Nagoya- Japan hkrun lam

(4) Lang ngu na Japan ga de bai sa du kabye lu ai hkrun lam hta, n myit mada ai sha kanu mungdan na dat kasa hkringmang salang kaba hte hkringmang uphkang salang yan hte bat mi laman hkrum zup nna hku hkau lu ai ahkaw ahkang lu la sai.

1. Myen mung a Hkringmang salang kaba [Embassador], Nagoya e ntai nmai rai hpaw hpang wa nga ai Myen mungdan hte seng ai madun gawk nu byin wa na lajang nga ai Jawng sara dingsa Ma-su-i a shakut shaja nga ai lam hta sa du ai lam re. Ndai gun jaw let shagrau sha-a ai lam hta Nagoya makau grup yin e hpaji sharin nga ai Myen mung masha ni mung sa du hkrum zup nna, shani shat rau jawm sha, madu mahkrawn kahpu kawa langai hpe zawn gamung jahta lu ai lam rai nga ai.


2. Bat mi din ai hpang hkringmang uphkang salang [Consular]hte shana shat ma mi jawm sha nna madu mahkrawn gamung jahta hku hkau lu sai. Shana hkying 10:10 hta Tokyo de lung wa na jin jin e, sumla ni jawm dem nna mahkrum madup lam ni tsun garan gachyan hku hkau la lu sai rai nga ai.



Hkringmang uphkang salang gaw mungkan mungdan (27) hta n yawm ai du hkawm lu sai hte, mungdan tsawm mara ni hkan mungdan a magam lit hte sa nga hkawm sai majaw, mungkan a mung masa lam hte ganu mungdan a byin nga masa lam ni hpe atsawm chye na ai nga nna tsun ai.

Hkringmang salang kaba hku nna mung mungdan 6-7 du hkawm sai hte du na shaning hkan gaw magam amu kaw nna hkringsa wa ra na sai nga nna mung jahta tsun nga ai. Yak hkak ai lam amyu myu re, mahkrum madup mung amyu myu hkrum ai, nga ma ai.

Myen mung a mabyin hta hkan nna, maigan du nga ai mung chying sha ni gaw, tinang a byin mayu ai ningmu hta hkan nhtawm, hkringmang dat kasa rung shawng kaw n gun sa madun ai lam nga chye ai. Ndai zawn galaw ai lam hta tinang maga hku nna sadi ra ai daw ni nga nga ai hpe chye la lu ai. Dai lam ni gaw, "n gun madun marawn ai shaloi, hkringmang dat kasa ni a mying hpe gang nna marawn tsun ai lam" gaw Geneva Convention hte nhtan shai ai majaw, dai mungdan a asuya shim lam kaw nna shim lam jaw makawp maga ai amu hte hkang zing ai hpe hkrum na lam nga nga ai.

Bai nna, hkringmang dat kasa rung kaw n gun madun mayu yang, seng ang ai mungdan asuya kaw na tara shang ahkang hpyi la nna she galaw mai nga ai. Dai gaw gaw mungkan ting hkap la lu ai hte, asuya hte mung manghkang n byin hkra hparan lajang lu ai ladat rai nga ai lam mung chye la lu ai.

Nagoya mare kaba hta Japan asuya ni hku nna jawng shabrai lu sha hkam ya let hpaji hpungjat nga ai [M.A; Ph. D] jawngma mung ram ram law nga ma ai. Raitim, wunpawng amyu sha ni dai jahpan hta mying rawng ai nmu lu ai majaw, wunpawng sha ni gaw mung masa a majaw wa rai ni? hpaji madang a majaw wa rai ni ngu ai ga san ni kraw kata kaw na pru wa ai nga ai.

Mung masa gaw masha a rawt jat kung hpan lam hpe nlu galaw ya na re, raitim rawt jawt wa mai ai masing masa hpe sharai galai ya lu nga ai. Masha shagu gaw masing masa jaw hkrak tim n kung kaba wa lu ai gaw marai langai hkrai a shakut shaja ai hte hkaja ai, galaw ai amu lam ni kaw madung nga ai... ngu nna hpungdim dat mayu ai.

Tsaban 21 Na Nawku Hpung

Tsaban 21 hta du shang nga sai majaw, ndai ban prat a maka kumla ni hpe atsun a jahta ra nga sai. Ya mung Nawku Hpung ngu ai hpe tsaban 21 hta gara hku mu mada hkam la nga ma ai kun? naw yu jahproi ra nga sai. Galu kaba sai mungdan ni tsun shagu wa kaga galu kaba magang wa ai mungdan ni mung galaw ra na i? shing nrai hpa nseng ai, anhte mung anhte a matu sha myit ra ai ngu theology shapraw nna nga nga na i?

Nawku hpung gaw hpa wa rai ta? Karai Kasang a mying hta bat mi kalang hkrum zup let nawku shakawn mahkawn rau jawm mahkawn, sara ni hkaw ai mungga jawm madat, hku hkau ai manang ni hte hkrum. Htawma wa ung ang ai zawn Karai lam hta ung ang ai langai mi mung nlawm, shawa nawku hpawng hta apyaw sha shang lawm, kashu kasha ni hpe mung woi sa rai nna hpung masha jahpan hta lawm nga ai shaning hku na wa ai shaloi, hpung kanu kawa hku nna pyi masat la hkrum na rai nga ai. Shingrai nawku hpung gaw awngdang ai hpung hku nna dinghku mayet magang nawku hpung masha law magang rai nawku hpung kaw masha law wa nna galu kaba wa sai zawn rai nga ai.

Raitim, Sinna mung de gaw dai hku bai nrai sa. Europe mungdan hte America, Canada ni hkan gaw nawku sa ai masha lani hte lani yawm yawm, dingla gumgai ni chyu chyawm chyawm rai mat wa sai sha n ga, ramma tam shamat ai hte nawku sa masha nnan ni ndu wa ai majaw nawku hpung gaw si wa hkyen sai nga nga ma ai. Mare lawk hkan hkrum nna hku hkau la ai masha ni mung, Wenyi hte seng ai hpe gaw ra, Nawku hpung hte gaw nhpra rai nga ma ai. Nawku hpung ni mung masha a Wenyi hkan hkwi hkawm ai nga yang ndum shamyi tsaban 21 a Sasana lai ngu ai paw pru wa ra sai. Ndai lai gaw Hkristan nawku makam masham lam ngu na hta, masha a hku hkau kanawn mazum lam mungga hte htap htuk hkra ngu ai de gayin sa wa ai sha rai nga ai. Ga shadawn: Nta kaw jum hte nawhpu lu jang shat mai shagu kaw bang nna nam chyim hkam la ai hpa rai nga ai.

Karai Kasang hte Chyoi pra ai Wenyi gaw masha a ntsa e kaja ai ngu hkam la jang, hpung kata hta kaja ai magam galaw ai gaw Karai Kasang ra ai amu tai wa sai. Dai hta Sasana majen je ladat ni bai bang shalawm dat jang tsaban 21 a Sasana shing nrai tsaban 21 a nawku hpung tai wa sai rai nga ai. Ndai hpung gaw laban shani shagu nawku jawng hta zup na re ngu nmai sawn ai sha n ga, nawku hpung ni kaw na alu gumhpraw hta la na re ngu ai hpe mung nmai myit nga ai. Madung gaw Karai Kasang kaw na mai kaja ai hku hkau kanawn mazum lam hte shada pri nen hkat ai hta lai n gun jawm jaw hkat rai nna ndai mungkan e asak jawm hkrung ga, ngu ai de sha lachyum pru nga ai.

Nawku lai ladat amyu hmyuhku woi awn nga ai Hill song, G12, Fresh expression, Emerging church zawn re ai lai ladat nnan hte gaw de sa wa nga ai nawku hpung ni gaw tsaban 21 a matu htap htuk na myit mada ma ai. Raitim, Hillsong ni mung yu ngwi madum sumpyi hte shanhte a nawku jawng kata kaw sa shang lawm yang chyu sha hpung a shangwi shapyaw ai hta shang lawm lu ai majaw, shanhte kaw sa ai masha, mahkawn yu ngwi hte shakawn ai hpe ra ai masha ni law wa jang, nawku hpung gaw galu kaba jat wa sai hku ang nga malu ai. Kaga ni mung dai hte maren, tinang a nawku ai shara de masha law law du wa jang nawku hpung gaw rawt kaba jat wa ai hku sawn la la rai nga ma ai. Dai majaw, ya aten hta shinggyim masha ni hpa hpe ra marit nga ma ta? ngu ai gaw nawku hpung hku nna gara hku sasana galaw ra a ta? ngu ai hte kahpyawn nna myit ra wa sai.

Masha nkau mi mungga madat mayu ai majaw nawku sa tim, nkau ni gaw kraw kata na nshu nshang nga ai myit hpe hkraw kashin jasan kau na nawku sa ma ai nga ai. Masha a kraw hkraw kashin ya lu na lam gaw mungga hte sha nrai, lam amyu myu hku nna myit mat wa sai rai nga ai. Dai majaw, masha marai manga sha mi rai rai, shi mi rai rai dai masha ni a kraw kata Wenyi hte seng ai hpe myit nna Karai Kasang hta rau rai nga jang, dai gaw nawku hpung rai nga ai.

Tsaban 21 a nawku hpung gaw masha hpe madung dat ai manawt dingsawt hkrai rai nga ai. Gaw gap da ai nawku nta, nawku lai htung hkan ai hte mungga shagreng ai, tinyang jahtap jahtuk ai sha nrai, masha shagu rap ra ai hkam la lu na de man yawng nga ai. Bawlung (gawdin) pa e mi rai rai, nga hkwi hkawm ai kaw mi rai rai, night club hte beer seng hkan mi rai rai, hpa lap seng e mi nga yang nga, shada hkrum nna hku hkau lam, n gun jaw ga hte karum shingtau hkat nhpang ni gyin shapraw lu yang dai gaw Karai Kasang hta hpung de ai rai nga ai.

Ndai prat hta gaw, Internet hte telephone hkrang ai shra ni hta sumtsan mungdan kaw nga ai wa/jan hte rau jahta rau shaga n gun jaw hpaji jaw hkat lu ai sha n ga, htingbu wa hpe zawn hku hkau lu nga ai. Dai majaw ramma daw ni gaw kanang e mi nga nga, gara shara kaw mi du du chye hkat hku hkau ai manang ni hte bat mi kalang nlaw htum hkrum shaga nna jawm jahta n gun jawm la hkat ai amu gaw tsaban 21 hta manu dan ai nawku hpung a shingnip shingna langai rai nga ai.

Dai majaw Rev. Richard Tiplady tsun ai "communication not congregation" nawku hpung gaw hpawng de nga ai nrai matut mahkai hkat nga ai lam rai nga ai nga ai. Ndai commuication gaw new forms of community ngu yang ngu postmodern society mi tsun yang tsun, ahkyak ai gaw matut mahkai hkat nga lu ai lam re.

Dinghku de ngut nna mungdan kaga ga kaw garan nga ai ni, tsawra hkuhkau hkat tim hkum hkrang tsan gang taw ai ni, ramma manaw manang hte jinghku re ai ni sha ndai lam hpe akyu jashawn nga ma ai. Nawku hpung hku nna mung sawn la mai nga ai. Tinang a buga hpung masha wa/jan kanang du mat nga ai, gara kaw du taw nga ai hpe buga na nawku hpung shiga hte rau matut mahkai nga ai rai yang, dai buga hpung masha wa koi yen htak mat na lam mi nnga ai.

Dai majaw, tsaban 21 a nawku hpung shingnip shingna hku nna Sinna ga e wa mi nrai tim, nawku hpung hku nna tinang a buga masha ni hte mung; manaw manang hku nna tinang a hku hkau masha ni hpe mung byin mai ai hta hkan nna matut hkat nga ra na ga ai. Nawku hpung gaw shada mu hkat lata hte shakram hkat lu yang sha hpawng de ai baw nrai, na hkat, chye hkat, ahkyak la hkat ai hte matut mahkai hkat nga ai mung dai Madu hta rau ndai mungkan e ta gindun nga lu ga ai nrai ni?.......

Israel Labau SAGA (BC)

Daw III

Ezra gaw Nehemia a hpang BC 397, Artaxerxes II a prat e tara ni hpe shagrin da ai magam hpe gaw da nu ai rai nga ai. BC 401 ning hkan ka da ai Papyrus ni hpe yu ai shaloi, Persia asuya ni kaw hpyi shawn ai laika, Yeruslem hpe bai gaw gap la na ahkang hpyi ai zawn re ai hpe Nile hka nu zunlawng ni hkan na tam mu ma ai nga ai. Ezra a ten kaw nna gaw Yuda hpe hkawhkam nrai hkinjawng ni up hkang lai am byin wa sai.

Ahkun hkan se hte seng ai lam, nawku htingnu hta jaw jau ra ai peksan gumhpraw ni hte seng ai lam zawn re ai hpe hkunjawng ni lit la nga ma ai. Dai hte maren, shaga ai ga hpe mung Persian ni masat ai Aramic ga [Yesu shaga ai ga] hte Hebrew laika ni hpe mung Persian ni hte jahkrup nna rap ra ai hku lang nga lu ma ai. BC 333 aten hta gaw, Alexandra the Great wa Persia hpe bai dang kasat la kau sai. Shi si ai hpang BC 323 kaw nna shi dang da sai mungdan ni hpe daw hte daw di nna hpyen du kaba Celeucus, hte Egutu na Ptolemy gaw Perlistine mung hpe uphkang nga masai. Ptolemy up hkang ai Yeruslem kaw gaw, mung up du kaga nsan da ai sha n ga, ahkun hkan se hte shaw lahkawn lam hpe hkinjawng kaba ni kaw nna lit la ya na shatsam da wu ai.

Jews masha ni hpe gaw hpyen la galaw shangun nna kaga ni gaw hpaga yum ga hta tawn da wu ai. Hpaga ga ai ni gaw Greek laika hpe chye ra ai hta kaga, Jews ni a Tara laika ni hpe mung Greek hku ka gale da na matu BC 260 hta Ptolemy II gaw hkrat ang ai arang shaw nna galaw da sai. Ptolemies up hkang nga ai ten hta rawt malan ai hpung kaji ni le tsat nang tsat gaw anga nga ai. Raitim Celeucus [Antiochus III] hte kahkyin nna, Jews ni hpe ahkaw ahkang grau jaw ai hku uphkang nga masai. Raitim, BC 198 hta Magnesia ngu ai Roman wa a npu e bai n gun kya wa sai majaw BC 187 hta si mat masai hte, dai kaw nna gaw aten kadun up hkang ai du ni dai shara kaw law law up hkang lai wa masai.

Up hkang ai ni yawng mung Greek htunghkring hpe sha madung dat ma ai majaw 'Helini' htunghkring hpe Jews amyu kata kaw adan aleng rai hkan sa jai lang ra taw nga sai. BC 168 hkan gaw grai yak hkak ai hte Greek htunghkring ka-up ai sawng wa sai. Jews ni nra sharawng la ai Wa ni hpe tawn hkungri hkan sat nna Greek hpara jaw jau ai hta kaga, Jews ni a myu tsaw lailen ni yawng mung kanoi shabawng sip ai zawn tsun chyai na pyi nnga hkra sip nyip mat nga sai. Dai ten hta Mattathias ngu ai myu tsaw n gun rawng hpung mung Yuda nam mali hkan e pru dakat hkawm wa sai. Raitim kade nna ai Mattathias sat kau katut nna BC 164 hta gaw Maccabeas rawt malan hpung mahtang shara la kau sai.

Mayak mahkak gaw law law byin ai raitim, Maccabean ni shaning 100 ning daram wa de nga lu masai. Shanhte hpe mung hkinjawng ni, hpyen du ni gaw yu n sharawng ma ai. Dai majaw shanhte mung shanhte a hpung langai hpaw nna nga masai lam Qumran laika [deadsea schrool] hta mu hti la nga ai. Nawku Hpung kata hta, mung masa galaw ai gaw Pharashe hte hkinjawng hkring hpun da ai Saduke ni rai nga ma ai. Syria kaw dung ai Roma mung gyi Gabinius wa gaw Yuda daw hpe lamu ga jarit shayawm kau tim ahkun law law hta wu ai. Dai hta n ga, lamu ga man manga di nna garan up wu ai. Dai lamu ga man masing gaw dai ni du hkra naw asung shang taw nga ai.

Julius Ceasar ahkaw ahkang lu wa ai hte, Yeruslem ginwang hpe gaw kasha Antipater ngu ai Phasael hpe shadun da, Galile ginwang hta gaw kasha Ma Naw wa Herod hpe up shangun di wu ai. Herod gaw Syria kaw dung ai Greek mungdu daju hte grai rai ja hku jahkau wu ai. BC 44 ning hta Julius Ceacar hpe katsing sat kau ai hpang gaw Jews masha ni a hkring mang salang Mark Antony hte Octavious hpe Syria de dat nna Herod hpe shawk da mu ai. Raitim, hkringmang masa kung ai Herod gaw dai hpe kungkyang ai hku hkau masa hte dang kau lu nna Jews ni a hkawhkam hku she bai byin wa sai.

Ahkrang ahkrai, dai ten hta she Syria hpe Roma wa a karum ai hte Parthians wa madu la nna, Yeruslem ting hpe shi bai up madu na hku hkyen nga nu ai. Raitim, Herod wa gaw shi hpe bai gasat dang kau nna Jews ni kaw nga nga ai Maccabeans ni hpe mung gasat shatsai kau nhtawm BC 4 du hkra up dung nga nu ai. Jews ni hpe mi na hta grau dip sha sanu ai. Raitim bungli grai galaw ai hta n ga, Yeruslem Nawku htingu hpe mung bai gram ya mu ai. Dai hta n ga, nawku htingnu kaw nga ai hkinjawng du ni hpe du hkra shi up kau wu ai. Shi hpe gum lang ai, n dawng ai ni yawng mayawng hpe sat kau kau di wu ai. Herod si ai hte Jews ni gaw Augustus Ceacar hpe mung up du langai bai dat ya na hpyi shawn da mu ai. Augustus mung Herod a kasha hpe she bai shatsam nna, Idumea, Samari, hte Parlistina mung ting hpe gumhpawn nna up nga yang, Yesu gaw shangai wa sai aten rai nga ai law......

Ndai labau hpe yu nna, mung masa ngu ai myu tsaw lai ladat hpe shi a aten hte shi shamu shamawt nga ai hpe labau hku hti hkai mai nga ai. Raitim, gara daw gaw anhte a matu sharai gring ai, gara daw gaw kraw kata e pru wa ai hpe hkan gring ai gaw hti la nna sum ru, sawn yu nna mu mai ai nrai ni.........ngu hpungdim dat ai law...

Obama a Mying hte Karai Masa

American Gumsan Magam Barak Obama a shaga mying hkawt hpe Karai masa hku yu yang, Hkristan ni a matu hkrit tsang shara nga ai kun? Daniel wallace gaw lawu na hku sumru sawn, ningmu gawn nna tang dan nga ai.

Youtube video ni hkan mung mara da ma ai majaw myit lawm hpa langai gaw rai nga ai. Mabyin gaw ndai hku!

Ga Shaka Ningnan (Luka 10:18) "Satan gaw lamu de nna myihprap zawn hkrat wa ai hpe, ngai mu se ai. I saw Satan having fallen like lightning from heaven." Ndai chyum ga hkum hpe myit wa ai shaloi; 1) chyum ga hpe Greek hku nna ka da ai hpe, Yesu shaga ai ga "Aramaic" hku gale da sai. Dai gaw moi prat na Hebrew amyu ni a jahtum chyalai manu dan ai ga rai nga ai. 2)Dai hte maren Ga Shaka Dingsa (OT) hpe mung Hebrew hku ka da ai hpe Yesu shaga ai Aramaic ga hte mung gayau lawm nang nang rai nga ai. 3)Dai sha n ga, Yesu shaga ai ga hta Hebrew ga gayau ai majaw, ndai chyum ga hpe lawu na hku ka da ai hpe Hebrew ga hku lachyum pru nga ai.

I saw Satan having fallen like lightning from heaven, ngu ai hpe, I saw Satan falling as lightning from the heights, or from the heavens ngu ka lang ma ai. 4) Hebrew ga hku nna lightning hte heights ngu ai hpe sung sung lachyum htai yu ma ai. Lightning ngu ai hpe baraq ngu nna tsun ma ai. 5)Dai hte maren Myihtoi Esaia ka da ai Satan or ‘Lucifer’ (Esaia 14.12a) hpe mung myit shalawm ma ai. 6) Esaia 14:14 hta 'Satan tsun ai ga, “I will ascend above the heights of the clouds; I will be like the Most High' ngu ai ga hpe mung matsing da. 7)Esaia 14:14 kaw na ga hpe Hebrew hku 'Heights'hpe Bamaw. 8)Hebrew ga 'waw' nga ai nsen hpe ga gale ai shaloi, U or O ngu ai nsen hte jai lang ma ai. 9)Hebrew hku 'waw'gaw ga matut hku lang chye ai ga mung rai nga ai.

10) Hebrew hku Baraq Obamaw nga jang gaw lightning and the heights” or “lightning from the heights ngu ai lchyum hkrak pru nga ai. Dai majaw Luka 10:18 hpe Hebrew hku lachyum htai shaleng dat ai shaloi, Baraq Obamaw, dai hpe Barak Obama ngu nna bai shapreng dat ai sha rai nga ma ai.

Raiti mung, ndai ga pru wa hkra Greek hku - Aramaic hku hte Hebrew hku yu shachyam lachyum shaw yu nna sha byin wa ai ga rai nga ai. Hpa mi rai rai, ndai prat ndai aten hta, Barak Obama amying dan hkung wa ai hte maren, chyum masa hku nna mung yu chyoi la mai ai hte hkrit kang gring ai wa mi rai kun ngu nna gaw sawn yu lu ma ai majaw kaning re ai wa re ngu ai hpe gaw laika hti hka ja nna sawn yu ai wa a lachyum shapraw la ai daw sha rai na rai nga ai.

Source:


http://www.youtube.com/watch?v=mK_zh-X21f0 hta yu yu mai ai.
Hebrew Dictionary 1299, 1300; Strong Hebrew Word 1116,
Dan Wallace,
http://www.reclaimingthemind.org/blog/2009/08/2823/