Bum Ntsa Kaw Nna Hkaw Ai Tara (VI)

Mahte 5:8 Myit san seng ai ni Karai Kasang hpe mu lu na.
(Pru 33:20; Yoba 19:26, 27; Esaia 6:5,N.N 5:24; 6:9; 17:1; 48:15; Shkkd 27:4; 36:9; 63:2; Esaia 38:3, 11).

Shawng na ga baw ni hta tsun sai hte maren, Yesu a tara nnan ndai gaw Ga Shaka Dingsa hpe shamyet shanat da ai lam law law nga ai. San seng ai lam gaw Yuda amyu ni hta lagaw lata kashin ai hku nna hkum hkrang hpe jasan ai hta grai madung nga ma ai. Yesu nta de shang wa yang lagaw shin na hka njaw ai majaw, num sha gaw manu dan ai mura hte lagaw kaw chya nna kara hte katsut ya ai lam ni mung jasan jaseng ai hte matut nga ai. Hkum hkrang san seng na kashin kau ra ai zawn, myit masin san seng na mung kashin katsut kau ra na lam yesu ga byan dan nga ai. Gara hku myit hpe kashin kau na rai ta?(Heb 10:22; 9:14; Kasa 15:9). Ga Shaka Dingsa hta mung Shkkd 32:1, 2; hte Rom 4:5-8; Esaia 6:5-8)ni hta tsun da ai hpe mu lu na ga ai. Yuda amyu ting hta makam masham a sharin achyin lam gaw Karai Kasang hta san seng nga lu na dusat nawng jau ai hku shakut na hkinjawng ni chye na ai Karai masa hta shakut nga ma ai.

Yesu a sharin achyin ai lam gaw myit masin san seng na lam rai nga ai. Zet let chye chyang ai ni ngu ntsun mayu ai hpe mung dum ra ai. Dum na ga ai, Pharashe ni galaw nga ai gaw hkum hkrang san seng na hpe madung ai zawn byin nga ai. Labu palawng ahpraw hte tara shadik dan, akyu hpyi dan re ai gaw namhtun hpraw chya da ai lup hte bung ai lam mung tsun dan manu ai. Yesu tsun ai myit masin gaw, kraw lawang san seng ai, myit mang ai lam san seng ai, jasat ai lam san seng ai, wenyi san seng ai, sak hkrung ai lam yawng san seng ai lam rai nga ai.(ngai hku nna jat shaleng mayu ai gaw: amu bawngban tim, sasana amu galaw tim, hpung up hpung sara galaw tim, gara uhpung uhpawng hte kanawn tim, myit nsan ai ni a sak hkrung lam gaw masha shada pyi yu matsat chye nga ai).

Yesu tsun ai hpe Jinghpaw hku 'myit san seng ai' ngu ai hta lai nna lacyum sung hkra shaleng na grai wa yak la nga li ai. Myit san seng ai ni gaw shanhte a sak hkrung lam yawng galai mat nga ai. Yu maya rai nna tsaw ra na shingni ningja rawng ai hte mung bung nga ai. Ngai law law lang myit yu ai. Ma kaji ni hpe masha kadai mung tsawra chye ai gaw, yubak nrawng ai lam a majaw re, ngu tsun ga nngai. Chyum laika hta masha gaw Yubak hte shangai wa ai re majaw yubak lu chyalu re ngu ai gaw maga mi re. Tinang galaw nna lu ai yubak gaw grau nga ai. Loi kaba myit su wa sai hte masu chye wa, nmu ai shara kaw mayun galaw chye wa, n ju ndawng myit rawng wa, ga law mayu, myit machyu mayu re ai aten du wa jang tsaw ra na zawn nsan mat ai. Daru mayu wa ai, ahkre mayu wa ai. Dam jaw nna sharin mayu wa sai. Dai wa hpe gram shading mayu wa sai. Kaja ai lam hpe manu jahpu jaw nna galai la u ga, ngu na zawn masha hpe je yang hpang wa ra sai.

Yu maya hku nna sawn yu ti pyi ndai myit masin san seng ai ni a sak hkrung lam gaw tsaw ra na zawn rai nga ai. Masha kaba nkau mi law law a tsaw ra ai hkam la lu ma ai. Shanhte mara nrawng ai ni re ngu mu lu ai. Gumgai dingla nkau mi hpaji nchye tim kanawn pyaw la ai, matsan dum na zawn, hkungga nlaw ai shingni sat lawat ni nga nga ai. Mahkawn shabrang ten du wa yang, tsawra ai jan wa gaw mu mada hkam la chye na ai amyu myu rai nga ai. Nkau mi matsan dum nna la ai, nkau mi sharawng nna la ai. Tsawra na zawn re ai shayi sha ni gaw yawng yawng mung tsaw ra nga ma ai. Yesu a ra sharawng ai myit san seng lam gaw asak pang hte nseng ai, masha langai mi hte seng nga ai majaw, shawng na ga baw kaw tsun ai hte maren, na a nlung salum hpe shaw kau nna kya ai salum galai ya na, ngu ai Yesu a yaw shada lam gaw shi a tara lam nmaw hta tut e amu lu nga na ga ai. Chyum laika hti shagu mung ndai yu jut hte Yesu a tsun shaga ai ga ni hpe dingdaw yu lu na ga ai.

Ndai ga baw hta mahta tsun nga ai gaw 'Pure' ngu ai jet ai, hpa n kayau ai hte, 'Clean' ngu ai san seng san pra ai ngu na kun, ndai lam lahkawng a lachyum gayau lawm nga ai. Pure ngu ai hta san seng ai sha nrai, sincerity ngu ai yu yu si si re ai nsam kyang lailen sat lawat lawm ai. Ung ang ai, ntsen ai, nrip ai, ndap ai nlawm ai langai sha re ai myit madung hte sak hkrung ai ni lawm ai (Shkkd 86:11). Yesu gaw ndai Pure hte Clean yan kaw na Pure hpe ra sharawng nga ai. Clean gaw Karai Kasang sha galaw ya lu ai, tinang galaw lu ai gaw hkum hkrang jasan jaseng ai sha re. Jasan jaseng la lu ai Karai Kasang sha rai nga ai majaw, tinang tara shadik ai hte san seng wa lu na nrai.

Karai Kasang hpe mu lu na lam gaw, ndai kawng ntsa na hkaw ai tara shagu a hpungdim e a lawm nga ai. Karai Kasang hpe mu lu ai ngu ai hpe tsaw dik ai mai kaja lam hkam la lu ai lam re hpe shabung da nga ai (IKor 13:12; IYawhan 3:2). Dai rai yang anhte ni san seng hkra mai nga na i? Chyum laika hta tsun da sai (Mahte 5:8; 2 Hkhk 20:3-6; Kasa 15:8,9; 1 Petru 1:22,1 Htesaloni 2:4-10;N.N 5:22-24; Daniela 6:3,22; Shkkd 24:3,4; hte Shran 7:9-17 ni hpe sawk bram hti yu ga).

Karai Kasang hte myi man hkrum mu lu na ten gaw lani mi du wa na re majaw chyum laika hta ga sadi jaw da mani ai.(Mahte 5:8; Yoba 33:25,26; Buhkawm 12:5-8; Pru 33:11; Tarajhp 34:10; Esai 33:15-17; Hebre 12:14; 1 Yawhan 3:2,3; Yoba 19:25-27; Shingran 22:3-5) ngu nna ndai Mahte 5:8 hta lakap nhtawm tinang a hkum myit masin hpe shadum dat yang, sak hkrung lam hta madi shadaw ya na chyum ga wa rai nga mali ai law.....