Bum Ntsa Kaw Nna Hkaw Ai Tara (V)

Mahte 5:7 Matsan chye dum ai ni gaw shanhte mung matsan dum la ai hkrum na re.

Mungga a shingdu labau mabyin:

Yuda htunghkring, Yuda amyu, Yuda makam masham gaw garan kau nlu hkra makyit gumdin nga ai. Hpung hpe woi awn nga ai ni nan, Karai Kasang a mungdan gaw tara hkan shatup jang she dik tup wa lu na re ngu woi kam ma ai. Dai majaw, tara hkan dum ai ni gaw ngai grau hkan shi grau nhkan nga nna gumrawng, rai dum, san pra dum ai hta shingjawng shingla, lam nmaw hkan, masha mada mu na shara hkan labu palawng hpraw hpun kau nna akyu hpyi dan re ai gaw htunghkring hku she gale mat hkra rai nga sai. Dai hku nna sha, Meshia HKYE LA MADU du sa wa na hpe la nga na sindai su, myit kraw du dum nga ma ai.

Raitim dai lam ni gaw, Meshia hpe ala ai tengman lam madung nrai mat nga malu ai. Mahte 23:27 hta Yesu shanhte hpe tsun ai gaw, (hpyi hpun ai laika ka sara ni hte Hparashe nanhte ni dinngnye lu myit dai). Hkalup sara Yawhan gaw shanhte hpe, pu htum amyu ni e, ngu nna bai tsun shamying bun hkrum masai (Mahte 3:7-8). Dai aten hta nan, Yesu hpe gaw, shi a kyep din gun na pyi ngai n gring ndan she re, ngu Yawhan mu nga wu ai (Kaji 9-12). Dai pyi gaw, Yawhan hte Yesu a lapran htingram la nlu na lam ni naw byin pru nga ai. Karai hpe nawku ai dai ten na ni, Yesu amu galaw ai hpang na hte shawng na shai nga ai hte maren, tengman ai magam bungli galaw na gaw, kup tsup ai ningja shawng ra nga ai.

Dingdaw la lu na lam:

Dai hte maren, dai ni na Hkristan tai ai ni mung, lam amyu myu hku nna up hkang ai ahkrum nga ga ai. Buga hpung hta sara ni a ga madat ra, hpungtau ni a ga hkan ra, hpung tara mung hkan ra,, dai ni na hkristan hte moi shawng na Yuda htunghkring kata na nawku hpung hpa naw shai nga a ta? lama mi tsun jang pat hkrum, ban hkum, daru sharin hkrum, ga sadi pyi naw la ra ai hku sharin katut nga ai. Poidaw nsa sha jang hpung up sara gaw tsun sai, sara ni gaw dai tengman ai hpe nhkaw ntsun ai sha masha hpe sharin achyin taw nga ma ai. Sara ni mu mada ra sharawng ai hku nna hpung masha ni hpe sharin shaga up hkang taw nga ma ai. Sara ni shut ai hpe nhtang tsun ai wa gaw, hpung kaw nna shapraw kau na hte hpung tara nhkan ai ni, lale ai ni hku sha hkam la ra na ga ai.

Sawn daw yu na lam:

Yesu hkaw tsun ai ndai 'matsan dum' lam gaw ngwi pyaw ai hte matut nga ai. Yesu a amyu Yuda ni hte Roma htung hkan ai ni yawng gaw, tinggyeng myit rawng ai ni hkrai re. Dai majaw makam masham kata hta tinang hkum san seng chyoipra na shakut ai zawn, maga mi mung tinang tinggyeng arawng lu sut su na hpe sha shakut ma ai. Shinggyim masha myit hku nna ndai Mahte 5:7 hpe jahkring hkring chye na hkam la ai lam ni shai wa wa re ai nga ma ai. Tinang hpe tsaw ra jang tinang mung lu tsaw ra ai, ngai kaja jang shi mung hkrak wa ai ngu ai baw hte myit dik lu shangun nga ai. Hpung masha ni hpe mung dai hku sharin nga ai.

shakespeare gaw, matsan dum ai, ngu ai ga hpe hkaw hkam hkaw seng ni gali da nna, shanhte kaw na bai hkam la ai rai yang grau manu dan ai hku chye na na ga ai, nga ai. Lamu nna htu hkrat wa ai marang ga ntsa hpring nga ai zawn mung, lamu na hkrat ai numri ni hkai nmai jahkrung ya ai zawn mung matsan dum ai ngu ai ndai hpe shaleng dan wu ai.

Yesu gaw tengman ai ngu ai a ntsa dinghpring ai ngu ai nga ai zawn, matsan dum ai ngu ai a ntsa ngwi pyaw ai lam mung ka-ep nga ai. Dai majaw, kyang lai len, kraw kata na myit masin hpe tsun mayu taw nga sai. Ngwi pyaw ai hte matsan dum la ai hkam na matu, Ga Shaka Dingsa prat hta sagu sai, u sai hte galai yu sai. Yesu dai hpe n sharawng ai. Nawku jawng kaw Karai Kasang hpe nawng jau na sagu dumsu re ai ni hpe shi nra sharawng ai hpe mu na ga ai (Amo 5:21-24) hta mung mu lu ga ai. Yesu ra sharawng ai gaw, galaw ai sat lawat nrai, myit ai kraw lawang na myit masin rai nga lu ai majaw, galoi mung myit masin a jasat ai hpe sha atsun nga ai hpe mung chyum laika ting hta mu lu na ga ai. Dai majaw, kawng ntsa kaw nna hkaw ai tara shawng na (4) ting hta mung kraw kata kaw gara hku myit mang ra ai hkrai tsun nga ai.

Matsan dum la na zawn re ai nsam sam ai ni gaw matsan dum la ai hkrum na re. Ga shadawn: ma chyangai shangai wa yang kawa gaw lahku mayu ai myit rawng na sha re. Dai aten na Roma ni a alai gaw kadai hpe mung matsan dum ai kum la n madun nga ai. Tara ai kun n tara ai kun hpe sha yu nga ai. Masha sat na rai yang, sat gring ai mara nga ai kun, nnga ai kun. Tara hte up ai ni gaw tara jeyang na hpe sha hkrit ai. Matsan dum la ai hkrum na gaw Karai wa nan matsan dum ai wa re hpe chye ra ai ngu ai shingdu e byin ai nmu lu ai myit kraw a shadut jahkat ai sat lawat a majaw, Yesu gaw matsan dum lama ai Karai hta hkum tsup wa na lam ra sharawng nga ai.

Yesu shi nan mung mungkan ga ntsa asak hkrung ai ladaw sasana amu yi ngam hta tsap jen nga ai ten mu lu ai shi a sal lawat yawng mayawng gaw, matsan dum la ai, shamai shatsai la ai, sharin achyin la ai hte shadum jahprang la ai lam hta asak sum hkra ap nawng nga wu ai (Luka 7:11-15; Mahte 2:16; Yawhan 8:3-11) hpe hti yu ga.


A. Matsan dum ai hte mara dat ya na lam


(a)Shi a matsan dum ai a majaw hkye la sai (Titu 3:5)
(b)Na chying tsawra chye ai Karai a majaw anhte hpe Hkristu hte hpawn di nna jahkrung mani ai (Ehpesu 2:4-5)
(c)Matsan dum ai hte yubak hpe raw dat ya ai lam gaw Madu Karai hte seng ai ni sha lu galaw ai (Daniela 9:9)
(d)Jahpawt manap hpe la ai hta, Madu hpe la nga gring ai (Shkkd 130:1-7).

B. Karai a matsan dum ai lam gaw mara raw ya ai de du wa sai.
Mercy goes beyond forgiveness

Mara dat ya ai yawng gaw matsan dum nna sha nrai, hkye hkrang la mayu ai a majaw re. Shi a hkye hkrang la ai lam gaw matsan dum ai san san sha mung gaw nrai nga ai.

(a) Shkkd 119:64--"Ga ntsa e Yehowa a chyeju hkrai hpring rai nga ai".

(b) N.N 32:10--Nga mu nga mai shangun na Yehowa.

(c) 2 Samuel 24:14--"Karai Kasang a matsan dum ai myit kaba la ai".

(d) Nehemiah 9:19--Karai kasang a galu kaba ai amu majaw nam mali hta n shadam da ai Israela amyu hpe woi wa sai


(e) Matsan dum ai hte tsaw ra ai gaw tut e rau anga nga ai.

Dai majaw, Karai Kasang hpe tsaw ra ai ni gaw, matsan dum la ai teng teng hkrum na lam... ndai kawng ntsa kaw nna hkaw ai Madu Yesu a ga nsen hte anhte hpe shachye shachyang mani ai rai........