The Largest Train Station in the World

Mungkan hta kaba dik, hkrik hkam dik ai Wanleng Daru re nga ai 'Nagoya Station' gaw lani mi masha sen mi chyen (150000)pru shang gahkrang nga ai. Japan mungdan hta masha shuk dik ai wan leng daru 5 hta lawm nga ai. Nagoya mare kaba mung Japan mungdan a No.4 kaba dam ai mare kaba rai nga ai. Tokyo, Osaka, Yukohama dai hpang Nagoya rai nga ai. Nagoya mare kaba kaw sha Dakkasu jawng hte College (54)nga nga ai.

Wanleng daru gaw wanleng sha hkring ai nrai, sumtsan de kagat nga ai Bus line ni yawng ngu na wa mung dai kaw ginjaw tawn ma ai sha n ga, mare kaba kata kagat nga ai Bus nkau mi mung ginjaw tawn da ma ai. Station a kata de gaw mare kaba langai zawn, gat seng hkum hkra mung hpaw da ma ai. Ntsa de mung htap 7 du hkra lu sha seng hkrai rai nga ai. Internet man kaw tam yu yang Nagoya Station a lam ni grau hkum tsup ai hku ka da nga ma ai.
Bullet Train mung line manga hku minutes (10) hta langai pru shang rai nga ai. England mungdan na Heathrow hte Thai mungdan na Bankok Aiport ni gaw Minute mi hta nbungli langai pru shang kyin dik ai hpe mu kau da ai. Raitim, wanleng daru hta dai daram kyin ai nmu ga shi ai. Tokyo mare kaba kaw gaw wanleng aten man ai hte lawan nna masha chyat dik ai hpe hkrum ga ai. Raitim dai wanleng daru ni gaw ga kata de galaw da ai majaw ntsa lam hte mu mada na yak nga ai.

Nagoya zawn re ai mare kaba langai hta sha nga ai masha ni sha pyi Wunpawng amyu hta grau law nga ma ai. Shana na yup tung jahpan hku nga yang Wan lahkawng jan jan rai nga ma ai. Mare kaba a dam de gaw 363Sqm re. Buga mungdan langai rawt galu kaba wa na lam hta hpaji sha nrai, mung masa sha nrai, galaw la ra ai lam law law rai nga ai. Masha law ai hta hkan nna, lu sha gyin shapraw ai, htaw wa htaw sa hte matut mahkai lam ni, nga sa ladat hte myit mang sawn tawt up hkang ai lam ni gaw ningbaw ni a lit sha nrai, amyu masha shagu a shani shagu aten shagu na shamu shamawt ai manawt dingsawt yawng lawm nga na nrai a ni????

Tsan kaw na mu lu ai Nagoya wanleng daru.

Dolphin Football Game

Lamu Ga Htu Dut Sha Ai De

Dai ni gaw U myi pai a shingrun ndum hkrup, gam mi a kaja Japan ga na 'Ga' htu nna dut sha ai jak rung kaji de sa du hka ja la lu ai. Nchye ai ni a matu mau hpa hkrai she rai nga ai. Shan hte htu dut sha kau ai bum kaji langai pyi ma wa jang she sa du mu ya ai hku ang sai.
Mungkan ga ntsa kabye hkrai kabye hkawm tim htu dut sha ai baw re hpe dai ni she chye ai gaw nye mara rai sai. Raitim, dai hku majoi htu dut sha ai nrai, galaw ra ai tsang lam hte lam rai nga ai. Ndai 'Ga' hpe dat garan dat yang, akyu jaw ai rai amyu hpan (10) hpe galaw shapraw la lu ai lam chye lu ai.

Grau myit lawm hpa gaw shayi num sha ni a myi man tsawm htap wa hkra chya shatsawm ya ai shakya rai wa ndai ga kaw na she re hka ngu chye la ai gaw nye a matu mau hpa hte sharin la hpa rai nga ai. Jak rung madu gaw tsun ai 'ndai ga shingmun hte sha shayi sha ni tsawm nga ai re' da. Dai hta kaga shat ban hka wan amyu myu 'Ceramic' ni hpe mung galaw nga ma ai. Porcelain dat grai law ai majaw kaga akyu nga ai lam gaw law law re. Nbungli pa ntsa lam kaw nep ai hta bang ai- hpa majaw nga yang moisturiser hpe chyup ai majaw nbungli rawt yang mung, pah (yu hkring wa) ai shaloi mung kashawt manen ai hpe hting hkang ya ai sha n ga, nbungli pa hpe mung ja hkak nna tsawm shangun ai majaw nbungli pa galaw yang ndai ga nlawm nmai rai nga ai.

Japan mungdan kaw gaw bum hpe htu dinghkren nna lam waw da ai hta mung ndai ga lawm ra malu ai. Hpa majaw nga yang, bum kata kaw htu da ai re majaw, bum kata hka ntsin kayun gapya nna lam hpe madi nyap shangun ai kaw na makawp maga ai nga ai. Dai sha nrai, pat jam na ni hpe arut shatsawm ai shaloi mung lang ai, zaw kata kaw mung nam hkan nsha hkra a matu bang ai, ja ai ga nlung ni hpe htu dawk yang jai lang ai hpri baw ni hpe hka hte kayau nna jaw bun taw yang dai hpri gaw hten daw ai kaw na makawp maga ya ai lam ni mung nga nga ai. Lungseng ret yang, hpri shada ret yang, nlung ret yang hka ntsin mut mut re ai hte zingret rau jaw bun bun re ai gaw ndai ga ntsin rai nga malu ai. Dai hpang gaw Toyota mawdaw ni hpe madun ai gawk nu hte Aichi Prefectural Ceramic madun gawk de bai myi man shayawn dat sai.

Jak rung hpe sa du gawan ai shaloi gaw, ga hpe gayau shakya nna maza shaw kau nhtawm, hka nawng hta tsing kabun let shagye da nna hka shaw kau yang lam masum daram garan nna ga chya-nya (hkau na hpwi da ai zawn) rai nga sai hpe bu ri kaw bang nna compressor hte pyip dat yang ga dingpa ni byin nhtawm dai hpe jahkraw tawn nna jak hta rin dat sha gaw rai nga ai. Dai shaloi ga nhpu ni byilat ga zawn pru wa nna dai shingmun hpe dut sha ai sha re. Raitim, dat garan ai lam, hpan garan ai hte shatsawm shagreng la ai daw gaw hpaji lawm nga ai majaw, aten kadun hte sha gaw yu chyoi la na ram ram yak nga ai. Daihpang gaw TOYOTA Mawdaw madun ai shara de lagaw ndung shayawn dat sai...

Bum Lang De Man Yawng Ai Shani

September 13, 2009 ya shani gaw laning mi masha 200000 (sen lahkawng)sa du du re ai Fuji Bum (Fujisan)de myi man shayawn dat yu ni ai. Wunpawng Buga e naw nga yang, Daru Bum, Hkaw Hta Bum, Chyau Mawng Bum, Bumhpye Bum, Maji Bum, Wuloi Bai Bum, Hpayang Bum, Jan Bai Bum, Na Hpaw Pajau Bum, Shagri Bum, Ngaw Yi yan Ngaw La hte NRaw Kawng mayan Lakawng Bum hte kaga Bum tsaw ram ram hkan gaw du kabye hkawm yu ni ai. Raitim masha wunawng wuwa, mawdaw jawn nna nre ai hta n ga, bum pungding du hkra mung nlung du yu nngai. Wunpawng buga hta masha garai nlung ai Bum ni 40 naw nga ai nga nna mung Myen mung bum lung hpung ni tsun ga ma ai.

Panglai madang Pe 12389ff/3776m tsaw nna Hakone-lzu National Park kata na Fuji Bum gaw mungkan hta mying kaba ai Bum langai rai nga ai. Japan amyu sha ni a sari sadang hpe mung gun nga ai bum wa rai nga ai. 1707 December 24 hta wan bum hpang jahtum kapaw nna dai ni du hkra yup taw sai bum krin bum hkat rai nga ai. Ndai bum grup yin hpe National Park hku nna, 1936 hta masat nna lam tsawm hte hkring sa shara Level or Step (5)2300m du hkra mawdaw kaji kaba hte kam ai shaloi, aten n lata ai lung mai sai. Raitim, Level 6-9 gaw lagaw hku hkawm lung ra nga ai. Bum pungding kaw weather forcast station hpe mung shachyaw da ma ai.

Bum ntsa de Level (5) du hkra mawdaw hte lung nna lagaw hku bum pungding de man jut (4) hku lung mai nga ai. Level manga a lahta de gaw hpun nam tsing ntu sai hte masat da ai lam hku sha mai lung nga ai. Lam numshe shang nna nmai hkawm ai. Kabye shara ni nngang ai majaw kalang ta sharut gyi ai zawn gyi lawm mat wa mai nga ai.

Bum de lung ai Level hpe lawu na hku masat da ma ai. Level 1-140m; Level 2-1596m; Level 3-1786m; Level 4-2046m; Level 5-2300m; Level 6-2390; Level 7-2700m; Level 8-3400m; Level 9-3776m hku masat da ma ai.

Fuji Bum de sa du lung mayu ai ni a matu gaw, shaning shagu July hte August hta sha ahkang jaw ma ai. Raitim dai ning gaw ndai September du hkra masha ni naw yan gamawng nga ma ai. September hta gaw, Bum pungding mayan e summwi ni minute 10-15 laman ka-up mat wa bai san mat wa re ai hta n ga,katsi la ai nbung ni a majaw nten hkraw, marawp na nbung nhkru nna hkum hkrang kya wa, baw ni sin wa re ai byin nga ai. Hkam kaja lam hte yup hkru nna n gun mung rawng ai ni a matu gaw sharawng awng hpa shara hte bum ntsa e du yang pyaw la ai gang hkau sum mwi wanleng jawn ai zawn nga hkam sha shangun nga ai. Raitim, hkam kaja lam nau nnga ai ni a matu gaw asak a matu tsang hpa mung gaw rai nga ai law....click photos to enlarge

.......click photos to enlarge

Hkai Sun hte Kan Bau

Hkai sun galaw nna san seng ai hte yubak mara hkyam sa ai sak hkrung lam hpe madu lu na hpe myit mada ai kadai wa nga ai kun?

Tinang a kasha ni hpe jawng lung shangun ai gaw, 'sarawun tai u ga, Engineer tai u ga, sara kaba tai u ga' nga nna tsun ai sha na ga ai. Nye kasha hkau na galaw sha chye na, sun galaw nna kan bau chye u ga ngu ai ga gaw kadai ntsun ai. Yi sun hkau na hte sun glaw sha ai gaw grit nem ai amu, hpaji nchye ai ni a bungli hku sha mu mada shangun nga ai.

Hkai sun hta hpaji madang tsaw yang, mungdan masha ni a malu masha hte hkam kaja lam hpe ngang grin shangun ai nrai ni? Dai majaw ndai laman Japan mungdan e Kiwi namsi hpe awngdang ai hku hkai sha nga ai shara de lani mi sa du hkaja hkawm ai.


Kiwi gaw Switzerland, China, Portugee hte USA hkan sha nga nga ai. Law malawng katsi ai dat hpe ra ai hta n ga, nlaw htum laning mi hkyinghkum 200 5c degree shalawt ya ra nga ai. Laning mi kalang sha hkai tim hpung langai hta namsi 500-1000- laman si chye nga ai. Namsi langai Japan gumhpraw 70-100 lapran nga ai rai nna sun langai hkai sharam da ai hte gaw gumhpraw shi chyu lwi bang wa sai.

Japan mungdan ting hta Kiwi sun masum sha nga ai. Ndai sun gaw awngdang dik htum ai sun langai rai nga ai. Shani shagu ngu na wa sa yu hkaja ai masha ni dingren nga ma ai. Namsi she mari sha tim gara kaw na re ai hpe nchye ai masha tsa lam 90 nga nga ma ai. Lak lak lai lai byin ai lam gaw Tokyo kaw na htinggaw nawng ndai sun nga ai mare de n gaw htawt wa hkra myit lawm shangun ai sun rai nga ai. Sun de sa du ai ni bai sa du mayu shagnun ai, myit ngwi pyaw ai, ndai hku mung sut su shangun a hka? ngu ai hpe dum shangun ai lam ni shabyin ya nga ai.

Lai wa sai 60 ning hkan e Japan mungdan hta hkau na shara ni hpe jak rung shachyaw nna hkau na galaw sha ai ni hpe jak rung magam amu hta bungli jaw kau ai hte, sun hkau na galaw nna gaw mungdan n galu kaba na re, asak nga pra lam hpe mung nrawt jat shangun na re nga nna sun hkau na galaw sha ai masha ni hpe myi man kaji arawng hpoi shangun masai. Hkai sha ai ladat hpe mung hpaji dat hte hkai, hka ntsa e hkai ai ba hkri sum nhpang mi asi 5000 hkying manga si hkra hka ntsa e sha hkai ai ten ni nga lai wa sai. Raitim dai lam ni gaw masha hpe akyu njaw ai hpe mu mada wa sai majaw, ga nam hpun hte hkai ai asi ahpun kaw na sha masha hpe akyu jaw ai lam hprang wa masai.

Ya dai ni gaw dat nam hpun nbang ai 'organic' hpun law hpun lap hte du sat kaw na pru ai maza hpe namhpun shatai nna hkai ai hpe sha manu shadan wa masai. Raitim, ndai hku hkai sha ai shaloi ahkyak ai gaw, gara hku na na rem kyem da lu na ngu ai hpaji, gara hku lawan shamyin na ngu ai ladat hte na na hkam hkra rem zing lu na lai masa ni gaw galaw shapraw ai ni a kri hpung tang hpji san san rai nga na nrai ni???