Yesu a Sasana Gaw Nawku Hpung Hpe Yaw Shada A Ni?

Yesu a Sasana gaw Nawku hpung hpe yaw shada wa sani? Mahtai gaw 'nang nawku hpung ngu ai hpe gara hku chye na ai' ngu ai hta madung na re. Nye a prat hta Nawku jawng sa ai, nawku daw jau ai, alu bang ai, tara hkaw ai, dai shara kaw mahkawn shakawn ai, kalang lang hkungran poi hte zuphpawng amyu myu hpawng ai shara langai rai nga ai ngu she mu wa ni ai. Nawku jawng kaw sara ni hkaw ai tara a majaw, Yesu hpe jaw ai hku chye na wa ai kun, ngu san yang; ngai ndai kaw nkam htai shi ai.

Shawng na ga baw hta, Yesu gaw Simun hpe tsun ai ga langai 'Simun, na a mying Petru (lunghkrung) ndai lunghkrung hta nye a hpung ngai de da na we ai, nye a hpung hpe nang kaw de da na,ngu ai hpe tsun lai sai. Mungkan ga ntsa e nang hkum da mada gaw sumsing lamu e mung hkum da na re. Ndai shara kaw Petru hte Simun ngu ai a lapran e chye na shai ai samyit hkum daram sha din nga ai. Masha law malawng gaw Petru ngu ai wa kaw Yesu a hpung de da na chye na kau masai nhten. Madung gaw Petru gaw lunghkrung ngu ai rai nna ngang kang ai wa, tengman ai wa dai lam gaw lamu na Kawa e shabyin sai nga nga ai.

Yesu a Sasana yaw shada lam madung gaw,nawku hpung de nna majaw hpawng nga na matu nrai; Karai Kasang a mungdan de na, she rai nga ai. Karai Kasang a mungdan lam hpe ga shadawn ni law law hte shaleng dan ai, myi htoi ni a ga hte shaleng dan ai, hpaji ga law law hte ga shadawn jaw nna sharin ai hte, dai kangka ai amu hta tengman ai sha nrai, lak lai ai atsam mung shi galaw dan lai wa sai. Karai Kasang a mungdan hpe htawn tsun nga ai kaw na, Nawku hpung a htunghkring sak hkrung lam hpe maju tawn manu shadan jahkrik mat wa ai ndai shinggyim wuhpung uhpawng hpe, kadai wa dinglun dawdan gwi a ta? Nawku hpung ngu ai hpe anhte ni lachyum shaleng ai hte manu shadan ai lam hta hkan nna, Yesu a sasana hpa re ai hpe chye lu hkra matut hka ja nna hkan sa ra na rai nga ai.

Lai wa sai aten shaning law law kaw nna, nawku hpung gaw kam sham ai masha nlang a matu sumsing mungdan sa na numshang (Gate), embassy, Karai Kasang a dat kasa rung, zawn rai nga ai nrai ni. Dai nawku jawng kaw mying lawm ra ai, hkalup hkam la ra ai, shanglawm ra ai hte hpung a gaw da ai tara ni mung hkan sa ra nga ai. Hpung sara ni gaw dai nawku jawng kaw Ministry ngu ai shawa hte seng ai bungli ni hte sasana a lapran bai li bai la nhti nhtang kyin nga ma ai. Dai nawku jawng a kata na magam amu ni gaw rung magam gun ai wa (office staff) zawn rai nga ai. Kam sham ai hpung masha ni mung sara ni a akyu hpyi shaman ya ai hpe prat tup ra sharawng nga ma ai. Hpung masha ni Wenyi sak hkrung lam gaw chye chyang kung kaba wa ai ngu ai nnga, kung kaba wa sai ngu ai ni mung, Nawku htingnu a kata daw dap sin salang bai tai ra nga masai. Sara ni hkaw dan yang she Karai Kasang hte hku hkau matut lu ai zawn, rai nga ai. Dai majaw sara ni gaw Ambassador ni, na a sumsing mungdan lam hte seng nna tara kasa wa (agent- sara ndai gumhpraw re, alu naw bang ya rit) alu shalai ya na ni zawn rai nga ai. Sara wa akyu n hpyi ya yang, shaman chyeju nlu na, sara wa n shaman ya yang Karai Kasang e n mada na hte Shi hte n hkrum lu na lam ni kraw kata e tsu rawng nga sai.

Nye a ningmu langai jat bang nna shaleng mayu ai. Jinghpaw Wunpawng sha ni, Nat jaw amyu tai nga ai aten hta, hkinjawng dumsa, myihtoi jaiwa hte Nwawt, nga nna nawku htung kata e woi awn ai hpung mi nga nga ai. Nkau mi dumsa sha chye ai, nkau mi nwawt wawt nna mahtai tam ya chye ai, nkau mi dumsa da sai hpe hkinjawng ai, nkau mi gaw Jan ga, tsu ga, shata ga na si mat sai kaji ni hpe shaga ginla nna chye mayu ai san la (chyum laika hta, Shawlu gaw myihtoi Samuela hpe si mat sai hpang bai shaga san ai zawn ISamuela 28:3-19) nna, Karai hte tinang a lapran na madin salang ni hpe kam nna sha nat jaw sha nga ai rai nga ai. Nta masha langai kade machyi nna si wa tm kaning nmai di nga ai. Dai majaw, kadai dumsa hpe lang na, kadai myihtoi hpe shayu na, gara hkinjawng gaw nmawp sha ai, gara nwawt gaw jaw teng ai hta hkan nna, shanhte hpe machyu nna sha nga ra ma ai.
Hpung shang mat wa ai shaning latsa jan du wa tim, Karai Kasang hpe kam sham ai ladat ningnan de nre ai sha, Nat hpe kam ai kaw nna Karai Kasang hpe kam ai de, bu hpun palawng dingsa raw kau nna ningnan (nnan) galai kau ai zawn sha rai nga ai. De a majaw, Nawku hpung hta sara ni a ga hpe kadai nlai lu ga ai. Mau hpa gaw nrai nga ai, htunghkring dingsa hpe ladat jaw jaw nrun kau lu ai majaw, makam masham ningnan de du tim hkrang ningnan hpe nlu dagraw la ai she rai na ang sai ngu mu mada mai na nhten.

Yesu gaw Simun hpe Petru e, ngu shaga ai gaw tengman ai hku mu mada ai wa e, ngu ai rai nga ai hpe nyet kau nlu na ga ai. Tinang nan Karai Kasang hte matut mahkai nna tinang hkrai tsap jan rai kam sham ai hta jung noi nga lu na gaw, tinang nan jaw ai hku Karai wa hpe mu la matut la ra na ga ai. Tinang hkrai nlu tsap nga lu dingsa sharin la ra na ga ai. Dai majaw anhte de da sai Nawku jawng gaw, anhte hpe Karai Kasang hta jaw ai hku sak hkrung ai lam hpe tang mi adu sharin ya lu na shara rai na rai nga ai. Hpa majaw nga yang, nawku jawng gaw anhte ni Karai Kasang a mying hta gaw de da sagaw ai a majaw rai nga ai.

Hpungdim hku nna, Yesu a sasana gaw nawku hpung de ai hta, tengman ai hku nna hkap la kam sham ai ni marai shagu hta de da na lam tsun sai. Dai tengman lam nlu la ai ni mung nawku jawng lu nga ai re majaw, anhte ni lu da ai nawku jawng gaw masha hpe Karai Kasang a tengman lam sharin ai hta tang du hkra, madung tawn sharin ya ra na ga ai. Marai hkum shagu Karai Kasang hte ta gindun ai sak hkrung lam lu la hkra naw shakut ra na ga ai nrai ni........

Karai Kasang a Nawku Hpung (Htingnu)

Nawku hpung (The Church) ngu ai ga hte Nawku htingnu (The temple) hpe n pawng kau na ahkyak nga mali ai. Nawku hpung ngu ai ga hpe gaw Kesarea Hpilipe mare kahtawng makau kaw Yesu shi a Sape ni hpe san ai ga san hta na pru wa ai mahtai kaw maju jung nga ai. Masha ni ngai hpe kadai wa rai nga ai, nga nna tsun nga ma ta? Simun htai ai(Nang, Hkristu rai nga ndai. Simun e, na a mying Petru (Lachyum: lunghkrung) ndai lunghkrung a ntsa e nye a hpung ngai de da na nngai. Hpa majaw nga yang, Ashan hte asai gaw, nang hpe dai madun dan ai nrai; sumsing lamu e nga ai nye a Wa gaw dai hpe madun dan da ndai Marku 8:29; Mahte 16:13-19)..

Yesu a Hpung gaw tengman ai hku nna Hkristu hpe chye na hkap la ai ni hta dai hpung hpe de da na lam asan sha rawng nga ai. Petru ngu ai ga hta hkan nna masha hpe madung dat ai hku htai la chye na ai ni law law nga ai. Mungga hpe chye na ai ni a nsa de da ai hpung re ngu ai ni mung nga ai. Ga shadawn: Moi na Kahtawlik hpung ni gaw Petru a hpang hkan ai hku nna, hpung hpe de da masai. Sumsing lamu na mungdan a sumsaw (zaw) ni ngai nang hpe ap ya de ai, nga ai hpe du hkra; sumsaw sumla galaw la nna dai hpe jum noi da ai ni nga lai wa sai. Dai lam ni a majaw HPUNG gaw ga baw amyu myu hku nna garan mat wa sai law.

Shawngdaw na nawku hpung langai kaw nna sha, tsaban (11) du hkra ding yang sa taw ai ngu tim, (AD 431) hta Ephesu council kaw nna Asiria ni garan mat sai. (AD 451) Chalcedon na council hpawng kaw nna Oriental orthodox ni garan mat sai. Tsaban 11 hta gaw ngam nga ai hpung lahkawng brang garan mat wa nna, langai gaw Sinna Roma Katholic, bai langai gaw Sinpraw Orthodox re ai ginjaw kaba lahkawng byin wa sai. Tsaban 16 du wa yang hpung hpe galai jashai ai reformers ni law law pru wa sai. Maga mi hku nna, ndai tsaban 16th-20th gaw laklai ai galai shai ten (revolusion) ten mung rai nga ai. Agriculture ngu ai hkai lu hkai sha prat kaw nna Industry ngu ai jak n gun hpe lang ai hpaji de galai du wa ai shaloi, mu mada ai hte hkam la ai myit masa ni ram ram galai mat wa sai. Grau nna Truth ngu ai tengman lam ni hpe pyi, myi hte mu lu jum magra lu yang she kam na ngu ai de du wa sai. Dai majaw Science ngu ai hpungtang hpaji hte Logic ngu sawn tawt shajaw ai hpaji hpe pai hkra jum da nna sak hkrung masa. Logic a maga hku gaw, Karai Kasang ngu ai nga yang pyi, nga ai ngu ai mast dingsat hpe ngai chye mayu ai Rationalism rai nga ai. Mga mi gaw Science ngu ai hte emparicism rai nga ai. Ndai lahkawng a lapran Facts hte belief gaw wa hkrang e goi wat taw nga sai.

Hpung mung, jaw ai hku woi ai nre lam ni law law mu wa nna, Roman Kahtawlik a woi awn nga ai kaw na, Anglican hpung; Protestant hpung; dai kaw nna Anabpatist hte Restoration hpung ni mung naw garan mat wa nga ai. Gara mung tang du ai hte hpring tsup ai sharin achyin woi awn lam gaw nmu lu ma ai. Lawu e Protestant hpung kaw na bai garan wa ai lam madun dan na nngai.

Protestant kaw nna, 1500 hte 1600 lapran sha hpung kaba (3) garan mat wa sai.
1) Anglican hpung
2) Lutheran hpung
3)Presbyterian hte Calvinist hpung, dai kaw reform church ngu ai hpung mi naw lawm pru wa sai.

Anglican hpung kaw nna sha 1600 du wa mahka e Puritan ngu ai chyoipra san seng hpung, 1700 jan hta Methodist hpung ni bai pru wa sai. 1600 jan e dai Puritan hte Anabaptist ngu ai kaw na Baptist ngu ai pru wa ai rai nga ai. Methodist a kata kaw na sha, Advantist hte Holiness hpung mung 1800 jan e pru wa sai. Dai Holiness kaw na she Pentecostal ngu ai hpe shangai dat manu ai. Puritan ngu ai ni hte Lutheran kaw na pru ai Pietism gaw 1800 ning du wa yang htum mat nga masai.

Lahta na lam gaw myit lawm na zawn gaw nre, raitim Karai Kasang a hpung ngu ai hpe kaning di nna hkrang shapraw nga ma ta? ngu ai gaw sharin la na mahkrum madup rai nga ai. Ndai 2000 ning mayan hta hpung kaba madung hku nna (11) ngam nga ai.
1. Anglican hpung
2. Lutheran hpung
3. Methodist hpung
4. Congregationalist hpung
5. Presbyterian hpungReform church (Ndai 5 hte 6 gaw Calvinist ni re)
6. Reform church hpung
7. Baptist (Hkalup Hpung)
8. Holines movement hpung
9. Advantist hpung (e.g Seven Advantist)
10.Pentecostal hpung
11.Anabpstist hpung

Ndai lahta na hpung ginjaw ni hta, shanhte a kata e kaji kajaw ayoi ayam naw garan nga ai ni law law re, raitim, chyum laika a sharin achyin ya ai hkrang, nawku lai, hkan sa ra ai madung ni gaw ndai ni hta madung ginjaw nga ai rai nga ai.

Dai ni anhte a hkan sa nga ai hpung gaw, Yesu matsun da ai hpung rai nga yang grau hkrak nga ai. Ndai hpung gaw myi hte mu lu ai zawn, nmu lu ai marai hkum shagu nawku htingnu, kam sham ai hpung mung rai nga ai. Dai majaw, Yesu gaw lungrawk ntsa e nta gap ai gaw hpaji rawng ai wa re, nga ai. Dai gaw tengman ai mungga hta asak hkrung ai wa hpe tsun mayu nga ai. Zai bru jang e nta galaw ai wa hpe angawk ai wa hku sharin ya nga ai. Kaga nawku htung shing nrai, kaga myi hte mu lu ai hpung, shing nrai arai lama ma hpe kam sham chye ai ni gaw angawk ai teng teng rai nga ai.

Rai yang, anhte a nawku hpung gaw kaning re ai nawku hpung ngu na ga ta? tinang ga san san la mai nga ai. Yesu a prat hta Temple ngu ai nga ai. Dai kaw Yeruslem mare na Nawku htingnu lawm ai. Yesu dai kaw sa du nna u, bai nam, du sat hkungga, gumhpraw galai ai shara shatai ai hpe Yesu nra sharawng nna, manghkang byin nhtawm hpang jahtum Yesu rim hkrum ai hte si ra mat hkra re ai gaw Temple dai rai nga ai. Temple hpe madu ai, up ai hte shagrau hkungga taw nga ai ni gaw, hkinjawng ni, tara sara ni, hparashe ni hte laika ka ai sara ni, yawng tsun ga nga yang masha wuhpung wuhpawng hpe woi awn nga ai chyoipra san pra dum ai ni re. Shanhte gaw, kam sham ai masha ni kaw na hkungga ngu tsun nna, lu la ai alu hte lu lu sha sha ahpum asau rai bungli n galaw ai sha hpung masha a ahkun hta sha taw ai kang hta hpung, asuya kasha (htamshi alu sha) ai ni re. Dai masha ni gaw shanhte hpe shut ai nra ai. Arawng jasum ya ai hpe ndawng ai, Hkinjawng kaba Kayahpa kawn hkawt, dawn dawn jan jan re ai mu jang tara hte maren daw dan kau na jin jin re. Hpung a gaw da ai tara hpe kachyi mi mung nmai hkra ai. Tinang nchye na ai hpe ka da nna hpung masha ni hpe hkan shangun re ai ni re.

Dai majaw Yesu gaw, shanhte hpe matsa wu ai. Nanhte pyi ndang gun ai lit hpe masha ni e hpa rai shagun myit ta? jahkyawn ni e, nga nna rawng nga ai. Dai ni gaw, moi na hta prat loi shai mat sai. Masha nkau mi Hkristan raitim nawku nsa mat sai. Hpa majaw nga yang, bang dat ai alu gaw Sasana amu hta njai ai sha, Hpung a ningbaw ningla tai ai ni nga na shara hte, lang na arai jahkrik ai hta jai taw nga ai. Yu maya hpung masha ni mung Sasana gaw yak hkak nga ai ni hpe hkye la ai amu hta jai ra ai re hpe hkrak chye na ma ai. Sinna ga na nawku jawng ni hta hpung masha nnga wa sai ngu ai gaw mau hpa nrai, nawku hpung a woi awn ai jasat nshai hkraw ai hta n ga, lachyum npru ai hpung rai taw nga ai majaw rai nga ai law.

Anhte naw matsan ai mungdan ni hkan chyawm gaw, nawku jawng kaw ma ni hpe sharin ya ai, zuphpawng mai galaw ai, Camp ni hpaw nna shachye shachyang ai jahpat ai amu galaw nga ai ngu mu lu na ga ai. Ngam ai gaw zinlum ai amu sha rai nga ai. Dai hte hte myit dik ai wa gaw rai uga.

Zinlum ai shara kaw Karai Kasang a mungga majing hkaw ra ai nrai ni? Hpungtau langai hte madai kamung(Kraw kaw na pru ai ga)shaga hkat ga ai. Ngai Nawku sa ai gaw sa ra nna sa ai nye a lit rai nga li ai, nawku jawng kaw sara ni hkaw ai mungga gaw, nye a sak hkrung lam hpe galai ya lu ai lam nnga ai sha n ga, chye mung nchye na ai, nga ai. Sara ni mung shanhte hkaw ra nna hkaw nga ma ai ngu nna sha hkam la ai, ngai mung nye a lit hte nawku sa ai re, nga ai. Ndai ga na ai hte hkum ting nshung si ni rawng, nga li ai.

Karai Kasang a hpung hpe hkrang shapraw ai shaloi, dai mungga hta rai nga ai. Mungga gaw masha a hkum hkrang hta shanu nga nna dai gaw, Yesu galaw ai amu hpe matut galaw na lam rai nga ai. Chyoi pra ai Wenyi mung dat da ya sai. Dai hte pawng nna hpan da ai amu, yu rem bau ai amu hte shatsawm jahtap ai amu galaw mu. Dai lam ma hkra gaw tsawra let daw jau hkat ai kaw na hpang mu, nga ai rai nga ai law...Nkau myi Chyoi Pra ai Wenyi hpe hpaga ga ai ni naw nga ai. Ngai hpyi yang machyi mai ai, dai Wenyi hte hkawm sa yang jam jau nhkrum ai, hkan hpa hku mung jai lang mayu ma ai.

Mara raw hkat ai lam, mara dat ya ai lam gaw yubak kaw na shalawt ai amu rai nga ai. Yesu tsun ai, na mara raw dat ya sade ai, ngu aihte machyi mai ai gaw mau hpa nrai. Marai langai ngai hpe gamung rawng yang nawku jawng pyi hkum sa, dai wa hte shawng htingram nna she sa u. Marai langai ngai nju ndawng hkrum jang dai wa hte shawng htingram u. Tinang galaw shut, tsun shut ai lam nga yang kalang ta sa nna rap raw (tawngban) u, npyaw hkat ai amu langai mi mung, dai Karai Kasang a hpung hta nga mai na nrai, nga ai gaw Karai Kasang a mungga nan rai nga ai law.....

Yesu a Sasana Myi Jut

Chyum laika hta rawng ai lam ni hpe gin chyum dat hka ja masit jahkrat yu ga, Yesu gaw Kawa Karai Kasang a Sasana amu hpe hkaw tsun sakse hkam ai wa rai nga ai. Dai majaw Marku laika hta Yesu gaw Hkalup sara Yawhan kaw hkalup hkam la na dan pru wa ai kaw nna Karai Kasang a kasha hkring htawng hte hpring tsup wa sai ngu tsun lu nga ai. Mahte laika hku nna gaw Abraham, Luka laika hku nna gaw Adam kaw nna hpang da shajang nga ma ai. Gara kaw nna mi hpang hpang, Yesu gaw Karai Kasang ngu ai Hpan da Karai wa a lam sakse hkam hkaw tsun ai wa majing rai nga ai. Hkalup hkam la ngut jang kalang ta lamu na nsen gaw 'Nang gaw nye a tsawra ai kasha rai nga ndai; nang hta ngai sharawng awng nngai law' Marku 1:11. Karai Kasang a sharwng awng ai wa shi rai nga ai.

Shi a sasana amu hkaw tsun hpang wa ai gaw 'Karai Kasang a mungdan' The kingdom of God ngu ai ga baw rai nga lu ai. Dai mungga hta, Karai Kasang a ra sharawng ai lam, Karai Kasang a byin shangun mayu ai lam hte shinggyim masha hpe hpan da sai a yaw shada ai lam ni hpe kalang mi bai htawn tsun shana ya sai.

Ndai sasana garai n galaw yang,, Yesu gaw htung tara nga ai hte maren, Yuda htung, Tara laika ni hte myi htoi laika ni hta rawng ai nawku htung a sharin achyin ai hkan sa ta tut tara ni hpe shawng hka ja ra nga lu ai. Dai majaw Esaia laika hta rawng ai mungga hpe Nazaret mare na tara jawng (Synagogue) e, yawng a shawng na lang tara hkaw hpang ai shaloi kalang ta hpaw nna hti dan nga ai Luka 4:18; Esais 61:1 rai nga ai.(Madu a Wenyi nye a ntsa e shanu nga ai, nga ai rai nga ai.

Yesu a sharin a chyin ai lam, hkaw tsun shadum jahprang ai lam hte lamik kumla galaw ai lam ni hta kalang ta anhte chye na la na yak ai ga si ga ngau ni, mabyin ni hte hpaji ga ni law law rawng nga ai mung dum chye saga ai. Ga shadawn: Yawhan 6:8-13 hpe Tiberi nawng waw ra hkran na kawng kaw byin ai mabyin ka da nga ai. Muk tawng (5) hte nga (2) hpe shanhte ra ai daram karan jaw yang Mung (12) naw ngam ai lam lamik kumla rai nga ai. Ndai lam hpe hka ja sawk lu ai ni gaw lawu na hku mu lu ma ai.
1. Muk tawng manga - Yuda ni a Tara laika manga (Yesu sharin da sai)hpe tsun ai
2. Nga hkum lahkawng - Yesu hte Karai Kasang shan lahkawng pawng nna
3. Masha hkying manga jan hpe garan jaw - tara maigan masha ni hpe tsun ai
3. Mung shi lahkawng ngam - Yuda amyu shi lahkawng hpe shingran ai, lam ni rai nga ai.

Dai majaw ndai Yesu a daw jaw ai lamik kumla gaw Yesu tara hkaw ai lam rai nga ai. Karai Kasang a tara hpe hkaw tsun dan sai, kaga masha ni mung madat lawm ai, dai tara gaw Yuda amyu ni (12) a matu rai nga ai. Karai Kasang a mungdan ngu ai hta lam law law hku shaleng tsun dan lai wa sai.

Karai Kasang a mungdan nang e du sai, raitim garai nhpring tsup wa lu ai, nga ai ga ni hte dai mungdan hta gara hku rai yang shang lu na ngu ai lam ni gaw madung rai nga lu ai. Karai Kasang a mungdan shang lu na gaw shi hku nna rai ra ai, kaga lam nnga ai, shi hkaw ai tara hta shamyet ra ai. Tsawra ai lam, mara raw ai lam, daw jau hkat ai lam, garan kachyan hte manu shadan hkat ai lam ni rai nga ai. Shani shagu, marai hkum shagu daw jau hkat nga lu ai rai yang, dai Karai Kasang a mungdan hpe anhte kaw du sai ngu tsun ra nga ai. Yesu mung, Karai Kasang a mungdan du magang ra ai - shi a tsaw ra myit madun ai sasana amu hpang sai ngu ai rai nga ai. Ndai amu hpe ban hte ban, ladaw hte ladaw matut galaw ra ai re majaw, Yesu a ten hta shi hku nna hpring tsup sai ngu nmai tsun nga ai. Mungkan nhtum dingsa galaw ra na ga ai.

Esaia gaw grai hkrak ai Karai Kasang a mungdan maka hpe tsun da sai. Esaia 11:6-10 hta (Chyahkyawn gaw sagu kasha hte rau shanu nga nna, rawng gawk gaw bainam kasha hte rau hpum nga na ra ai; dumsu kasha, hkanghkyi hkalung u shat rau sha na ra ai; hkanghkyi gaw dumsu zawn yi hku sha na ra ai. Chyu chyu ai ma gaw pu htum a tsip ntsa e ginsup lu nna, chyu hka ai ma gaw, pu hkram hku hta shi a lata manaw bang lu na rai nga ai). Esaia gaw ndai lam ni hpe Karai Kasang a mungdan ngu ai shingran hte tsun dan sai. Chyum laika htai ai ninghkring ni lam amyu myu hku yu ut shakru yu yang, hpyen hte pawng nga lu ai lam, hkrit tsang ra ai masha ni hte kanawn nga lu na lam rai nga ai. Dai gaw shanhte hta dai Madu a Wenyi ngu ai rawng nga jang shada hkrit tsang agam hkat nra ai sha kanawn nga lu na hpe tsun mayu nga ai.

Ndai lam byin wa lu na matu Yesu gaw kasi madun dan lai wa sai. Gara hku hkan ra a ta? na a htingbu wa hpe na a hkum hte maren tsaw ra u, gumhpraw hkoi ai wa hpe jaw kau u, nhkru ai wa hpe matai hkum htang et...law law rai nga ai. Dai majaw Hkristan tai ai gaw Yesu tsun ai amu hpe galaw na matu rai nga ai. Yesu waw da ai lam nmaw hku hkan nna Karai Kasang hte ta gindun nhtawm ndai mungkan e Karai Kasang a Wenyi up hkang ai byin wa lu na hkum ding dek shakut ra na rai nga ai law.

Hpungdim hku nna htet mayu ai gaw, Yesu gaw Karai Kasang a ra sharawng ai lam hpe galaw dan sai hte, anhte hpe matut galaw na htet da sai. Hpung magam gun tara hkaw sara ni gaw Yesu a lam hpe sha sakse hkam nga ma ai. Yesu kadai wa re ai hpe sha tsun nga ma ai. Kam sham ai ni gaw, hpung sara ni hkaw dan ai hpaji mungga hta madat pyaw nga ma ai. Dai Karai Kasang a amu magam, Yesu galaw ai amu hpe kadai bai matut galaw na rai nga a ta? Karai Kasang gaw kalang mi bai npyaw nga sai. Kam sham ai ngu ai ni yawng wa Yesu a mau hpa amu hpe kajai gumhkawng dan ai hte sha prat mi hte prat mi lai mat wa nna, Karai Kasang a mungdan gaw tsan she tsan mat wa nga sai, ngu ai hpe kam sham ai marai shagu Yesu a sasana myi jut hpe yu chyoi la ra saga ai nrai ni?...