Postmodern Karai Masa (Postmodern Theology)

God is in your head

Postmodern Karai masa ngu yang madat pyaw nna sharawng na zawn rai nga ai. Raitim, Karai Kasang nnga ai, hpan da ai wa mung nnga ai, hpung shingkang hte hpring ai wa mung nnga ai, shingra tara a madu ngu ai wa mung nnga ai ngu ai Atheism myit jasat ai kaw maju jung taw nga ai. Karai masa lam myit wa ai shaloi, ndai lam ni hta madung tawn nna myit mat wa ai re majaw, Postmodern Karai Masa ngu tsun ra wa sai.
Kevin J. Vanhoozer tsun ai hte maren, Postmodern masha ni gaw Nietzsche a jasat ai hpe masat masa tawn ma ai. Dai gaw, Karai ngu ai Hpanwa Ningsang Chyewa Ningchyang hpe masha a shara kaw tawn nna shara la mat wa ai lam rai nga ai.

Postmodern a lam hpe ndan madu zawn nga nna tsun gara ai ni yawng gaw , Karai Kasang nnga ai nga nna marawn makan nga ai myit sawn sumru mu nu ni Foucault, Derrida, Lyotard, Bataille, Barthes, Baudrillard, Macherey, Deleuze, Guattari, hte Lacan ni a tsun garu ai hpe madi shadaw ai ni rai ma ai. Dai majaw, Nawku htunghkring a lam tsun wa yang, pluralism ngu ai nsam hkrang hkum nga pra grin lu na shinggyim wuhpung wuhpawng hpe myit mada ma ai. Dai zawn byin lu na matu shakut ai ni hpe Postmodern Karai masa ngu tsun yang nshut nga ai. Shanhte tsun ai nawku htung gaw masha law law rau hpawng de lu na lam rai nna, dai zawn hpawng de ai hta ahkyak ai gaw  makam masham hta arawn alai rai nga ai. Kam ai ngu ai gaw tinggyeng myit mada ai, ra sharawng ai, byin mayu ai lam ni de shayawn la taw nga ai nga ma ai. Ndai hku tsun lu ai lam gaw, psychology ngu ai myit hpaji hte matut ai baw nu kaw rawng ai matsing kyem shalat nga ai daw ni a bungli galaw ai lam nbung ai a majaw mung mai byin nga ai.

Hpa mi rai rai, shinggyim wuhpawng hta rau hpawng de ai shaloi dam lada ai hku mu mada chye na hkat na ahkyak ai. Grau nna kanawn mazum hku hkau ai shaloi, ginhka ginra nnga ai sha de hpawng nga lu jang dai gaw postmodern society ngu mai tsun sai.

Dai majaw, postmodern Karai masa a myit ai lam gaw, shinggyim wuhpawng hpe, lamu kaw na, sumsing kaw na, nga rai kaw na-ndai mungkan hte tsan ai shara langai ngai kaw na uphkang ya lu ai nrai; anhte ni nan anhte lajang la ra ai sha re, nga ma ai. Maga mi tsun yang hermeneutic and social gospel hpe madung tawn ai lam rai nga ai.  Raitim, ndai hku lajang la lu na matu gaw, mu mada bung ra ai, machye machyang bung ra ai hte myit jasat ai lam nau nshai ai ni rai ra nga ai majaw, masha hkum ding shagu gaw laika mi nchye tim hku hkau kanawn mazum ai living environment hpe mu mada chye bung na ra nga ai. Dai nbyin lu ai rai yang, uphkang ai asuya gaw masha yawng hpe manu maren tawn nna tara rap ra ai hku woi awn ra ai lam ni pru wa nga ai. Dai majaw, postmodern nga sat nga sa mi ngu yang ngu, Karai masa mi tsun yang tsun; postmodern hte matut manoi myit ra ai shingdu labau gaw tara rap ra ai shinggyim wuhpawng hta sha byin mai ai lam mu lu ai.

Postmodern nga sat nga sa or Karai masa or kanawn mazum lai ni gaw, matsan ai bum ga hkan, asuya n kaja ai mungdan hkan myit yu na lam nau nmai byin nga ai. Dai majaw, shawng e ka da ai article hta postmodern gaw truth oriented nhtang mat ai lam re ngu ai hpe kadun mi shaleng da sai. Moi gaw truth hpe Karai kaw tam ai, ya gaw masha kaw tam ai or shinggyim wuhpawng kaw tam ai lam sha re.   

Dai majaw, postmodern Karai masa gaw Karai nnga ai ngu nna sawn shapraw ai ni a n gup n gau kaw na pru wa ai myit jasat lam hta npawt tawn nna gawn sumru da ai sak hkrung lam re majaw, na chying wa chye na yak na masa nga nga ai. Grau nna, galu kaba wa nga ai anhte amyu zawn re ai ni, bai nna nawku htung hpe atsawm nchye na ai ni hte, makam masham a lam hpe atsawm nhkawn kau dat ai ni a matu ram ram dingbai dingna byin nga ai, ngu mu lu ai. Shakawn kungdawn sara wa tsun ai: Karai Kasang nnga ai nga ai ni gaw angawk ai ni re nga ai (Sh.k 14:1).
Karai Kasang gaw tsawra myit re nga ai ni postmodern Karai masa hte ntsan nga ai .
"The key to our domination in the planet is Culture
And the key of culture is Religion
The heart of the worship is surrender"