American Hkalup hpung hta 1845 e, Southern hte Northern nga nna daw lahkawng garan mat ra ai gaw Mayam shalawt na hte mung seng nga malu ai. Dai sha nrai, Hkristan hpung ngu ai hta denominational hte seng nna dang rang hkat ai, jahpoi ahpyak hkat ai hte shingjawng hkat ai lam ma hkra gaw Karai Kasang a amu rai ni? ngu myit yu ra wa nga ai.
Bishop Spong (Newwark, USA) gaw 'a terrible text' ngu ai chyum laika a hkrit shangun ai, mau shangun ai, sat shangun ai, lawt shangun ai, dang shangun ai hte sum shangun ai lam ma hkra hpe Karai Kasang lajang ai lam re nga nna, Karai Kasang hte hku hkau ai masha nkau mi gaw nhku hkau ai law law a ntsa sara galaw ai lam re nga nna htawng madun dan nga ai nga nna mau ai ga tsun nga ai. Dai hte maren, Chyum Laika sharin la ai ni gaw n sharin la ai ni hpe shadum jahprang let shanthe a ntsa kaw nga nga ma ai. Hkaw tsun dan let up mung up hkang nga ai. Tinang nan nlu hkan tim masha kaga wa hpe hkan shangun nga ai. Tinang ndang di tim kaga wa hpe galaw na shadut nga ai.
Pilat wa ta kashin kaw nhtawm Yesu hpe ap kau ai amu shi hta mara nlu sai hku Chyum masa gaw mu la shangun nga mi ai. Dai hku galaw ai hpe Karai Kasang hkap la ai nga yang, masha sat ai ni, mara shut ai ni lata kade lang mung mai kashin kau nga ai.
Karai Kasang gaw Hkristan nrai tim, Hkristan tai yang sha lawt lu na, hkye hkrang la hkrum na ngu ai gaw mau hpa wa rai nga ai. Nawku htung gaw Karai hpe shatai nna shinggyim hpawng gaw de ai lam hta lai kaga alak mi jan nna mu lu na yak nga ai. E.g Ga Shaka dingsa prat hta, Karai Kasang gaw tsaw htum grau htum ai wa, chye chyang htum ai wa ngu hkap la lu yang; Karai Kasang hpe kam sham ai hpung ni a sak hkrung lam gaw, tsaw ai de du ai sat lawat, grau ai hpe madu ai lailen ni hpe mu lu na ga ai. Yesu a prat du yang mung, nlung salum hpe shaw kau nna kya ai salum galai kau na lam, hpaji rawng na lam, hkam sharang na lam hte tsawra na lam hta kaga hpa mung nmu lu na ga ai. Dai gaw shinggyim wuhpawng a matu ahkyak nga ai. Dai majaw, shinggyim masha gaw "never be a human until they love God"  Yesu gaw, "you may be not a human until you love your neighbour and enermy" rai nga lu ai. Htingbu wa hpe tinang a hkum hte maren pyi nlu tsawra ai wa kaning rai masha ngu na? hpyen wa hpe pyi ntsaw ra lu yang, kaning rai masha ngu na? gam jaw gam ya myit pyi nrawng ai ni kaning rai masha ngu na? tinang a nta masha hpe pyi nkau da lu yang kaning rai kaga wa kaw hkan nang lu na? tinang a asak hpe pyi lahpawt dum ai ni kaning rai kaga wa a matu arawng la hpa galaw lu na ngu ai gaw Yesu a sharin achyin ai lam rai nga ai. Dai gaw Kabu Gara Shiga bai tai wa sai.. Ginchyum nna yu yang, Chyum Laika gaw hpa wa rai nga a hka? ngu myit yu mai nga ai.
Raitim, kaning rai dai lam ni hpe dai ni na nawku hpung ni chye na na ma? sara ni gaw kam sham na she sharin ya ai gaw...hkan galaw na hku mi ntsun ai gaw...kaga wa hpe Yesu a lam tsun dan na she shadut hkrum ga ai mi....sak hkrung lam hte tatut woi awn chye na mi n sharin ya ai gaw....kaba ai ni hpe hkungga chye na hte shinggyim lailen hta kunghpan na matu she nawku hpung gaw sharin achyin nga ai mi...dai majaw, nawku hpung gaw 'civilise' shinggyim sak hkrung lam hpe shachyen ya nga ai....nawku jawng e lagu ai amu byin na nrai. Kam ging ai htingnu rai wa na sha rai nga ai. Dai kaw magam gun ai ni mung, kam ging ai ni grau nna chyoi pra ai ni ngu pyi sawn nawn lu na ga ai.
Shaman chyeju mung lamu de na marang zawn (or) tsan kaw na nbung zawn du wa ai hpe she anhte ni kam nga ga ai. Gyin shalat, galaw shakut nna lu ai baw gaw Karai Kasang jaw ya ai ngu nmu lu ga ai. Dai majaw, majoi lu ai arai hpe lang mayu ai, majoi gam ya ai hpe ra ai, a laga lu ai hpe gyam ai amyu ni she rai taw nga ga ai. Lam mi hku yu yang, dai gaw gaya kahpa amu rai nga ai. E.g Wunpawng sha ni computer chye lang wa saga ai. Solfware ni ra ga ai, virus sat na ra ga ai, majoi lu mai ai website ni gaw akyu jaw nga ai. Raitim, dai gaw, anhte a galu kaba lam hpe gyit da ya lu nga ai.
Dai ni na ten hta, Hkristan ngu tsun dat ai hte Shan Chyang (African), Asha masha (Asian), matsan ai ni (middle class) hku mungkan gaw chye na nga ai. Lai wa sai 18th century a shawng de dai hku nrai. Hkristan gaw shan hpraw masha, sut su ai hte du ni a nawku htung rai nga ai. Dai majaw, matsan ai ni, hpaji nchye nna anya ai ni gaw dai nawku jawng de ndu lu nga ai. Hkristan ni e matsan dum na, hte up hkang na lam sha rai nga ai. Raitim, dai ni na prat hta HKristan gaw anhte zawn re ai amyu ni, African masha ni hte matsan ai ni a matu hkik hkam ai nawku htung rai dam nga na sai...




No comments:

Post a Comment