Bum Ntsa Kaw Nna Hkaw Ai Tara (VIII)

DAW VIII

Mahte 5:10 Dingman lam hta zingri hkrum ai ni, sumsing mungdan gaw shanhte a matu re.
(IPetru 3:14; Luka 6:22)

Dinghpring ai lam hta hkawm nga ninglen zingri zingret hkrum ai ni, sumsing mungdan gaw shanhte a matu re. Roma laika ting hta kasa Pawlu ka da ai gaw, ndai mungkan hta dinghpring ai masha langai mi mung nnga ai (Roma 3:10)nga ai. Dinghpring ai kaw du lu na matu Hkristu gaw kam sham ai ni yawng a matu mara rai nga ai (Roma 10:4).

Dinghpring ai wa ngu tsun lu na gaw Yesu Hkristu shi chyu sha rai nga ai (Esaia 60:1-3). Dai majaw, Yesu Hkristu a marang e zingri zingret hkrum ai ni gaw, sumsing mungdan lajang da ya sai. Yesu a lam gaw dinghpring lam rai nga ai. Raitim, dinghpring lam a matu kadai si hkam gwi a ta? kaga lam langai ngai a marang e chyawm gaw si hkam gwi na nga na nhten, nga nna mung ka da nga ai.

Dai rai yang, Yesu tsun mayu ai dinghpring lam gaw ndai mungkan ga na lam he kade wa ni htep na rai a ni? Nrai law, Karai Kasang a lam hta si gwi na, zingri hkam gwi na hpe sha she tsun nga ai. Hpa majaw nga yang, Karai Kasang sha dinghpring ai wa rai nga ai. Lam mi hku bai mu lu na ga ai. Yesu shi nan zingri zingret ai hte jahtum dat ai lam gaw sumsing mungdan lam a matu sakse madun da sai rai nga ai.

Masha nkau mi ndai mungkan na masha e masat da ai tara a dinghpring lam hpe mung gang bang tsun ma ai. Chyum laika a madun da ai lam gaw dai hku nrai; tengman ai Karai Kasang a lam hta zingri hkrum ai ni; Karai Kasang a lam hpe hpang gara nna hkan tam ai a marang e hkrum ai lam rai nga ai. Yesu hkristu shi nan mung, Kawa Karai Kasang a marang e sha zingri hkrum ai, sat kau hkrum ai rai nga ai. Dai majaw, dinghpring lam ngu ai Karai Kasang a marang e nang zingri zingret hkrum n yang gaw, teng teng sumsing mungdan gaw na a matu lajang da ya sai hpe asan sha chye la lu na ga ai.Ndai mungkan hta masha shagu nbung ai. Dinghpring dum ai ni mung nga ai. Nding nhpring dum ai ni mung nga ai. Dinghpring dum tim, Karai Kasang a lam, dai tengman ai mungga lam, Yesu a matsun da ai sak hkrung lam hpe hkan nna zingri hkrum n yang gaw kabu hpa lam langai rai na rai nga ai.

Ndai chyum ga daw hta myit shachyaw yu na lam ni nga ai. Karai Kasang a lam, Yesu Hkristu a ntsa sak hkrung hkawm sa nga sai ngu tim, tengman ai mungga lam nhkan a yang gaw shut ai lam byin wa lu ai. Ga shadawn: Tengman ai Karai Kasang hpe nawku daw jau nga ai she re ngu nna, aten ntam shara n jahtuk ai chyeju shakawn mahkawn marawn garu gachyi lam a majaw, seng ang ai mung gyi ni e shaga jep nna sharen da ai hkrum yang dai gaw dinghpring ai lam hte tengman ai lam a jaw e she re ngu ntsun lu ai.

Tengman dinghpring lam gaw Karai Kasang a yaw shada ai amu magam galaw ai majaw rai nga ai. Hpan da ai amu hta shang lawm ai majaw rai nga ai. Karai Kasang ra sharawng ai lam hpe hkaw tsun shadum jahprang hkawm ai a marang e rai nga ai. Shi a sakse hkam ai hte shadum jahprang ai hpe nra ai ni chyu sha zingri zingret ai amu hpe shachyen na rai nga ma ai. Karai Kasang a dinghpring ai amu gaw, kamsham ai hte sha chye lu ai. Chyoipra ai Wenyi a lam madun ai lu la ra ai. Kaja wa tsun ra ai shara kaw tsun ndau dan ra ai. Marai langai ngai, wuhpung langai ngai Karai Kasang hpang de myit malai kayin wa na lam hta shakut shaja ra ai lam ni lawm nga ai.

Jahtum hku nna, Karai Kasang a man e dinghpring ai ngu ai gaw mungkan ga a maga mi she rai nga ai. Mungkan ga e dinghpring ai lam mung, Karai Kasang maga hku nna gaw jut mi hku sha rai nga ai. Kaja dik ai sharin la lam gaw, Yesu Hkristu shi nan, Kawa Karai Kasang a shangun dat ai amu (tengman dinghpring lam) gaw anhte a matu sharin la na loi dik ai lam rai nga ai. De a majaw mung, moi na myihtoi ni langai hpang langai, kasa ni langai hpang langai zingri zingret ai hte sha a hkrum lai wa nga ma sai. Raitim dai lam ma hkra gaw sumsing mungdan a lam rai nga ai law......