BBC Nsen Shapoi Ai Dap De Sa Du

Rev. Marip La Rip (MIT) England de jahkring mi sa du ai laman, London KCF nawku hpung masha ni hte mung kanawn mazum let lani mi Bum Sinwa hte London mare kaba ka-ang de myi man shayawn yu mada jahproi hkawm saga ai. 

Jahpawt daw gaw, Hkawhkam George VI a kasha, 1926 ning hta shangai ai Elizabeth II, shanu nga ai 'Buckingham Palace' de sa du mada hkawm saga ai. Shanthe a htung nga ai hte maren shani shagu hpyen hprim madun ai ten mung ang nga ai. Sa yu mada ai masha poi sa ai zawn law la time Jinhpaw Wunpawng sha langai mi mung nlawm ai hpe mung dum nga ga ai. Gumra jawn ai ni, hpyen hkring ahkyeng hte bawnghkaw a chyang chyawp nna bu hpun da ai ni, balik hking hte ram daw wa  zawng shinggrup da  nga ma ai.

Dai hpang Asuya Rung Ginjaw (No.10 Downing Street) maga de gayin du wa saga ai. Ndai aten hta Conservative ningbaw David Cameron gaw Leberal Democratic ningbaw Nick Clegg hpe mung masa poi hta hkungran la sai shiga na ai majaw sa gawan yu ai lam sha rai nga ai.

Dai hpang, shaning 150 jan na sai British Parliament htingnu (Big Ben Palace) hpe bai gayin mada dat yang mu lu nga ai. Masen la ai shangu numgaw hte tawk ka shakya da ai shakum man ni gaw shagawp nma na daram wa tsawm htap la nga ai. Ndai htingnu galaw ai ten hpe myit yu yang, ram ram pyi galu kaba taw sahka? Anhte ginra de bai nhtang sumru dat yu yang, masha ni a lai wa sai 200 ning lakang ninggam hta pyi garai ndu lu shi sam nga ga ai, ngu sawn yu lu shangun nga ai.

Dai hpang, 1940 ning September hta hpang dat ai BBC Burmese Radio Nsen shapoi ai Ginjaw Rung de sa du na ginjang mi bai pru wa ra ai. Ndai parliament circus kaw nna No. 87 Bus a hkyeng jawn yang gate htum ai kaw na loi sha mi hkawm dat yang du sai. Htingnu kaba masum hpe Triangle hku gaw shachyaw da ai htingnu kaba kata kaw rai nga a hka. Dai kaw bungli galaw ai hpu nau Kayin num sha gaw a kaw a law hte shara shagu hkan madun dan nga ai. Nye a kraw hta BBC kaw na Myen mung a lam nsen shapoi ai ni, Myen myu sha chyu naw rai nhten, nanhte gaw kade wa Myen mung kata na (Taiyintha) hpe sawn shalawm ga myit ta? Asuya hpe sha tsun, ngu lagu myit nga ai na sai. Raitim, ngai bai sa du yu yang ram daw ahkyak ai shara kaw dai Kayin num sha dung nga ai hpe mu kau da ni ai. Nang gara hku ndai amu hpe lu nta? ngu yang, shara man ai hpe na nna shawk dat ai re, nga ai. Langai ngai hte matut mahkai nna shara lu ai nrai, dai shara kaw kaja wa ra ahkyak nga ai machye machyang hte hpring tsup ai ni hpe shara jaw ai lam mu lu ai. 

Ndai nsen shapoi ai shara hta magam gun nga ai ni hte hkrum shaga ai shaloi mung,

nsen hte hku hkau taw sai majaw manang ni hte bai hkrum ai zawn hkam sha ai lam ndai Blog de sa du ai ni hpe htinglen dan mayu nga nngai.  Shani shagu nsen shapoi nga ai Sanda Win, U Ba Maw, U Mg Mg Than, U Myin Thet  Ko Thu  Rein ni hte hkrum shaga lu ai. Kaga nkau mi ndai sumla kaw nlawm lu ma ai.

Grau nna myit lawm hpa gaw, May 17 ya shana 8:15-9:00pm hta shapoi nga ai nsen shapoi gawk de aten htum hkra sa dung mada nna madat lawm lu ai lam rai nga ai. Nsen shapoi ngut ai hpang, shanhte a san da ya ai rung gawk de wa nna tsun shaga kanawn mazum lu ai hku rai nga ai law.
(Softpower is a power to be love, hard power is a power to be fair)